ZAKHARIA 14:16 - Sura' Madatu

¹⁶ Mintu’ tu torronapa tu mintu’ bangsa, tu ullaoi Yerusalem, la male, ke taunoi menomba lako olona Datu, iamo tu PUANGna mintu’ ma’dandan maritik, sia la umpakaraya allo kapua pekalumban.

ZAKHARIA 14:16 Referans Kwoze

YESAYA 66:23

La dadi kumua, iake bulan ba’ruoi sia ke allo katorroanoi, mintu’ ma’rupa tolino la sae menomba dio oloKu, kadanNa PUANG.

YOËL 2:32

La dadi kumua minda-minda tu meongli’ ussa’bu’ sanganNa PUANG, iamo la dikarimmanni. Belanna dao buntu Sion sia dio Yerusalem la den katilendokan, susitu mangka Napokada PUANG; sia iatu naala bilanganna to tilendok, iamo la Natambai PUANG.

KADA OMBO’ LAKO RASULU’ YOHANES 19:16

Dio bayu lamba’Na sia dio pupunNa den misa’ sanga disura’ nakua: Datunna mintu’ datu sia Puangna mintu’ puang.

KADA OMBO’ LAKO RASULU’ YOHANES 11:13

Iatonna attu ia dukato saemi lino’ kapua, naurunganni mangsan taa sangpulona tu tondok iato; pitungsa’bu tau mate belanna lino’ iato, na iatu torronapa lendu’ mataku’na, anna pakala’bi’i tu Puang Matua dao suruga.

ROMA 11:26

Na susito la dipamakarimman nasang tu mintu’ to Israel, susitu disura’ nakua: Dio mai Sion la Nanii sae tu Pela’bak; Iamo la umpale mintu’ kakelokan dio mai Yakub.

ROMA 11:16

Iake maseroi tu bunga’ panglemun, ten dukato tu sangla’pa’na, sia iake maseroi tu uaka’na, ten dukato tu mai tangkena.

ROMA 11:5

Ten dukamoto te attu iate den siapa torrona situru’ tu pa’tonno’na pa’ka- masean.

PENGGAURANNA RASULU’ 15:17

dikua anna daka’ Puang tu to torropa, sia iatu mintu’ to kapere’ tu dininnamo ussa’bu’ sangangKu,

YOHANES 7:2

Anna mandappi’mo tu allo kapuana to Yahudi, tu allo kapua Pekalumban.

YOHANES 1:49

Nakuami Natanael mebali lako: O Rabi, Kamumo tu AnakNa Puang Matua! Kamumo tu Datunna to Israel!

LUKAS 19:38

nakua: Kurre sumanga’na tu Datu, sae umpotete sanganNa Puang; Kamarampasan dao suruga, Kamala’biran lan inan madona!

MALEAKHI 1:14

Tampak ropu duka lako tu to ma’pakena, ke denni misa’ patuoan laki lan tuntunanna, tu mangka nadandi lan pangallonanna, apa napennoloan tu misa’ patuoan tu den tattanna lako PUANG! Belanna Aku te, Datu pasareongan, kadanNa PUANGna mintu’ ma’dandan maritik, sia metakuran tu sangangKu dio lu mintu’ bangsa.

ZAKHARIA 9:7

La Kupatoyang tu rara lan mai sadangna sia iatu apa megi’giran lan mai alla’ isinna sia ia duka tu torronapa la Napotau Kapenombanta, naurunganni butung to misa’ pangulu suku lan Yehuda, na iatu to Ekron la susito Yebus.

HOSEA 12:9

Apa ma’kada tu Efraim nakua: Tonganna, sugi’mo’, na iatu kasugirangku daka’kumo; iatu mintu’ daka’ku, tae’ nadiappa’ tu kakadakean dio kaleku, tu disanga kasalan.

YEREMIA 51:57

Sia la Kupamalango tu mai arungna sia to matarru’na sia to marayanna sia to ma’parentana sia pa’baraninna, naurunganni tarru’ leppeng sae lakona sia tang pandiu len, kadanNa Datu, tu digente’ PUANGna mintu’ ma’dandan maritik.

YEREMIA 48:15

Sanggangmo tu Moab sia iatu mai tondokna sia mintu’ to mangura pa’tonno’na solo’mo la ditunu, kadanNa Datu, tu diganti PUANGna mintu’ ma’dandan maritik.

YEREMIA 46:18

La lelukraka tuoKu, kadanNa Datu, tu diganti PUANGna mintu’ ma’dandan maritik, kumua: Susitu buntu Tabor dio lu mintu’ buntu sia buntu Karmel dio randan tasik, susimo kasaeanna to.

YESAYA 6:5

Kukuami: Upu’ alloku, sumpu sumandakku, belanna aku te to maruttak puduk sia torrona’ sirau misa’ bangsa maruttak puduk, na nata’paimo matangku tu Datu, tu PUANGna mintu’ ma’dandan maritik.

EZRA 3:4

Napakaraya dukami tu pa’gauran pekalumban susitu mangka disura’, sia umpennoloan pemala’ ditunu pu’pu’ kiallo-kiallo pada tu dituntunna, sia pada tu dipamanassanna kiallo-kiallo.

2 OSSORANNA DATU 8:13

iamotu apa dipamanassa la dipemalaran keallo situru’ pepasanna Musa sia lan mintu’ allo katorroan sia dio mintu’ sombona bulan sia dio mintu’ attu pa’gauran dipamanassa pentallun lan sangtaun, iamotu: pa’gauran roti tang dirangii sia pa’gauran minggu, sia pa’gauran pekalumban.

PA’PUDIAN 66:4

Sielle’ tu mintu’ banne lino umpenombaiKomi, sia umpakendek pa’pudian Mati’, sia umpakendek pa’pudian umpakala’bi’ sangamMi. Sela

YESAYA 18:7

Attu iato la umpennoloan ba’tu pira-pira pamengan lako PUANGna mintu’ ma’dandan maritik tu bangsa kalando sia pandillak, misa’ bangsa dikataku’ tiku lao, misa’ bangsa masarrang sia patengko lullu’ sia iatu padangna naruak tangnga salu-napennoloan lako to’ inan nanii sanganNa PUANGna ma’dandan maritik, iamotu buntu Sion.

YESAYA 19:21

Anna umpa’petandan Kalena tu PUANG lako to Mesir, anna allo iato la natandai to Mesir tu PUANG; anna pennoloanni tau iato mai tu pemala’ pangrere’ sia kande dipemalaran sia la mangallonan lako PUANG, sia la napalesso’ tu pangallonanna.

YESAYA 27:13

Sia attu ia dukato, la den tu napiri tanduk la dipannoni, anna sae nasang tu tau iato mai, tu tisambo’ lako tana Asyur sia tu diula’i lako Mesir la sae sola nasangi tukku umpenombai PUANG dao buntu maindan dio Yerusalem.

MIKHA 4:2

Sia buda to sangpetayanan la ke’de’ male anna ma’kada nakua: Maikomi anta male langngan buntunNa Puang, langngan banuanNa Kapenombanna Yakub, anNa ada’iki’ diona mintu’ lalanNa sia anta olai tu mai lalanNa, belanna lan mai Sion la nanii bu’tu tu Sukaran aluk sia iatu kadanNa lan mai Yerusalem.

ZAKHARIA 14:9

Sia PUANG la dadi datu lan mintu’ lino; allo iato la misa’ri tu PUANG sia iatu sanganNa la misa’ dukari.