YOHANES 15:1 - Sura' Madatu

¹ Akumote tu oto’ anggoro’ tongan, sia Ambe’Ku tu To ungkaduttu’i.

YOHANES 15:1 Referans Kwoze

YEREMIA 2:21

Tang mangkarokoka Kutanan susi garonto’ anggoro’ pa’tonno’, susi banne tang karauan; ma’patumbai ammu dadi tangke tang membuanna garonto’ anggoro’ pangala’ lako Kaleku!

1 KORINTUS 3:9

Belanna kami tu Nasolan Puang Matua mengkarang, anna kamu tu pa’lak sia pa’bangunNa Puang Matua.

YESAYA 60:21

Iatu taummu la malambu’ sola nasang sia la umpomana’i te padang iate sae lakona; iamotu misa’ taruk tu Kutanan kalena, misa’ pengkarang limangKu, dikua anna pakala’bi’Na’.

YESAYA 4:2

Allo ia dukato iatu apa Napopentaruk PUANG la napobelo sia napomala’bi’ tau, sia iatu bura padang la napomaballo sia la napokassa’ maramba’ to Israel tilendokmo.

YOHANES 6:55

Belanna iatu kaleKu iamo ia tonganna kande, sia iatu raraKu iamo ia tonganna tu mintu’na diiru’na.

YEREMIA 12:10

Buda tu to mangkambi’ ussanggang pa’lak anggoro’Ku sia ullunggenak pa’lakKu, sia umpopempadang aak pa’lak balloKu,

1 YOHANES 2:8

Apa kusurasan dukakomi parenta ba’ru, iamotu apa tongan diona Kristus sia diona kamu, belanna iatu malillin lendu’mo sia iatu manassana masiang parrangmo.

MARKUS 12:1

Naparandukmi Yesu ma’kada lako tinde tau unnala pa’pasusian Nakua: Den misa’ tau mantanan anggoro’ lan misa’ pa’lak, narompoi tiku lao, sia nagaraga tu pa’parran anggoro’ sia napabendan tu barung malangka’ misa’, napa’petesananni lako to ma’tesan nake’de’ lako tondok senga’.

MATIUS 21:33

Perangiimi tu pa’pasusian senga’ misa’: Den misa’ to makaka mantanan anggoro’, narompoi tiku lao, nabo’bokki tu pa’parran anggoro’, sia napabendan tu barung malangka’ misa’, napa’petesananni lako to ma’tesan, nake’de’ lako tondok senga’.

HOSEA 10:1

Iatu Israel misa’ garonto’ anggoro’ loboran; satarri’-tarri’na tu buanna, sanarangngan-rangnganninna tu inan pemalaranna, samelo-melona tu padangna, sanaballo-balloinna tu batu dipodeata.

YOHANES 6:32

Nakuami Yesu ungkuanni tinde tau: Tonganna tongan Kukua mati’: Tangia Musa tu mangka umbenkomi tu roti dao mai suruga, sangadinna Ambe’Kuri tu umpa’kamaseanni lako kalemi tu roti tongan dao mai suruga.

LUKAS 13:6

Napokadami tu pa’pasusian iate, Nakua: Den misa’ tu tau nanii ara sangto’ lan pa’lak anggoro’na; saemi la unnalai buanna, apa moi misa’ tae’ duka naappa’ dio.

MATIUS 20:1

Belanna iatu Parenta Suruga susi to makaka, tu tae’pa bongi nasun la urra’ta’ sarona tu to la mengkarang lan pa’lak anggoro’na.

PA’TENDENG BALLO 7:12

La melambi’ki’ male lako pa’lak anggoro’, la untiroi, ba’tu la mentaruk siai tu garonto’ anggoro’, sia ba’tu la tiballa’ siai tu ta’binna, sia ba’tu la menta’bi siai tu dalima. Indemo to dio la kunii umpatiroangkomi tu mali’ku.

ZAKHARIA 3:8

Ma’perangiko, Yosua, tominaa kapua, la iko la mintu’ solamu tu unno’ko dio tingayomu – belanna iatu tau iato mai iamo muane dipotanda kalle-kallean – tonganna la Kupasae tu taungKu, iamo tu Taruk.

YOHANES 1:9

Iatu manassana arrang tu unnarrang mintu’ tau, mane sae tama lino.

YOHANES 1:17

Belanna napa’benganmo Musa tu Sukaran aluk, apa iatu kamaturu-turuan sia kamanapparan Napaombo’ Yesu Kristus.

YESAYA 61:3

La umpapatui mintu’ to Sion tu nalambi’ rosso inaa, anna diben passapu maramba’ la dipasondana au sia minna’ kasendean la dipasondana ma’pote dibolong, pakean pa’tendeng la dipasondana penaa si’pi’. Anna disangai tu tau iato mai: tarpin kamaloloan, tanananNa PUANG, dikua anna pakala’bi’I.

YEHEZKIEL 19:10

Iatu indo’mu, lan tu attu munii menta’bi butungi to misa’ garonto’ anggoro’, tu ditanan dio randan uai, tu membua sia mentangke-tangke, belanna buda tongan uai.

MATIUS 15:13

Mebalimi Nakua: Umba-umba tu tananan, tu tang Natanan Ambe’Ku dao suruga, la dilampi’i.

YOHANES 15:2

Iatu mai tang membuanna tu tangkeKu Nata’takki; sia iatu mai membuanna Naseroi, kumua nasatarri’-tarri’na buanna.

ROMA 11:17

Apa iake le’toi ba’tu pirang-pirang tangke, anna iko tu saitun pangala’, dipopengkale’pe’ tama, ammu pada unnalai lompona tu uaka’ to’ saitun,