1. Samuel 5:4 - O Debleskro Lab 2024 (Sinte-Manouche)

⁴ Oun har yon o vavar dives taysarlakro pre stan, hatsan le o Dagon pale ap i phoub čiddo glan o morhton. Kokres leskro doumo his kote čiddo. Leskro shero oun leskre vasta his tele dino oun čiddo kote, kay yek an o voudar dren vell.

O Debleskro Drom 2021 (Sinte)

⁴ Un har jon o wawar diwes taissarlakro pre stan, hatsan le o Dagon pale ap i phub tchiddo glan o mochton. Kokres leskro dumo his kote tchiddo. Leskro shero un leskre wasta his tele dino un tchiddo kote, kai jek an o wudar dren well.

1. Samuel 5:4 Referans Kwoze

Micha 1:7

I tsele figure, hoy i menshe an-mangan, venn an kotya phagedo. Ava, kol rhorhene debla venn paash dino. Oun kova, hoy anan i menshe an i khera kol rhorhene deblendar, vell rhačedo. I menshe an Samaria nashan vavar deblenge palla har i loubni i morshenge palla nashell. Yaake lan le kava tselo koova khetne. Kolla, kay venn oun randenn len vin, lenn kava koova pentsa khere, oun anenn les an pengre deblengre khera.

Jeremia 50:2

Denn vin gole an i vavar themma! Halauter hounte shounenn! Hadenn t'mari themeskri plarhta pre! Hakeno te shounell kova! Rikrenn les gar pale! Penenn: O foro Babilon hi dren lino, Lengro devel Bel nay kras či, lengro devel Marduk hi khetne phagedo; lengre moule debla nay kran či, lengre figure hi pash kerdo!

Jeremia 10:11

Pen lenge: Kol deblenge, kay kran gar o bolepen, vitar gar i phoub, hi kek platsa ap kay phoub oun tel o bolepen, oun nay ačenn gar.

Daniel 11:8

Ninna lell lo lengre deblen oun figuren oun lengro kouč koova, hoy dran roup oun sonakay hi, oun anell kova an o them Egiptia. Oun palle moukell lo bershenge tele ko baro rayestar pral o them Syria.

Jesaja 27:9

Yaake vell o Israelengri doosh krik lino. Oun ap kova sikrell pes, te hi lengri doosh krik lino: Te denn le i pre-čidde barra yaake khetne, kay mangan le i vavar deblen an, te ačell či har čik. Oun te moukenn le kek figure tardo, hoy sikrenn i debletsa Ashera, vitar kek boba, kay lake soungepaskro koova rhačedo vas.

Jesaja 40:20

Yek, kay hi čorvelo, rodell peske i kasht, hoy zorelo ačell, oun anell les pash i morsheste, kay hayvell mishto o kashteha te boudrell, te krell lo leske i figura, hoy gar trouyel perell.

Jeremia 10:14

Glan sau baro koova hi hako mensho dineles koy tardo. Savo koova nay hayvell lo gar te krell. Kolla lauter, kay kran figure, te mangenn le len an, hounte ladjenna pen. Lengre figure hi kek čače debla, kek djipen hi an lende.

Jeremia 10:15

Yon molenn či, oun hi sapaske. An ko tsiro, kay rakrell o baro Devel o čačepen vin, hounte djan yon tele.