ZAKHARIA 8:13 - Sura' Madatu

¹³ Susitu mangkakomi dadi kada tampak ropu dio lu mintu’ bangsa, e to Yehuda sia to Israel, la susi dukakomito la dadi pa’passakke, belanna Kukamaseangkomi kasalamaran; da mimataku’, pamatoto’i tu limammi.

ZAKHARIA 8:13 Referans Kwoze

ZAKHARIA 8:9

Inde sia tu kadanNa PUANGna mintu’ ma’dandan maritik, Nakua: Pamatoto’i tu limammi, e kamu, tu urrangii te kada iate sun dipudukna nabi allo iate, tu tuo tonna dioton tu parandangan banuanNa PUANGna mintu’ ma’dandan maritik, iamotu Banua kabusungan, la dibangun.

ZEFANYA 3:20

Attu iato la Kupasaekomi, iamotu attu la Kunii urrampunkomi. Belanna la Kupadadikomi misa’ sanga kalelean sia kadipudian dio lu mintu’ bangsa dao kuli’na padang, ke Kupopembalimi tu dalle’mi dio pentiromi, kadanNa PUANG.

PA’PUDIAN 72:17

Sangapaoi anna tontong sae lakona tu sanganna, ondongpi, ke den siapi tu allo, la maupa’ tu sanganna. Tete dio kalena anna marudindin tu mintu’ bangsa, sia la nasanga kumua rongko’ ia.

1 KORINTUS 16:13

Mareakomi, tontongkomi tumanan umposissarean kapatonganan, umpapiamuanekomi kalemi, sia mawatangkomi.

YEHEZKIEL 5:15

Nasusito la dadiko misa’ apa ditatta sia dibe’se, tu umpandan pa’pakilala sia misa’ apa napotiramban mintu’ bangsa untikuiko, ke Kuparampoimoko ukungan tete dio kasengkean sia kare’dekan ara’ sia peada’ masarrang. Akumo, PUANG, tu mangka ma’kada.

YEREMIA 29:18

Kuula’ pa’dang sia Kuparampoi karorian sia ra’ba biang tu tau iato mai sia la Kupadadi misa’ apa metakuran lako mintu’ kadatuan lan lino, sia apa nasa’bu’ tau, ke ma’tampak ropui sia apa megiangan sia apa nabellu’i tau sia kaditattan dio lu mintu’ bangsa, tu la Kunii unnula’i male tu tau iato mai.

HAGAI 2:19

Palan penaai tu mintu’ apa dolo na allo iate, iamotu allo ma’penduangpulo nna’pa’ bulan ma’pengkasera, randuk dio mai allo iato, tu dinii unnoton parandangan Banua kabusunganNa PUANG. Palan penaai:

DANIEL 9:11

Ondongpi mintu’na to Israel untengkaimo Sukaran alukMi sia memboko’mo, belanna tae’ naperangii tu gamaramMi. Iamoto anna dibarrakan lako kaleki tu tampak ropu, tu diarra’i sumpa, tu mangka disura’ lan Sukaran alukna Musa, taunNa Puang Matua, belanna kasalammokan lako Kalena.

YEREMIA 24:9

Kueloran tu tau iato mai napakario-rio sia nasanggang mintu’ kadatuan lan lino sia la dadi kaditattan sia dipoparumbasan sia kaditellean sia tampakan ropu dio lu mintu’ inan, tu la Kunii umpatisambo’i tu tau iato mai.

KADADIAN 26:4

Sia la Kupopemba’ka’ tu bati’mu susi bintoen dao langi’ sia la Kuba’gian bati’mu mintu’ tana iate; lan bati’mu mintu’ bangsa lan te lino la unnappa’ karongkosan.

YEREMIA 42:18

Belanna nakua kadanNa PUANGna mintu’ ma’dandan maritik, Kapenombanna to Israel: Susitu kasengkeangKu sia kare’dekanna ara’Ku tibarrakmo lako to lan Yerusalem, susi dukamoto tu kare’dekanna ara’Ku la tibarrak lako kalemi, ke malekomi lako Mesir, ammi dadi tampakan ropu sia to metakuran sia sapuan pala’ sia kaditattan sia tang la mitiromo te inan iate.

PA’PUDIAN 79:4

Napobe’seammokan sangtondokki, sia Napotule’-tuleran sia Napoparumbasanmokan bali lembangki.

YEHEZKIEL 37:11

Ma’kadaMi lako kaleku, Nakua: E ma’rupa tau, iate mintu’ buku iate, iamo mintu’ to Israel. Tonganna ma’kada tu tau iato mai nakua: Iatu mai bukungki marangkemo sia ka’tumo tu rannungki, upu’mo alloki.

PA’PUDIAN 44:16

Iatu siri’ku dio bang lindoku kiallo-kiallo, sia longko’ ungkabu’ lindoku.

