ZAKHARIA 2:9 - Sura' Madatu

⁹ Nakua: Manassa la Kupakedo tu limangKu lako tau iato mai, anna pangrampai tu to mengkanorong lako kalena. Attu iato la mitandai, kumua mangkamo’ Nasua PUANGna mintu’ ma’dandan maritik.

ZAKHARIA 2:9 Referans Kwoze

YESAYA 19:16

Allo iato iatu to Mesir la sangtinti baine; la ma’parondo sia ungkataku’ lima tie’te’Na PUANGna mintu’ ma’dandan maritik, tu Nae’teran tau iato mai.

ZAKHARIA 6:15

Iatu to mambela la sae umbangunni tu Banua kabusunganNa PUANG, ammi tandai, kumua PUANGna mintu’ ma’dandan maritik ussuana’ lako kalemi. Iate iannate la dadi, ke miperangii sia mipalan penaai tu kadanNa PUANG, Kapenombammi.

ZAKHARIA 4:9

Mangkamo naoton Zerubabel te parandanganna te Banua iate, naia duka la ussundunni, ammi issanni kumua Nasuana’ PUANGna mintu’ ma’dandan maritik lako kalemi.

YEHEZKIEL 39:10

Naurunganni tae’mo anna lao unnala kayu tutungan lako padang, ba’tu unte’tek ranga’-ranga’ lan mai pangala’, belanna iatu pa’buno iato iamo la natutung. Susimoto tu tau iato mai la urrampa apanna tu tau mangka umpangrampai sia ullo’do’ apanna tu tau mangka umpanglo’do’i, kadanNa Puangta PUANG.

YESAYA 14:2

Iatu to Israel la nasolan ba’tu pira-pira bangsa, nasolan lako inanna, anna potaui to Israel tu tau iato mai dio padangna PUANG, la napokaunan la muane la baine anna rampai tu to mangka urrampai dolona sia anna posua-suanni tu to mangka ussua-suai.

YESAYA 11:15

La Nagatai PUANG tu tasik mengkokona Mesir sia la Naaak lima tu Salu iato anna marangke napobua’ anginNa, sia la Napopempitu tu salu iato, sia Napalingkai tau ma’sepatu.

YOHANES 16:4

Apa mintu’na te kupokada lako kalemi, dikua ianna lambi’i attunna ma’dinmo mikilalai, kumua mangkamo Kupokada lako kalemi susito. Mintu’nate iannate tae’pa Kupokadai lako kalemi tempon dio mai mulanna, belanna denPa’ misisolan.

YOHANES 13:19

Totemote Kupokadammokomi tu iannato su’ding tae’pi nadadi, ammi patonganni ke dadii, kumua Aku tonganmo.

ZAKHARIA 2:8

Belanna, inde sia tu kadanNa PUANGna mintu’ ma’dandan maritik, tu kamala’biranNa ussuana’, diona mintu’ bangsa, tu mangka umpangrampaikomi – belanna minda-minda tu urrumbukomi, iamo urrumbu mata taunNa –,

ZEFANYA 2:9

Iamoto, la lelukraka tuoKu, kadanNa PUANGna mintu’ ma’dandan maritik, Kapenombanna Israel, tonganna iatu Moab la dadi susi Sodom, sia iatu to Amon la susi Gomora, iamotu padang nanii a’da’ sia nanii pangkalian sia, sia padang lo’bang sae lakona. Iatu torronapa tu taungKu, la urrampai tu tau iato mai na iatu sesanna sangpetayanangKu la umpomana’i.

HABAKUK 2:17

Belanna iatu kamasa’garan mupogau’ dao Libanon la ungkabu’ko sia iatu kaussabuirammu olo’-olo’ la umpatirambanko, napobua’ rarana tolino tu tibollo sia kamasa’garan, tu diparampoan tondok, kota sia mintu’ pa’tondokanna.

HABAKUK 2:8

Belanna mangkamoko umpangrampai buda bangsa, ia toda tu torronapa bangsa iato la umpangrampaiko, tu belanna rarana tolino tu tibollo sia belanna kamasa’garan, tu diparampoan tondok, kota sia mintu’ pa’tondokanna.

YEREMIA 28:9

Iamoto, iake denni nabi ma’nubua’ diona kamarampasan, iake laloi tu pa’nubua’na, maneri payan kumua ia misa’ nabi, tu tonganna Nasua PUANG.

