ZAKHARIA 1:4 - Sura' Madatu

⁴ Da misusi nene’ to dolomi, tu nanii mintu’ nabi dolona mangka ma’kada nakua: Inde sia tu kadanNa PUANGna mintu’ ma’dandan maritik, Nakua: Mengkatoba’komi dio mai kedo kadakemi sia penggauran kadakemi, apa tae’ naperangii tau iato mai sia tae’ nadampangNa’, kadanNa PUANG.

ZAKHARIA 1:4 Referans Kwoze

PA’PUDIAN 78:8

Sia da nasusi nene’ to dolona tu tau iato mai, iamotu misa’ osso’ matoro sia battuk, iamotu misa’ osso’ tang ma’to’ tu penaanna, sia tae’ anna la’ka’ lako Puang Matua tu penaanna.

YEHEZKIEL 33:11

Ma’kadako lako tau iato mai kumua: La lelukraka tuoKu, kadanNa Puangta PUANG, tae’ naalai penaangKu tu kamateanna to tang mekaaluk, sangadinna mandu naala penaangKu, ke tibalikki tu to tang mekaaluk dio mai lalanna, anna tuo. Tibalikkomi, tibalikkomi dio mai lalan kadakemi. Belanna ma’apari ammi la matera, e to Israel?

YEREMIA 35:15

Sia Kusua lako kalemi tu mintu’ taungKu, iamotu mintu’ nabi ke makale’ sia ke karoen umpokadai, kumua: Pada la mengkatoba’komi dio mai mintu’ lalan kadakemi sia pemeloi tu mintu’ penggaurammi sia damo mituru’ kapenomban senga’ la umpenombai; iake susito la tontongkomi lan tondok, tu Kukamaseangkomi sia nene’ to dolomi. Apa tae’ duka mitananni talinga sia tae’ miperangiiNa’.

ZAKHARIA 1:3

apa pokadai lako tau iato mai, kumua: Inde sia tu kadanNa PUANGna mintu’ ma’dandan maritik, Nakua: Mengkatoba’komi lako Kaleku, kadanNa PUANGna mintu’ ma’dandan maritik, angKu sule lako kalemi, kadanNa PUANGna mintu’ ma’dandan maritik.

1 PETRUS 1:18

belanna miissan kumua dila’bakmokomi dio mai gau’ tang kebattuammi, tu misiosso’i dio mai nene’ to dolomi, tangia apa la sanggang dila’bakangkomi, susinna salaka ba’tu bulaan,

PENGGAURANNA RASULU’ 26:20

sangadinna kupa’peissanan dolo, nala lako to dio Damsyik, nala dio Yerusalem sia dio mintu’ tana Yehuda, susi duka lako to kapere’, kumua anna mengkatoba’ sia sule lako Puang Matua anna umpogau’ penggauran sitinaya katobaran.

PENGGAURANNA RASULU’ 3:19

Iamoto menassankomi sia mengkatoba’ anna dibasei tu kasalammi sia kumua anna den tu attu kamanamanan dio mai oloNa Puang,

MIKHA 2:6

Da mima’nubua’, nakua tau iato mai ma’nubua’ ungkuanni: tae’ nama’din tau ma’nubua’ diona apa iato. Tae’ bang upu’na tu kada ma’ta’tan.

AMOS 5:24

Sangadinna iatu salunna la tikalulun-lulun susi uai sia iatu kamaloloan susi salu’-salu’ tontong lolong.

HOSEA 14:1

Iatu Samaria la umpassanni tu salana, belanna pabali-balimo lako Kapenombanna. La tibambang tu tau iato mai nakande pa’dang sia la dipessambakan tu mai anak bitti’na sia iatu mai baine ma’tambukna la ditesse tu pa’tambukanna.

YEREMIA 44:16

Iatu kada mipokada lako kaleki tete dio sanganNa PUANG, tae’ kila umperangii.

YEREMIA 26:5

sia tae’ miperangii kadanNa taungKu iamotu mai nabi tu Kusua lako kalemi, ke makale’ sia ke karoen, natae’ miperangii,

YEREMIA 18:11

Totemo pokadai te lako mintu’ to Yehuda sia lako mintu’ to lan Yerusalem, kumua: Inde sia tu kadanNa PUANG Nakua: Manassa Kuparandanmo tu kasanggangan lako kalemi sia Kutangnga’mo tu la miposanggangna; iamoto pada mengkatoba’komi dio mai lalan kadakemi sia pemeloi tu kedomi sia penggaurammi.

YEREMIA 3:12

Malemoko, petambanni te kada iate rekke ulunna salu, kumua: La mengkatoba’ko, e Israel, to sorong boko’, kadanNa PUANG, da angKu patiroangko lindo sengke, belanna maturu-turuNa’, kadanNa PUANG, sia tae’ angKu la unnannai tu kare’dekangKu tontong sae lakona.

YESAYA 31:6

Mengkatoba’komi lako Kalena, tu mambela lalanmo nanii to Israel sorong boko’.

