1. Mose 6:13 - O Debleskro Lab 2024 (Sinte-Manouche)

¹³ Doleske penas o Devel ap o Noah: “Kolla, kay djivenn ap i phoub, kran, te vas i phoub pherdo čilačepen oun midjak koova. Kamau gar, te djivenn le doureder. Ava, me krau, te merenn i tsele menshe oun halauter, hoy ap i phoub hi.

O Debleskro Drom 2021 (Sinte)

¹³ Doleske penas o Dewel ap o Noah: “Kolla, kai djiwenn ap i phub, kran, te was i phub pherdo tchilatchepen un midjak koowa. Kamau gar, te djiwenn le dureder. Awa, me krau, te merenn i tsele menshe un halauter, hoi ap i phub hi.

1. Mose 6:13 Referans Kwoze

1. Petro 4:7

Ko tsiro vella sik, kay či ačella, hoy kanna koy hi. Doleske denn garda, har t'mer djivenna, te rikrell t'men či pale, te rakrenn o Debleha!

Amos 8:2

Oun yob poučas mandar: “Hoy dikeh, Amos?” Me penom: “I korba, kay roukengre dren hi, kolenge o tsiro vas, te venn le tele činlo i roukendar.” Koy penas o baro Devel: Yaake vas mire menshenge Israel o tsiro, te venn le tele činlo. Yon khaytenn man bouder gar.

1. Mose 7:23

Yaake vas o tselo djipen ap i phoub tassedo: i menshe, i firhe, i bare oun i tikne, ninna i čirkle. Halauter vas tassedo. O Noah kokres ačas djido oun kolla, kay djan khetne leha an o panyeskro kheer.

1. Mose 6:4

An ko tsiro, har i Debleskre čave khetne van i menshengre čentsa oun lendar čave bolde van, djivan bare menshe ap i phoub. Ninna pal ko tsiro. Kolla his čače morsha an ko phouro tsiro: baro oun an-diklo.

Hebrearja 11:7

Ninna o Noah patsas, hoy o Devel penas, har yob leha rakras, oun leste sikras, hoy pral i tsele menshende vella. Ninna te dikas o Noah kova gomme gar, shounas lo ap o Debleste, oun kras i baro panyeskro kheer. Yaake hounte meras yob peskre menshentsa gar. Har o Noah ko panyeskro kheer kras, vas diklo, te patsas yob, hoy o Devel penas. Ninna vas diklo, i vavar menshe patsan gar, hoy o Devel penas. Doleske hounte meran le. Ap o Noah penas o Devel: Tou patsal man. Tou hal kanna an o čačepen tardo glan mande.

Jeremia 51:13

Tou foro, kay hal kote, kay bare panya hi, tou, kay tout baro bravlepen hi, tiro tsiro hi trouyel, tiro djipaskro thab vell tele činlo.

1. Mose 49:5

O Simeon oun o Levi hi phrala. Lengre rharentsa maran le.

1. Mose 6:14

Kre touke i panyeskro kheer dran zorelo kasht. Kre boud isema dren. Oun mak vin oun dren teera pre!

1. Mose 7:4

An efta divessa moukau me brishin tele te vell ap i phoub: star-desha divessa oun star-desha rati, yaake te merell ap i phoub o tselo djipen, hoy krom.”

1. Mose 7:21

Oun koy meras halauter ap i phoub, hoy djido his: i čirkle oun i firhe, – kolla, kay divyo hi oun kolla, kay gar divyo hi, ninna i tikne firhe, hoy djan pral i phoub, oun i tsele menshe.

1. Mose 8:21

Oun o baro Devel soungas ko lačo soungepen oun penas ap peste: “Me dau man sovel, te anau bouder gar havi bari bibarht pral i phoub doleske, hoy i menshe krenna. Djinau, o mensheskro dji hi čilačo foun tiknes pre. Me kamau bouder gar o tselo djipen ap i phoub te marell, yaake har krom.

Jesaja 34:1

Avenn kay, t'mer menshe dran vavar themma, oun shounenn! Denn yak ap hako lab! I tseli phoub oun lauter, hoy ap late djivell, mou shounell, hoy penau.

Amos 3:7

Čačepah, o baro Devel, maro ray, krell či, te rakras lo gar glan kova koy pral ap peskre rakepangre, kay leske koy hi.