Aposolo 3:25 - Panake Pi La: Ula: Buka pita: Kine Pieke Buka

²⁵ Mo potopede haliwekima꞉ Koda꞉ma꞉ la꞉ wieke pimanu la hale hale pimiki ekita꞉ ika꞉eki kone ula꞉me. Kutupa make Koda꞉ma꞉ ika꞉ apa꞉mei ameda ame̱le̱ pi la꞉ wieke ekita꞉ iki pa꞉ta꞉ make la꞉ ula꞉me. Koda꞉ma꞉ Eipoloha꞉ma꞉ pa꞉ta꞉ leeke tupa꞉ dupae. Naka꞉ hoki nane monduma꞉ monduma꞉ pilimi wanda꞉halima꞉ kenke wanda꞉hali paeyao I̱ma꞉ epeaalueke laa leekeme.

Aposolo 3:25 Referans Kwoze

Kini Pieke 22:18

Mo nakana꞉ma꞉ yaka pi opele ekina꞉ I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke leekeme.

Aposolo 2:39

Pa ekipeke mo hande Koda꞉ma꞉ pi la꞉ wieke ekita꞉ iki pa꞉ta꞉ make ika꞉ weki wandiki pa꞉ta꞉ make mo papate haleme wanda꞉hali pa꞉ta꞉ make pa mo Tekehalima꞉ ipiki pa꞉ta꞉ kone epena꞉ wi ala꞉ wanda꞉hali paeyao pa꞉ta꞉ta꞉ make ipikana꞉ma꞉ pi la꞉ wiekeme laa leekeme.

Ka꞉leisia 3:8

Baiboloma꞉ dupa la꞉ wiekeme Koda꞉ma꞉ mo hande Diendaili wanda꞉hali ika꞉ hone tulaleme ekina꞉ Koda꞉ ipiki ame̱le̱ epea halimikie laa la꞉ wiekeme. Kota꞉ mo Baiboloma꞉ Eipoloha꞉ma꞉ pa꞉ta꞉ dupiki pi seliapo la halolo alota꞉ Neke pa꞉ta꞉ yama꞉ta꞉ Koda꞉ma꞉ wanda꞉hali paeyao wamo pilieke leekeme. Mo koto leeke ekita꞉

Kini Pieke 12:3

Mo neke epealimi wanda꞉halita꞉ I̱ma꞉ epealo polopate. Mo neke pa꞉ta꞉ esihou pi lelimi wanda꞉halita꞉ kota꞉ I̱ma꞉ iki pa꞉ta꞉ esihou pi laalueke. Kutupa neke pa꞉ta꞉ yama꞉ta꞉ mo tutu ta꞉ta꞉ ta꞉ta꞉ paeyao epealueke leekeme.

Peneme Yaeyekeeki 7:9

Doeki hoki naneta꞉ hone pa mata꞉papeke tapake tieke handoa꞉me. Do wanda꞉halita꞉ ma꞉nda꞉ma꞉ yata꞉pea꞉peke tapake tupa꞉ dia꞉me. Mo wanda꞉halita꞉ tutu paeyao make tapake paeyao make kapomani ta꞉ta꞉ ta꞉ta꞉ma꞉ handeteke hala꞉ kenke ta꞉ta꞉ ta꞉ta꞉ make pi ta꞉ta꞉ leke tapake paeyao siki haememe. Ikana꞉ma꞉ta꞉ mo kini seana꞉ make mo Sipisipi Ma꞉na꞉ Ikikina꞉ puki tikitikina꞉ hakepiki dau yama hau palo miniki haememe.

Ka꞉leisia 3:16

Koda꞉ma꞉ make koto tupa꞉ kone Eipoloha꞉ma꞉ pa꞉ta꞉ make ipika꞉ hoki nane epolo pieke hali pa꞉ta꞉ make ipika꞉ pi la꞉ wita꞉la꞉eki manuma꞉ la꞉ wiekeme. Baiboloma꞉ hoki nane epolo pieke haliweki ala꞉ pina꞉ teketa꞉ haliweki eleke eleke laa na ala꞉pate pa hoki nane epolo pieke hali ala꞉ pina꞉ teketa꞉ hali homeke homeke la ala꞉me. Mo koto hali bikita꞉ Ketisoe.

Loma꞉ 4:13

Koda꞉ma꞉ta꞉ Eipoloha꞉ma꞉ pa꞉ta꞉ alota꞉ Do kenke paeyaota꞉ neke pa꞉ta꞉ make naka꞉ hoki nane halo peleme wanda꞉hali pa꞉ta꞉ make kulueke laa la꞉ witolo leekeme. Koda꞉ma꞉ do pi la꞉ wieke ekita꞉ Eipoloha꞉ma꞉ma꞉ hande Lo Pimanu opua pu hayeke ekina꞉ na leekeme. Eipoloha꞉ma꞉ta꞉ hone tulao hata꞉ Koda꞉ pa꞉ta꞉ tikitiki yao hayeke ekina꞉ leekeme.

Ka꞉leisia 3:29

Ikita꞉ Ketiso ipika꞉eki haemeka꞉na꞉ta꞉ kota꞉ ikita꞉ mo Eipoloha꞉ma꞉na꞉ hoki nane wanda꞉hali hata꞉ Koda꞉na꞉ kulueke laa pi la꞉ wiekeeki milimikie.