PA’TOLE 28:37

La dadiko misa’ apa napomagiang tau, sia napoparumbasan sia napotellean mintu’ bangsa, tu tondokna, Nanii PUANG ussolangko lako.

GALATIA 3:14

Kumua anna rampo lako to kapere’ tu kamauparanna Abraham, tete dio Yesu Kristus, sia anta tarimai tu Penaa diallu’ diona kapatonganan.

ZAKHARIA 9:13

Belanna la Kue’teran Kaleku tu Yehuda susito pana, la Kupatorro dao pana tu Efraim, sia la Kusarrang tu anakmu, e Sion, sirari anakmu, e Yunani, sia la Kupadadiko misa’ padangna to lalong.

ZAKHARIA 1:19

Mekutanamo’ lako malaeka’, tu kusipa’kadan, kukua: Apara battuananna te? Ma’kadami lako kaleku nakua: Iamote tu tanduk umpatisambo’ Yehuda sia Israel sia Yerusalem.

BATING 4:15

Metamba tu tau lako: Lendu’mokomi! To maruttak! Lendu’mokomi, lendu’mokomi, da mikaka’i lako! La mallai tu tau iato mai, ondongpi la salamba salao; melo ke nakua tau dio lu mintu’ bangsa, kumua: Tae’mo nama’din torro inde te.

YEREMIA 44:22

Naurungan tang Naattamo PUANG untiroi tu iannato belanna kakadakeanna mintu’ penggaurammi sia belanna mintu’ penggauran megalliammi; iamoto na iatu tondokmi daun laurammo sia metakuran sia tampakan ropu, naurungan moi misa’ tau tae’mo umpa’tondokki, susite allo iate.

YEREMIA 44:12

La Kupisanni tu mintu’ to Yehuda torronapa tu mentingo la male lako tondok Mesir la mentiruran dio, sia la sanggang nasang dio tondok Mesir; iatu tau iato mai la tibambang nakande pa’dang sia nasanggang karorian; la to bitti’ la kapua la mate nakande pa’dang sia la dadi misa’ tampakan ropu sia apa metakuran sia sapuan pala’ sia kaditattan.

YEREMIA 33:24

Tae’raka mupalan penaai tu apa napokada bangsa iate, nakua: Iatu da’dua pa’rapuan tu mangka Napilei langsa’ PUANG, Natibemo, Nasayu tu taungKu, nasanga butung to tangiamo misa’ bangsa.

YEREMIA 26:6

manassa iate banua la Kupasusi Silo, sia kota iate la Kusanggang anna sa’bu’i mintu’ bangsa dao kuli’na padang ke ma’tampak ropui.

YEREMIA 25:18

iamotu Yerusalem sia mintu’ kota Yehuda sola mintu’ datunna sia arungna, la dipadaun lauammo, la disabu’i anna potirambanni tau, sia la natelle-telle sia la tampakan ropu, susite allo iate;

MIKHA 5:7

Sia iatu to torronapa Yakub la dio lu mintu’ to sangpetayanan sia la lan lu ba’tu pira-pira budanna bangsa susi misa’ singa dio lu olo’-olo’ lan pangala’, sia sangtini misa’ singa mangura dio lu tuntunan domba. Iake tamai inde to dio nadammak sia nase’bu’-se’bu, na moi misa’ tau tae’ urrampananni.

YESAYA 43:28

Iamoto angKu sallangi tu mintu’ pangulu inan maindan, angKu eloranni tu Yakub disabu’i butung pepayu sia dilo’bo-lo’bo tu Israel.

YEHEZKIEL 34:26

La Kupadadi kamauparan tu tau iato mai, ondongpi tu mintu’ apa untikui taneteKu, sia la Kupasaean uran ke attunnai; la dadi uran ma’palobo’.

HAGAI 2:5

Apa totemo, pabatta’i tu peanaammu, e Zerubabel, kadanNa PUANG, sia pabatta’i tu penaammu, e Yosua, anakna Yozadak, tominaa kapua, sia pabatta’i tu penaammi, e mintu’ to budanna tondok, kadanNa PUANG, sia mengkarang tarru’komi, belanna Kurondongkomi, kadanNa PUANGna mintu’ ma’dandan maritik,

ZAKHARIA 8:15

susi dukato te allo iate dennomo tanan penaangKu la umpogau’ melo lako Yerusalem sia lako to Yehuda; iamoto da mimataku’.

ZAKHARIA 14:11

La natorroi tau tu kota iato, sia tae’mo ukungan pasabu’i, sangadinna iatu Yerusalem la torro marampa’.

PA’TOLE 26:19

Iamoto la Napalayukko, ammu kapudian sia kalelean sia kamala’biran untongloi mintu’ bangsa, tu Nakombong Puang sia la dadiko misa’ bangsa maseroNa PUANG, Kapenombammu, susitu mangka Napokada.

ZEFANYA 3:16

Alo iato la ma’kada tu tau lako Yerusalem nakua: Da mumataku’, e Sion, da mupopa’elo’nai langga’ tu limammu.