Ma꞉tiu 6:5 - Panake Pi La: Ula: Buka pita: Kine Pieke Buka

⁵ Yeni pimika꞉na꞉ta꞉ mo hande yayapiki hau pu haleme haliwekina꞉ hau na honda꞉pa꞉peke. Wanda꞉halima꞉ iki handena꞉ hone hone witolo hata꞉ mandane pota꞉ hopiki nina꞉ make yeni da pa꞉ta꞉manu make tialiao hata꞉ Koda꞉ pa꞉ta꞉ yeni pu halememe. I̱ma꞉ iki pa꞉ta꞉ ota꞉ pi alome. Ikana꞉ma꞉ ika꞉ pimi hauna꞉ yenki manuta꞉ ame do hata꞉ mu paeyaasememe.

Ma꞉tiu 6:5 Referans Kwoze

Ma꞉tiu 6:2

Koto ekina꞉ta꞉ mo hande natehali wanda꞉hali tamba꞉ muluekema꞉ ala꞉ta꞉ ma꞉nda꞉ halemeka꞉na꞉ta꞉ kota꞉ wala꞉ wala꞉ pea na hala꞉pa꞉peke. Mo hande yayapiki hau pu haleme haliwekima꞉ oni hande pota꞉ hopiki nina꞉ make yeni da pa꞉ta꞉manu make kutu piki wala꞉ wala꞉ piki haumanu pu halememe. Koto hau pimiki ekita꞉ mo wanda꞉halima꞉ ika꞉ biki daeyaena꞉ yeke pu halememe. I̱ma꞉ iki pa꞉ta꞉ ota꞉ pi alome. Koto tapakema꞉ ika꞉ pimi hauna꞉ yenki manuta꞉ ame do hata꞉ mu paeyaasememe.

Luku 18:13

Koto leekepate mo dakisi mu hayeke halima꞉ta꞉ ipika꞉ siki mo pate leke hata꞉ta꞉ oli ya nane kone na handa꞉liake panda꞉ puniao hata꞉ ipika꞉ hakokona꞉ litolo hata꞉ alota꞉ Koda꞉o. I̱ta꞉ hoke hau polo somema꞉ I̱ a꞉ta꞉ma꞉ homa꞉e leekeme.

Maka 11:25

Kutupa make Koda꞉ pa꞉ta꞉ tiao hata꞉ yeni pimika꞉na꞉ta꞉ ma꞉nda꞉ma꞉ iki pa꞉ta꞉ hoke hau pa꞉la꞉eki pa꞉ta꞉ hone pa upaleke hata꞉ pimika꞉na꞉ta꞉ kota꞉ ipika꞉ hoke hau tombuao pa paeyaapa꞉peke leekeme. Ika꞉ hepeni nane hala꞉ Apa꞉ma꞉ ika꞉ hoke hau paeyaena꞉yeke ma꞉nda꞉ma꞉ iki pa꞉ta꞉ hoke hau pa꞉la꞉eki paeyaapa꞉peke leekeme.

Luku 20:47

Kutupa kosa꞉piki wanda꞉wekina꞉ damanu makea makea pea minolota꞉ handaena꞉ hau pea yeni pu hokulu peao halememe. Koto ekina꞉ta꞉ mo haliwekima꞉ ika꞉ mulu peleme hoke yenkita꞉ ota꞉ haka꞉ta꞉pao tieke milimikie leekeme.

Dia꞉mesi 4:6

Kutu piliepate Koda꞉ma꞉ ipika꞉ a꞉ta꞉ma꞉ homolo hata꞉ pa kita꞉la꞉ ekita꞉ wopue. Kutu pita꞉la꞉ ekima꞉ mo Baibolo bukana꞉ wape pa꞉la꞉eki doe. Hakoko liteleme haliweki pa꞉ta꞉ta꞉ Koda꞉ma꞉ a꞉nda꞉ lia hala꞉pate homupiki haliweki pa꞉ta꞉ ipika꞉ a꞉ta꞉ma꞉ homa꞉la꞉eki pa halo hala꞉me wape pa꞉la꞉me.

Luku 18:1

Kutupa Yesuma꞉ta꞉ ipika꞉ disaipolo haliwekima꞉ kima꞉ na homeke hoto paeyao yeni pea꞉tiki pina꞉yeke onkoluma꞉ laa dupa leekeme.

Epesese 6:18

Do haumanu paeyaota꞉ Koda꞉ma꞉ tamba꞉ mina꞉yeke pitolo hata꞉ yeni pea꞉tiki pu hapa꞉peke. Koto mo Sipitidima꞉ walolo haena꞉ hoto paeyao yeni pea꞉pa꞉peke. Koto ekina꞉ wotu handeteke hata꞉ soka꞉la꞉ma꞉ na homeke Koda꞉na꞉ wanda꞉hali paeyao pa꞉ta꞉ hone witolo hata꞉ hoto paeyao yeni pea꞉tiki pu hapa꞉peke.

Luku 11:43

Pa꞉tisi haliwekio ika꞉ hoke yenki tiekena꞉ I̱ paala꞉e. Ikana꞉ma꞉ta꞉ oni yeni pu hala꞉ da pa꞉ta꞉ mo you haliwekina꞉ wiala꞉ sea manuna꞉ pituluekema꞉ hone wotu u haleme make oni makedi hama haleme wanda꞉halima꞉ ika꞉ biki miniliaaso Epeke daka꞉la꞉paaso꞉e la꞉tiki pina꞉ hone wopu u halememe.