YEREMIA 27:7

Sia mintu’ bangsa la mengkaola lako kalena sia lako anakna sia lako ampona sae lako nalambi’na attunna tu tondok iato la natalo ba’tu pira-pira bangsa matoto’ sia datu kapua.

YESAYA 33:23

Mintu’ ulangmu tikkondo’mo, tae’mo napabantangi tu lentongna sia tae’mo naballa’i tu somba’na. Attu iato untaa-taa pangrampa sebo, moi to kupi’ urrampun duka pangrampa.

YESAYA 33:1

Upu’ allomu, e pa’kasanggang, tu tang disanggang; e to tang maruru’ tu tang diballean len; iake upu’moko ma’kasanggang, iko kalenamo la disanggang; iake upu’moko umpogau’ tang maruru’, iko kalenamo la diballean.

YESAYA 13:2

Osokki tu bate-bate dao buntu tang karerungan, pekapuai tu gamarammi metamba lako tau iato mai; popangayoi tu limammi, anna unnola dio to’ ba’bana to la’bi’.

YESAYA 10:32

Iate allo torropa dio Nob, naka’panan pebusuk tu buntunna anak dara Sion, tanetena Yerusalem.

YESAYA 48:16

Mengkareke’komi sola nasang lako Kaleku, ammi perangii te: Inang tae’ Kubuni tu apa Kupokada tempon dio mai; iatonna dadi to mai inang denMo’. Totemo Nasuana’ Puangta PUANG sola PenaanNa;

ZAKHARIA 2:11

Allo iato buda bangsa la mengkara’pa lako PUANG sia dadi taungKu. Sia la torroNa’ lan lu tangngamu. Attu iato la mutandai, kumua mangkamo’ Nasua PUANGna mintu’ ma’dandan maritik lako kalemu.

YESAYA 4:5

Attu iato la Napadadi PUANG tu saliu’ ke allona sia iake mabonginna la Napabu’tu tu rambu sola arrang api ma’laka-laka dao lu mintu’ tu apa mala’bi’ la den tu sambona.

YESAYA 12:6

Unnarrakkomi sia sumapukokomi, e pa’tondokan Sion, belanna iatu To maserona to Israel pasareongan illan tangngami.

YESAYA 26:1

Allo iato iatu nanian iate la napopenani tau lan tana Yehuda nakua: Den kami tu kota matoto’ki; kamakarimmanan Nabentenganni sia Natambakukuanni Puang.

YESAYA 33:21

Ondongpi inde to dio kamala’biranNa PUANG tu la urrondongki’. Iamotu inan nanii salu sia minanga kalua’; moi misa’ lopi dibosean tae’mo unnolai sia misa’ kappala’ tae’mo massombaran dio.

YESAYA 60:18

Tae’mo dirangi len tu kama’parukuan lan tondokmu, ba’tu kasanggangan sia kamasolangan lan lili’mu, sangadinna iatu benteng tembo’mu la mugente’ kasalamaran sia iatu babangammu Kama’pudian.

YESAYA 60:19

Iatu allo tae’mo mupoarrangi ke allo sia iatu bulan tae’mo nala umpadukkuangko arrangna; sangadinna PUANG la mupoarrang matontongan sia Kapenombammu mupomala’bi’.

YEREMIA 8:19

Perangiimi tu sarrona anakna baine taungku dio mai mintu’ tondok, kumua: Umbai tae’ PUANG dio Sion, umbai tae’ tu Datunna dio? – Ma’apari tu mai rapang-rapang dipodeatanna tau iato napa’dikki tu penaangKu, sia apa tang kebattuan dio mai padang tau.

YOËL 2:27

Attu iato la miissan kumua Akumo tu dio lu to Israel, sia Akumo tu Puang, Kapenombammi, tae’ senga’na; iatu taungKu tae’ lenmo na la dipakasiri’ sae lakona.

ZEFANYA 3:15

Napa’deimo PUANG tu kadiukungammu, Naputtaimo tu ualimmu. Iatu Datunna Israel, iamotu PUANG, lan lu tangngamu, tae’mo mula ungkataku’i tu kamandasan.

ZAKHARIA 9:15

PUANGna mintu’ ma’dandan maritik la urrerungi tu tau iato mai, naurunganni mangampello’, ondongpi nalullu’ tu batu pelobang; la mangiru’ tu tau iato mai, namareko napobua’ uai anggoro’, sia la ponno rara tu tau iato mai susi pindan pa’pi’pikan sia susi tetuk inan pemalaran.