ZAKHARIA 10:2 - Sura' Madatu

² Belanna iatu balo’ tau umpokada apa tae’ bua’na, iatu to pakita-kita untiro patiro mendeata kamorang-morang, unnulelean ba’tu pira-pira tindo ma’pakena, sia umpokada pa’pakatana tae’ gai’na. Iamoto nasalamba-salao lu lako lu dio bang mai tu tau iato mai susito tuntunan domba, tu lan kapussakan, belanna tae’ to mangkambi’na.

ZAKHARIA 10:2 Referans Kwoze

MATIUS 9:36

Iatonna tiroi tu to buda, tilaomi masseNa lako tau iato mai, belanna mauyu bangmo sia bo’yok susi domba tae’ to mangkambi’na.

HABAKUK 2:18

Apara gai’na tu rapang-rapang dipodeata dipa’, belanna to ma’pa’ unggaragai? Apara gai’na tu rapang-rapang dipodeata dipati’no’, iamotu misa’ panganda’ tang tongan, moi anna posande’ bangi to unggaragai tu panggaraga limanna? Tae’raka nadeata mamang tu nagaragai?

HOSEA 3:4

Belanna iatu to Israel la masai torro tang didatui, tang diarungi, tang memala’ sia tae’ batu dipodeatanna, tae’ epo’na ba’tu balo’ taunna.

YEHEZKIEL 34:5

Tisambo’-sambo’mi tu tau iato mai, belanna tae’ to mangkambi’na, sia napokande mintu’ olo’-olo’ dio lu padang, susimoto tu tau iato mai tisambo’-sambo’.

YEREMIA 27:9

Iamoto da miperangii tu mintu’ nabimmi sia to pakita-kitammi sia to mangimpimmi sia to pakita dalle’mi sia to balik matammi, tu ma’kada lako kalemi, kumua tae’ mila tontong mengkanorong lako datu Babel.

KADADIAN 31:19

Iatu Laban male toda ia ungku’ku’i bulu dombana; nabokomi Rahel tu balo’ taunna ambe’na.

YEHEZKIEL 34:8

La lelukraka tuoKu, kadanNa Puangta PUANG, belanna iatu dombaKu naporampan sia napokande mintu’ olo’-olo’ dio lu padang kataeranna to mangkambi’na – belanna iatu mai to mangkambi’ku tae’ napoinaai tu mai dombaKu; iatu mai to manglaa kalena manna nakambi’, apa iatu mai dombaKu tae’ nakambi’i –

MIKHA 2:12

Tonganna la Kurampunkomi sola nasang, e Yakub, ondongpi la Kupulung tu to Israel, torronapa. Iatu tau iato mai la Kurampun butung domba lan misa’ bontong sia sangtinti misa’ tuntunan lan lu padang kariuan. Inde to dio la mamak bang belanna kabudanna tau.

YEHEZKIEL 21:29

– iake marassanni tu tau untiroangko pakita-kita buttok sia umbiangangko kamo’rangan – la unta’pai barokona tu to tang mekaaluk, to bulituk, tu nalambi’mo allona, iamotu attu kadiukungan ma’katampakanna.

YEHEZKIEL 21:21

Belanna iatu datu Babel la bendan dio kasisarakan lalan, iamotu dio to’ pamulanna da’dua lalan, nanii ma’biangi; la narogan tu anak pana; la nakutanai tu balo’ tau, ia la ma’pepa’du.

BATING 2:14

Iatu nabimmu untiroangko patiro mendeata tu apa tae’ gai’na sia tae’ patunna, tae’ natuarasangko tu kakadakeammu la undampai tu dalle’mu, untiroangko patiro mendeata, tu tae’ gai’na sia ma’pakena bang.

YEREMIA 51:23

Sia ikomora angKu sanggang-sanggangi tu to manglaa sola domba ma’baanan na ikomora angKu sanggang-sanggangi tu to ma’pa’lak sola sapinna sangayoka sia ikomora angKu sanggang-sanggangi tu ba’tu pira-pira to maraa sia to ma’parenta.

YEREMIA 50:17

Iatu Israel butung to misa’ domba dipakasingkiran, tu naula’ ba’tu pira-pira singa. Pamulanna naampello’ datu Asyur, ma’katampakanna totemo iatu bukunna nale’to-le’to Nebukadnezar, datu Babel.

YEREMIA 37:19

Totemo umba siamira tu mintu’ nabimmi, tu ma’nubua’ lako kalemi, kumua: Tae’ nala ullaoikomi datu Babel sia iate tondok iate?

YEREMIA 29:8

Belanna nakua kadanNa PUANGna mintu’ ma’dandan maritik, Kapenombanna to Israel, kumua: Da napakenakomi mintu’ nabimmi tu misolan sia mintu’ to pakita-kitammi, sia da miperangii tu to mangimpimmi, tu misua mangimpi.

YEREMIA 28:15

Sia nakua duka nabi Yeremia lako nabi Hananya: Perangii, e Hananya, manassa tae’ nasuako PUANG, sangadinna iko napobannang te bangsa iate urrannuan apa tang tongan.

YEREMIA 23:17

Tontong bang tu tau iato mai ma’kada lako to untattaNa’ nakua: Iatu PUANG mangkamo ma’kada Nakua: La marampa’komi, sia ma’kada lako mintu’ to lolang unturu’ kamakarrasanna penaanna, nakua: Moi misa’ tae’ tu kadake la urrampoikomi.

