Dia꞉mesi 4:8 - Panake Pi La: Ula: Buka pita: Kine Pieke Buka

⁸ Ikana꞉ma꞉ Koda꞉ teke pa꞉ta꞉ a꞉pa haemeka꞉na꞉ta꞉ ipiki make iki teke pa꞉ta꞉ a꞉pa halieke. Hoke hau peleme wanda꞉halio ika꞉ kiki tanda꞉pa꞉pa꞉peke. Hone yaapo wilimi wanda꞉halio hone hokeeki ma꞉nda꞉ yoka꞉ mea bao hapa꞉peke.

Dia꞉mesi 4:8 Referans Kwoze

Hibulu 10:22

Koto pa꞉la꞉ ekima꞉ta꞉ nikana꞉ma꞉ nika꞉ puki pa꞉ta꞉ ota꞉ hau homeke miniki halomeke handa make Koda꞉ pa꞉ta꞉ ota꞉ hone tulaomeke handa make Ketisona꞉ wema꞉ mo nika꞉ hoke hone tekena꞉ tande laaleke halomeke handa make mo kila wiki ikalima꞉ nika꞉ loke tanda꞉paleke handa make koto haloma꞉ ekina꞉ta꞉ ota꞉ Koda꞉ teke pa꞉ta꞉ a꞉pa hamana꞉e.

1 Dioni 3:3

Pea꞉ epima꞉ Ketiso pa꞉ta꞉ dupiki hone puao haya꞉ka꞉na꞉ta꞉ kota꞉ koto somema꞉ mo Ketisota꞉ ala꞉ta꞉ ma꞉nda꞉ na ta̱lolo hata꞉ pa yako peaa hala꞉ tupa꞉ ipiki make ha̱i̱ peaama꞉na꞉ pa yako peatiki pu hala꞉me.

Hibulu 7:19

Koto pieke ekita꞉ kota꞉ mo Mosesina꞉ Lo Pi wiekeeki manuma꞉ta꞉ hau ma꞉nda꞉ tikitiki na yaeyekeme. Kutu pieke yeketa꞉ niki ipiki teke pa꞉ta꞉ epomono Koda꞉ma꞉ mo Lo Pi wiekeeki ota꞉ lombei piki panake pota꞉ ma꞉nda꞉ wiawayekeme.

2 Kotindi 7:1

Yaka pukipiki yankeke tonuo do la꞉ ula꞉ pi manuta꞉ niki pa꞉ta꞉ la꞉la꞉me. Koto ekina꞉ta꞉ mo nika꞉ loke puki yaapo ha̱i̱ peaapeke ekimanu pa꞉ta꞉ta꞉ yako pea hamana꞉e. Kutupa nika꞉ Koda꞉ pa꞉ta꞉ paala꞉ma꞉ homa꞉la꞉ hauma꞉ ota꞉ niki yako pea hamana꞉e.

1 Pida 3:21

Koto ikalita꞉ mo hande wetepena꞉ bapitaisi hau epolo piekeeki manda mieke ikalie. Do ame pu haleme bapitaisi hauma꞉ta꞉ pa ika꞉ lokena꞉ ha̱i̱ tanda꞉ pelemeeki dia꞉ya꞉la꞉pate ika꞉ epeke hone tekema꞉ Koda꞉ pa꞉ta꞉ pi la꞉ witolo hamena꞉ mo ikalima꞉ iki petolo hala꞉me. Do bapitaisi hauta꞉ mo Yesu Ketisona꞉ paa tiaeyeke ekima꞉ iki petolo hala꞉me.

Ma꞉tiu 12:33

Epeke kilikimanu ta la꞉la꞉ ekima꞉ta꞉ epeke ti hala꞉eki peneme yaasa꞉me. Pate hoke ti haya꞉ka꞉na꞉ta꞉ kota꞉ hoke kiliki kone talipikie. Ti paeyaona꞉ hala꞉ hauta꞉ ika꞉ kiliki a꞉ilia꞉ ekima꞉ peneme yaalieke.

1 Timodi 2:8

I̱ma꞉ Siosi paeyao pa꞉ta꞉ halima꞉ yeni pina꞉ hone pa꞉la꞉me. Hali epima꞉ ma꞉nda꞉ pa꞉ta꞉ mineke pankolo o kake neli pita꞉la꞉ hau na piki ota꞉ yako piki hone u paleke hala꞉ hali manuma꞉ mo siosina꞉ mombilimi pa꞉ta꞉ kiki a꞉meiyao yeni pina꞉e.

1 Pida 1:22

Koda꞉na꞉ ota꞉ pi opua pu haleme ekima꞉ta꞉ ika꞉ temoko yako pina꞉ lelememe. Ame ika꞉ Ketiso yankeke ota꞉ pukima꞉ homa halememe. Koto pelemepate ika꞉ puki paeyaoma꞉ pukima꞉ ota꞉ homa꞉ alualu pu hapa꞉peke.

Aposolo 15:9

Kutu pieke ekima꞉ ipikana꞉ma꞉ta꞉ niki Diu wanda꞉hali make iki Diendaili wanda꞉hali make ta꞉ta꞉ ta꞉ta꞉ pea na haloma꞉eki waleekeme. Ika꞉ hone tulaemeke ekina꞉ ipikana꞉ma꞉ ika꞉ hoke haumanu pa paeyaeyekeme.

Kini Pieke 18:23

Kutupa Eipoloha꞉ma꞉ma꞉ Tekehali handolo hata꞉ alota꞉ Nakana꞉ma꞉ta꞉ mo hoke hau pa꞉la꞉ tapake hoeyaaso hata꞉ta꞉ mo tikitiki piki tapake make ota꞉ mandakena꞉ hoeyalo pele ekina꞉ alepe.

Ma꞉tiu 15:2

Pa ekipeke mo naka꞉ hoki nane telieleme haliweki nika꞉ ateke meiyekena꞉ mana꞉ pimanu ekipeke na opitolo pitelemepe. Ika꞉ ne noluekema꞉ta꞉ titina꞉ amba꞉la mo nika꞉ pimanu ula꞉ tupa꞉ ika꞉ kiki na tandepo halememe lemekeme.

Ma꞉tiu 27:24

Pailedima꞉ ika꞉ hone topo pea꞉peke pota꞉ ma꞉nda꞉ na hande wieke ekima꞉ta꞉ pa a꞉nda꞉ pu lu alualu pia꞉pekeeki teke pa꞉ta꞉ yekeeki handaata꞉ ipikana꞉ma꞉ ikali meata꞉ ika꞉ leke popelekena꞉ ipika꞉ kiki tanda꞉pa bao hata꞉ alota꞉ Do somena꞉ homolo pa꞉la꞉ ekita꞉ I̱ma꞉ na handeteke haloma꞉ ika꞉ pitelememe leekeme.

Dia꞉mesi 3:17

Kutu pita꞉la꞉pateta꞉ oli ya nanema꞉ ipula꞉ hone epekeeki dupae. Titina꞉ amba꞉la kipabaake hone wita꞉la꞉ekie. Kutupa make puki lopa꞉niao pila꞉eki make yopu hala꞉eki make homu pea hala꞉eki make a꞉ta꞉ma꞉ wopu homolo hata꞉ epeke haumanu pita꞉la꞉eki make paeyao ya nanema꞉ ipula꞉pateta꞉ honditi pita꞉la꞉eki make yayapiki hau pita꞉la꞉eki make apa꞉tao na ipula꞉me.