NEHEMIA 9:30

Masai allomoKomi kalando pesuka’ lako tau iato mai sia Miada’i tete dio PenaamMi nalopian nabimMi, apa tae’ natananni talinga tu dionato. Attu iato Misorongmi tu tau iato mai tama limanna ba’tu pira-pira bangsa dio lu tondok iato.

NEHEMIA 9:26

Apa iatu tau iato mai pabali-bali sia naeaKomi sia natibe lako boko’na tu sukaran alukMi sia napatei tu mai nabimMi, tu unnada’i la umpasulei tu tau iato mai lako Kalemi, sia umpogau’ apa tarru’ megi’giran.

NEHEMIA 9:16

Apa iatu kedona tau iato mai, iamotu nene’ to doloki matampo sia umpabattuk penaanna sia manoka umperangii tu pepasanMi.

EZRA 9:7

Randuk dio mai linona nene’ todoloki sae lako allo iate tonangkan lan sala kapua sia belanna kakadakeangki, angki disorong la kami la mintu’ datungki la mintu’ tominaangki tama kuasanna datunna tondok iato mai, la nakande bassi mataran sia la dipali’ sia la dipangrampai sia la ditoding siri’ susite totemo.

2 OSSORANNA DATU 34:21

Malekomi umpekutanan timbanganNa PUANG, anNa pamanassai lako kaleku sia lako tu mai mintu’ to torropa dio lu Israel sia Yehuda tu diona mintu’ kada lan te sura’ dikabu’tui, belanna mandu tu kare’dekanna ara’Na PUANG, tu Nabarrakan lako kaleta, belanna tae’ nakaritutui nene’ to dolota tu kadanNa PUANG sia tae’ napogau’i susitu disura’ lan sura’ iate.

2 OSSORANNA DATU 30:7

Damo misusitu mintu’ nene’ to dolomi sia siulu’mi, tu tang maruru’ lako PUANG, Kapenombanna nene’ to dolona; iamoto Naeloranni tu tau iato mai dadi apa megiangan, susitu mitiro.

YEREMIA 4:1

Iake la mengkatoba’ko e Israel, kadanNa PUANG, ma’dinko sule lako Kaleku sia ia ke mutibei tu apa megallian dio mai pentiroKu, manassa tae’mo mula mallai,

YEREMIA 23:22

Belanna iakenna la ma’dioren tu tau iato mai lan kombongangKu, manassa napa’perangian tu kadangKu lako taungKu sia napatibalik dio mai lalan salana sia dio mai penggauran kadakena.

YEHEZKIEL 20:18

Ma’kadaMo’ lako mintu’ anakna tau iato mai lan padang pangallaran, Kukua: Da mituru’i tu apa napondok nene’ to dolomi, da mikaritutui tu atoranna sia da miparuttakki rapang-rapang dipodeatanna tu kalemi.

YEHEZKIEL 33:4

iake denni tau urrangi tu oni napiri tanduk, apa manoka dipakilala, narampo tu pa’dang umpisanni, manassa iatu rarana la sule langngan ulunna.

ZAKHARIA 7:7

Tang susi dukaraka to tu diona mintu’ kadanNa PUANG tu Napa’peissanan nalopian mintu’ nabi dolona, tonna torroipi tau tu Yerusalem sola mintu’ kota untikui sia tonna rapa’pa sia tonna torroipi tau tu padang rampe Lo’na lu sia Padang Merrantena? –

2 OSSORANNA DATU 30:6

Malemi tu pebaa sura’ malinta’ umbaa sura’na datu sia mintu’ pangulunna umpasilamban-lamban Israel sia Yehuda sia ma’kada susi pepasanna datu nakua: E kamu mintu’ to Israel, tibalikmokomi sule lako PUANG. Kapenombanna Abraham, Ishak, sia Israel, anNa tibalik duka sule lako to torrona siapa, tu tilendok dio mai kuasanna to Asyur.

YEREMIA 3:14

La mengkatoba’komi, e mintu’ anak pabali-bali, kadanNa PUANG, belanna Akumo tu Puangmi, sia Akumo la unnalakomi simisa’ lan mai misa’ kota, nasida’dua, ke sangpa’rapuanoi angKu solangkomi lako Sion.

YEREMIA 25:8

Iamoto, nakua kadanNa PUANGna mintu’ ma’dandan maritik: Belanna tae’ miperangii tu mintu’ kadangKu,

YEHEZKIEL 14:6

Iamoto pokadanni to Israel, kumua: Inde sia tu kadanNa Puangta PUANG Nakua: Mengkatoba’komi sia tibalikkomi dio mai mintu’ rapang-rapang dipodeatammi sia toyangkomi dio mai tu mintu’ apa megalliammi.

DANIEL 9:6

Sia tae’ kiperangii tu mai taumMi, iamotu mai nabi, tu ma’kada tete dio sangamMi lako mintu’ datungki, mintu’ arungki, mintu’ nene’ to doloki sia lako mintu’ tau lan tondok.