YEREMIA 14:22

Denraka misa’ tu rapang-rapang dipodeata tu tae’ gai’na dio lu mintu’ bangsa ma’din umpasae uran? Ma’dinraka tu langi’ umpatibarrak uran sae? Tae’raka naKamu, o PUANG, Kapenombangki? Iamoto angki rannuangKomi, belanna Kamu umpadadii tu mintu’nate.

YEREMIA 14:13

Kukuami: A’a Puangta PUANG tonganna ma’kada tu mintu’ nabi lako tau iato mai, nakua: tae’ mila untiro pa’dang sia tae’ nala urrampoikomi karorian, sangadinna karapasan tontong la Kukamaseangkomi lan inan iate.

YEREMIA 10:8

Iatu tau iato mai baga sia bebe’, belanna tae’ naangga’i tu pangadaran iato, kayu bangsia ia to.

YEREMIA 8:11

Iatu bangkena anakna baine taungKu samaraa-raanna nadampi, nakua: Marampa’, marampa’! Apa tae’ tu kamarampasan dio.

YEREMIA 6:14

Iatu bangkena taungKu samaraa-raanna nadampi, nakua: Marampa’-marampa’! Apa tae’ tu kamarampasan dio!

YESAYA 46:5

Minda tu la mipasangtintianNa’ sia mipasanglindo susingKu, minda tu la mipasangtende’ garagangKu, Kuurunganni sangrupa?

YESAYA 44:9

Iatu mai to unggaragai rapang-rapang dipodeata, tae’ nasang gai’na sia iatu mai panggaraganna nakamassengi tae’ bua’na: iatu mintu’nato napotanda sa’bi, kumua moi misa’ tae’ natiroi sia moi misa’ tae’ natandai, naurunganni kasirisan tu tau iato.

AYUB 21:34

A’a, matumbai mipakatanana’ kada tang kebattuan, sia iatu pebalimmi pa’pakena manna tu lisa’na!

AYUB 13:4

Apa kamu to untannun kabuttokan, sia kamu sola nasang to ma’dampi tang tongan.

1 DATU 22:17

Nakuami tu Mikha: Kutiromo tu mintu’ to Israel sisarak-sarak dao lu tanete butung to domba tae’ to mangkambi’na; anna ma’kada tu PUANG, nakua: Iate mai tau tae’mo puangna, da’ito anna pantan sule marampa’ lako banuanna.

TO PARENGNGE’ 18:14

Ma’kadami sola limai tu to mangkamo male usserre’i lili’na Lais lako to nasangsukuan nakua: Miissan siaraka kumua lan te banua iate den misa’ epo’ sia balo’ tau sia rapang-rapang dipasisumbung pa’pa’ na pa’pati’no’? Totemo la miissan tu apa sipatu la mipogau’.

KADIBILANGAN 27:17

tu lu tama lu lan mai dio tingayona tau iato mai sia iatu ussolanni tassu’ sia ussolanni sule tu tau iato, kumua da nasusi to domba tae’ panglaana tu kasirampunanNa PUANG.

MARKUS 6:34

Iatonna mengkalao Yesu dao mai lembang, Nakitami tu tau lendu’ budanna tilaomi massena lako tinde tau, belanna ia tinde tau sola nasangi butung domba tae’ panglaana, Naparandukmi unnada’i buda pangadaran tu tau iato mai.

YEREMIA 23:32

Manassa Aku la ullaoi tu mai pa’nubua’ tu umpokada pangimpi tang tongan, kadanNa PUANG, tu naulelean tau iato mai la umpapusa taungKu tete dio kada tang tonganna sia passedena; tae’ra Kusuai sia tae’ Kupasanni tu tau iato mai; iatu tau iato mai moi misa’ tae’ gai’na lako bangsa iate, kadanNa PUANG.

ZAKHARIA 11:17

Upu’ allona tu to mangkambi’ tae’ gai’na, tu umpopa’elo’na mintu’ dombana. Narampoimira pa’dang tu takia’na sia iatu mata kananna! La kope tu takia’na, anna maraun tu mata kananna.

PA’TOLE 13:2

anna dadi tu tanda kalle-kallean ba’tu tanda mangnga iato, tu mangkako napokadan, nakua: la taturu’mo tu kapenomban senga’, tu tae’pa mutandai, anta penombaimi –

YESAYA 41:29

Tau iato mai susi bang to apa tae’, sia mintu’ penggauranna tang kebattuan; mintu’ rapang-rapang dipodeata dipati’no’ angin bangri sia tae’ gai’na.

YESAYA 44:25

Akumo tu undampa tanda-tandana to untannun kamo’rangan sia Aku dukamo tu umpatolle mintu’ to pakita-kita; mintu’ to paissan Kupamaling sia iatu kapaissananna baga.

YEREMIA 27:10

Belanna tau iato mai, ma’nubua’ tang tongan lako kalemi, miurunganni la diali’ mambela dio mai padangmi sia la Kuula’ikomi, ammi sanggang.

YEREMIA 27:14

Iamoto da miperangii tu kadanna mintu’ nabi, tu ma’kada lako kalemi, kumua: Tae’ mila tontong umpengkaolai datu Babel, belanna ma’nubua’ tang tongan tu tau iato mai lako kalemi.