Kini Pieke 28:14

Ikita꞉ do kenkena꞉ ula꞉ na yata꞉pea꞉peke ya꞉la꞉ dokolo paeyaoma꞉ handilimikie. Ikita꞉ ika꞉ da kenketa꞉ do kenke nepoko paeyao pa꞉ta꞉ putupolo baalieke. I̱ma꞉ta꞉ neke pa꞉ta꞉ yama꞉ make naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ make tutu paeyao epealueke.

Kini Pieke 26:4

I̱ma꞉ta꞉ naka꞉ monduma꞉ monduma꞉ pilipi wekiwandikina꞉ wekiwandikita꞉ oli yana꞉ hala꞉ hombulanka꞉manu hala꞉ tupa꞉ haena꞉ kulueke. Kutupa iki pa꞉ta꞉ta꞉ do kenke paeyao halueke. I̱ma꞉ naka꞉ monduma꞉ monduma꞉ pilipi wekiwandikina꞉ wekiwandiki pa꞉ta꞉ yama꞉ta꞉ mo tutu paeyao sikita꞉ epeaasa꞉eki mina꞉ lolueke.

Kini Pieke 20:7

Koto ekina꞉ ameta꞉ mo wanda꞉ ipika꞉ haliki pa꞉ta꞉ paa hala꞉peke. Mo halita꞉ potopede hali halekena꞉ ipikana꞉ma꞉ nekena꞉ yeni peaya꞉ka꞉na꞉ta꞉ kota꞉ neke na homilipikie. Pate mo wanda꞉ pa na haleka꞉na꞉ta꞉ kota꞉ neke kinki pitoloma꞉ laa neke make naka꞉ wanda꞉hali make homilimikie leekeme.

Kini Pieke 17:19

Pate Koda꞉ma꞉ alota꞉ Dia꞉me. Naka꞉ wanda꞉ Setama꞉ naka꞉ weki mendiaeya꞉ka꞉na꞉ta꞉ ipika꞉ bikita꞉ Aisa꞉ke lelipikie. I̱ma꞉ta꞉ ipiki make ipika꞉ monduma꞉ monduma꞉ pilia꞉ wekiwandikina꞉ wekiwandiki ame̱le̱ make hoto paeyao yaka pi la꞉ witoloeki pa wia halumeke. Koto pi la꞉ witolo ekita꞉ ota꞉ na paeke pa u halo pa꞉la꞉ekie.

Peneme Yaeyekeeki 14:6

Kutupa enisolo ma꞉nda꞉ oli ya manda a̱e̱nolo hata꞉ do kenke wanda꞉hali paeyao pa꞉ta꞉ mo pa u hala꞉ Pi Seliapo laluekema꞉ pia꞉me. Mo wanda꞉halita꞉ tutu ta꞉ta꞉ ta꞉ta꞉ make tapake ta꞉ta꞉ ta꞉ta꞉ make kapomani eleke elekema꞉ handeteke hala꞉ kenke make paeyao pa꞉ta꞉ loluekema꞉ pieke handoa꞉me.

Peneme Yaeyekeeki 5:9

Ikana꞉ma꞉ panake emeli homeke alota꞉ Neketa꞉ mo pi ula꞉ buka mea tonkaake ale yamba꞉lapeketa꞉ ota꞉ ana꞉ pa꞉la꞉me. Pa ekipeke neketa꞉ limikime. Kutupa nakana꞉ma꞉ naka꞉ wema꞉ mo wanda꞉halita꞉ Koda꞉na꞉ wanda꞉hali haena꞉yeke hambeleme. Ikita꞉ tapake ta꞉ta꞉ ta꞉ta꞉ make pi ta꞉ta꞉ ta꞉ta꞉ make kapomani manuma꞉ handeteke hala꞉ da ta꞉ta꞉ ta꞉ta꞉ make tutu ta꞉ta꞉ ta꞉ta꞉ paeyao pa꞉ta꞉ hambeleme.

Loma꞉ 15:8

I̱ma꞉ iki pa꞉ta꞉ la kitolo ekita꞉ dupae. Ketisoma꞉ta꞉ Diu wanda꞉halina꞉ e pokalo a꞉pa꞉la꞉ ekita꞉ Koda꞉ma꞉ ipika꞉ la꞉ wieke pimanu ota꞉ yao hala꞉me laa la kuluekema꞉ pokalo epeekeme. Ketisoma꞉ta꞉ Koda꞉ma꞉ mo hande Diu wanda꞉halina꞉ apa꞉mei pa꞉ta꞉ la꞉ wieke pimanu yalo a꞉pata꞉

Aposolo 13:26

Eipoloha꞉ma꞉ tapake haliweki ya kametitio. Koda꞉ pa꞉ta꞉ panda꞉puniao yeni pu haleme Diendaili wanda꞉hali paeyao iki make Koda꞉ma꞉ do hande niki da꞉taapeke ya꞉la꞉ pi niki pa꞉ta꞉ epena꞉ la꞉la꞉me.

Luku 1:72

Kutupa nika꞉ amba꞉ titina꞉ haemeke haliweki pa꞉ta꞉ta꞉ Iki pa꞉ta꞉ a꞉ta꞉ma꞉ homolueke laa Yaka yako piki pi la꞉ ulueki make hone uluekee leekeme laata꞉

Kini Pieke 18:18

Ipika꞉ monduma꞉ monduma꞉ pilia꞉ wekiwandikina꞉ wekiwandikita꞉ honkopu wopu hake tutu tieke halieke. Kutupa make ipiki pa꞉ta꞉ yama꞉ta꞉ mo tutu paeyao epealueke.