Ma꞉tiu 21:22

Ikana꞉ma꞉ ota꞉ hone tulaemeka꞉na꞉ta꞉ kota꞉ mo ika꞉ yeni pitolo honke alo alemeeki kone ota꞉ milimikie.

1 Desalonaika 5:17

Hoto paeyao make yeni pu hapa꞉peke.

Dioni 16:24

Amba꞉ make ame do make yaka bikina꞉ ala꞉ta꞉ ma꞉nda꞉ a꞉nda꞉ honke na lememe. Honke lemeka꞉na꞉ta꞉ milimikie. Kutupa make ika꞉ ta꞉na꞉ma꞉ homolo peleme ekita꞉ tumbulu bao halieke.

Maka 12:38

Ipikana꞉ma꞉ iki pa꞉ta꞉ pi walolo hata꞉ alota꞉ Mo wape pea wala꞉tiki pu haleme haliwekina꞉ hau wotu handeteke hapa꞉peke leekeme. Hokulupiki daumanu pambao pomu hata꞉ta꞉ makedina꞉ hatiki pita꞉la꞉ wanda꞉halima꞉ iki pa꞉ta꞉ pi la halena꞉ hone u halememe.

Ma꞉tiu 9:38

Koto ekina꞉ta꞉ mo e teke halima꞉ ipika꞉ ena꞉ ne napeke mea momba꞉laalo peleme haliweki ana꞉na꞉ tapaena꞉ ikana꞉ma꞉ ipiki pa꞉ta꞉ yeni pu hapa꞉peke leekeme.

Ma꞉tiu 23:13

Koto pi laa paeyeketa꞉ Yesuma꞉ alota꞉ Iki Lo Pi ula꞉eki walo haleme haliweki make Pa꞉tisi haliweki make iki paeyaona꞉ hoke yenki tieke ipuleke handolo ekina꞉ I̱ paala꞉e. Ikita꞉ hoke makeaaso yayapiki hau pu haleme haliwekie. Ikana꞉ma꞉ta꞉ mo hepenina꞉ Kilu Tombuao Hala꞉ eki pa꞉ta꞉ honda꞉ pamba꞉la꞉eki kiaaso hata꞉ta꞉ mo poluekema꞉ hone pa꞉la꞉ wanda꞉hali puaama꞉na꞉ ika꞉ leke popelekena꞉ kone mo honda꞉ pambolo peleme pota꞉ pa꞉ta꞉ pota꞉ kake katolao halememe.

Ma꞉tiu 23:6

Kutaa make mo haliwekina꞉ honema꞉ta꞉ ne pamba꞉tiki pimiki nate nina꞉ make yeni da pa꞉ta꞉manu pita꞉tiki pimiki nate nina꞉ make wanda꞉halima꞉ mo you haliwekina꞉ pita꞉peke sea manuna꞉ iki ombu mea pitatiki pina꞉yeke ta꞉na꞉ wopu homo halememe.

Ma꞉tiu 6:16

Ikana꞉ma꞉ nee pi a꞉nda꞉ wimika꞉na꞉ta꞉ kota꞉ mo ika꞉ puki pa꞉ta꞉ ula꞉ haumanu a꞉mbaaso hata꞉ mo makeaaso hau piteme haliweki ika꞉ hoke wenoko haseme tupa꞉ na hapa꞉peke. Mo haliwekima꞉ta꞉ wanda꞉halima꞉ handolo hata꞉ ikita꞉ nee pi ula꞉ some ya꞉ka꞉ta꞉me hone wina꞉ ika꞉ loke handeteke hala꞉ hau mina꞉pa꞉latiki pu halememe. I̱ma꞉ iki pa꞉ta꞉ ota꞉ pi alome. Koto haliwekima꞉ ika꞉ mulumeke hone wilimi aleta꞉ ame do hata꞉ mu paeyaasememe.

Ma꞉tiu 6:1

Koda꞉na꞉ pi miniki haleme wanda꞉halima꞉ ika꞉ tamba꞉ mina꞉la꞉ haumanu pea꞉pekeeki wanda꞉halima꞉ handena꞉ handaena꞉ tupa꞉ puluekema꞉ hone ota꞉ na wiki yopu kone pea꞉pa꞉peke. Pa ekipeke. Wanda꞉halima꞉ handena꞉yeke handaena꞉ hau pimika꞉na꞉ta꞉ kota꞉ mo naka꞉ hepeni hala꞉ Apa꞉ma꞉ kia꞉ka꞉na꞉ mulu peleme epeke yenkita꞉ homeke siki a꞉nda꞉ make ota꞉ na milimikie.

Ma꞉tiu 23:5

Ika꞉ pu haleme hau paeyaota꞉ pa wanda꞉halima꞉ handaena꞉ pu halememe. Ika꞉ you taado manda pokede nu dake petipekemanu wepu make kutupa mo kiki maketopa꞉ yaapona꞉ make homeke tupa꞉ kone pokede nu dakemanu wepiaata꞉ Koda꞉na꞉ pi tunkula ula꞉ ekimanu wape pea panko hopa꞉liao yamaata꞉ ta pomua꞉tiki piteme handa꞉e. Kutupa make ika꞉ dau tumiki kake nina꞉ta꞉ ota꞉ haka꞉ta꞉pao au laaseme pu honiki honiki make taa piteme handa꞉e.

Luku 6:24

Koto pa꞉la꞉pate aiyo ame do hamoko haaseme wanda꞉halio. Iki pa꞉ta꞉ta꞉ ka꞉nda꞉ tieke ipula꞉me. Ika꞉ epeke tupa꞉ hao pa꞉limi ekita꞉ ame homeke minelememe.