ZAKHARIA 14:10 - Sura' Madatu

¹⁰ Iatu mintu’ padang tiku lao la dadi susi Padang marante randuk dio mai Geba sae lako Rimon, rampe lo’na lu Yerusalem; iatu kota iato la dipamatande sia la tontong dio inanna, randuk dio mai babangan Benyamin sae lako inan babangan dolo, sae lako babangan Tetuk, sia randuk dio mai menara Hananeel sae lako pa’parran anggoro’ datu.

ZAKHARIA 14:10 Referans Kwoze

ZAKHARIA 12:6

Allo iato iatu mintu’ pangulu pa’rapuanna Yehuda la Kupasusi misa’ puaro lan lu alla’ kayu sia la Kupasusi misa’ sulo lan lu alla’ patuku; iamoto la napurai nakande tu mintu’ to sangpetayanan dio kananna sia dio kairinna tiku lao; apa iatu Yerusalem la tontong bendan dio inanna, iamotu dio Yerusalem.

YOSUA 15:32

Lebaot, Silhim, Ain na Rimon, mintu’ tu kota iato duangpulo ngkasera sola kampongna.

YEREMIA 37:13

Apa iatonna rampomo lako babangan Benyamin, denni misa’ kamandang to ma’kampa, disanga Yeria, anakna Selemya, anakna Hananya, untingkanni tu nabi Yeremia, nakua: Umbai la menta’pakomi lako to Kasdim!

YEREMIA 30:18

Nakua kadanNa PUANG: La Kupopembali tu a’ganna tendana Yakub sia la Kukaturu-turui tu inanna: Iatu kota iato la dibangun sule dao tanete daun lauanna sia iatu tongkonan layuk la bendan dio inanna siamo.

1 DATU 15:22

Napesuammi datu Asa unnarak mintu’ to Yehuda, moi misa’ tae’ tau torro; iatu batu sia kayu napake Baesa umbenteng Rama, nabaa nasang tau iato, na apa iamoto tu napake datu Asa umbenteng Geba lan lili’na Benyamin sia Mizpa.

ZAKHARIA 2:4

anna ma’kada lako tu malaeka’ senga’, nakua: Ma’dondoko male muma’kada lako tu to mangura, mukua: Iatu a’ganna Yerusalem la susi misa’ kota tang dibenteng, napobua’ kabudanna tau sia patuoan lan.

YEREMIA 38:7

Apa iatonna rangimi Ebed-Melekh, misa’ to Etiopia, to mase’ponna datu, tu lan tongkonan layukna datu, kumua narorro’mo tau iato mai tu Yeremia rokko bubun-attu iato unno’ko’ tu datu lan babangan Benyamin –,

NEHEMIA 3:1

Ta’kala ke’de’mi tu Elyasib, tominaa kapua, sola mintu’ siulu’na, iamotu mintu’ to minaa, anna bangunni tau iato mai sule tu babangan Domba. Napamaindanmi sia napalakoi ba’bana, napamaindanmi tau iato mai sisola duka tu menara Mea na menara Hananeel.

TO PARENGNGE’ 20:47

Apa annan ratu’ tu muane sepang mallai lako padang pangallaran, lako buntu batu Rimon, natorro dao buntu batu Rimon patang bulan.

TO PARENGNGE’ 20:45

Na iatu senga’na sepang namallai lako padang pangallaran lako buntu batu Rimon. Dio lu batatta lompo denpa dipatei limangsa’bu tu tau iato mai, anna male tu to Israel unnula’i sae lako Gideom, anna pateipi duangsa’bu.

AMOS 9:11

Allo iato la Kupabendan sule tu lantangna Daud, tu robokmo, sia la Kupasule tu rassakna, sia la Kupabendan sule tu ro’pokna; la Kubangun sule susi to dolona,

YESAYA 10:29

Tau iato mai unnola kumila’: Geba tanii ma’bongi; anna ma’parondo tu Rama; mallai duka tu pa’tondokan Gibea-Saul.

YESAYA 2:2

La dadi undinna, kumua iatu buntu nanii banuanNa PUANG, la bantang ten to buntu malangka’ untongloi mintu’ buntu, anna mintu’ bangsa lolong lako.

NEHEMIA 12:39

ullendu’i babangan Efraim, babangan Tua na babangan Bale sia ullendu’i menara Hananeel sia menara Mea sae lako babangan Domba; tadangmi tu tau iato mai dio babangan Tarungku.

2 OSSORANNA DATU 25:23

Iatu Yoas, datu Israel, untingkan Amazia, anakna Yoas, datu Yehuda, dio Bet-Semes, anna baai lako Yerusalem. Natuanni tu benteng tembo’ Yerusalem, randuk dio mai babangan Efraim sae lako Babangan-Tetuk, a’pa’ratu’ siku.

1 OSSORANNA DATU 6:77

Lako bati’ senga’napa Merari diben dio mai suku Zebulon: Rimono sola padang kariuanna na Tabor sola padang kariuanna;

1 OSSORANNA DATU 4:32

Sia iatu inan napa’tondokki iamotu Etam, Ain, Rimon, Tokhen na Asan, lima kota;

TO PARENGNGE’ 21:13

Mangkato nasuami mintu’ kasirampunan tu ba’tu pira-pira pesua lako to Benyamin, tu dao buntu batu Rimon, anna pokadanni kasitaman tu tau iato mai.

YOSUA 21:17

Sia dio mai suku Benyamin iamotu Gibeon sola padang kariuanna, Geba sola padang kariuanna,

2 DATU 14:13

Iatu Yoas, datu Israel, untingkan Amazia, anakna Yoas, datu Yehuda, dio Bet-Semes. Tarru’mi tu Yoas lako Yerusalem, natuanni tu rinding tembo’ Yerusalem, randuk dio mai babangan Efraim sae lako babangan Tetuk, a’pa’ ratu’ sikunna.

YEREMIA 20:2

nabambami Pasyhur tu nabi Yeremia anna sangkalai lan babangan Benyamin daona lu, dio banuanNa PUANG.

2 OSSORANNA DATU 26:9

Nabangunmi Uzia tu ba’tu pira-pira menara dio Yerusalem dio Babangan-Tetuk sia dio Babangan-Lombok sia dio Sulapa’, anna pematoto’i.

MIKHA 4:1

Sia la dadi, ke allo ma’katampakannai, kumua iatu buntu banuanNa PUANG la bantang butung tu buntu malangka’na mintu’ buntu, sia la layuk untongloi mintu’ tanete, anna mintu’ bangsa lolong sae lako kalena.

ZAKHARIA 8:3

Inde sia tu kadanNa PUANG Nakua: La suleNa’ lako Sion, angKu torro lan Yerusalem; iatu Yerusalem la disangai kota kamarurusan, na iatu buntunNa PUANGna mintu’ ma’dandan maritik, la diganti buntu kamaindanan.