YEHEZKIEL 21:3 - Sura' Madatu

³ sia ma’kadako lako tondok Israel, kumua: Inde sia tu kadanNa PUANG: Manassa la Kulaoiko! La Kunonok tu pa’dangKu sia la Kusabu’i tu to malambu’ sia to tang mekaaluk dio lu kalemu.

YEHEZKIEL 21:3 Referans Kwoze

YEREMIA 21:13

Manassa Aku la unnukungko e pa’tondokan diong lombok, e buntu batu diong padang lappa’, kadanNa PUANG, e kamu tu ma’kada kumua: Mindara tu la solo’ umpellambi’ikan, mindara tu la tama to’ pembuniangki?

AYUB 9:22

Mintu’na pada bangsia, iamoto kuma’kada, kukua: Pada bangsia to tang sala sia to sala Nasabu’i Puang.

NAHUM 3:5

Manassa la Kulaoiko! kadanNa PUANGna mintu’ ma’dandan maritik, la Kupoli’ tu tampak dodomu sae langngan lindomu sia la Kupasombo tu kama’kambelangammu lako mintu’ bangsa sia kasirisammu lako mintu’ kadatuan.

NAHUM 2:13

Manassa la Kulaoiko!, kadanNa PUANGna mintu’ ma’dandan maritik, la Kuballa nasang tu karetamu namerambu; iatu mintu’ singa mangurammu la nakande pa’dang, sia iatu pangrampamu la Kupisanni dao mai kuli’na padang, sia iatu gamaranna mintu’ sumbungan pudukmu tae’mo nala dirangi len.

YEHEZKIEL 5:8

iamoto inde sia tu kadanNa Puangta PUANG, Nakua: Manassa, Aku la umparampoiko ukungan, manassa Aku! Aku la ma’paolai salu lan lu tangngamu dio pentirona mintu’ bangsa.

ZAKHARIA 13:7

E pa’dang tinonokko, ta’pai tu to mangkambi’Ku ta’pai tu muane marengke’Ku, kadanNa PUANGna mintu’ ma’dandan maritik; ba’tai tu to mangkambi’, naurunganni sisarak-sarak tu domba; sia la Kubalik tu limangKu unta’pai tu bitti’na.

ZEFANYA 2:12

Susi dukato tu kamu, e to Etiopia, la natarru’komi pa’dangKu.

YEHEZKIEL 26:3

Iamoto inde sia tu kadanNa Puangta PUANG Nakua: Manassa Aku la ullaoiko, e Tirus! Buda bangsa Kurussun ullaoiko, susitu tasik umpatikalulun bombangna.

YEHEZKIEL 21:19

Na iko, e ma’rupa tau, sura’i tu da’dua lalan, ba’tu umbanna ma’din nannii sae pa’dangna datu Babel; misa’ri tondok nanii tassu’ sola duai, palakoi pedullu lalan; padioi to’ pamulanna lalan lu lako simisa’ kota;

YEHEZKIEL 14:21

Apa inde sia tu kadanNa Puangta PUANG Nakua: Moi angKu patamai Yerusalem te a’pa ukungan masarrang, iamotu pa’dang, karorian, olo’-olo’ masuru na ra’ba biang la ussabu’i tolino sia olo’-olo’ lan mai,

YEHEZKIEL 14:17

Ba’tu iake moronganna Kuparampoi pa’dang tu tondok, angKu ma’kada kumua: E pa’dang pasilamban-lambanni tu tondok, sia iake Kusabu’i lan mai tu tolino sia olo’-olo’,

YEHEZKIEL 5:12

Sangtaa tallummi la mate nabaa ra’ba biang sia la narabunni karorian dio lu tangngami; na sangtaa tallummi la songka nakande pa’dang; na sangtaa tallummi pole’o la Kuambo’ lako mintu’ matanna angin sia la Kunonok tu pa’dang dio boko’na tau iato mai.

YEREMIA 51:25

Tonganna, la Kuukungko, e buntu, ma’kasanggang, tu ussanggang mintu’ lino, kadanNa PUANG, sia la Kuangka’ tu limangKu unta’paiko sia ullolinko dao mai buntu batu, angKu padadiko buntu pura nalalle api.

YEREMIA 51:20

Ikomo tu pepa’tongKu sia pa’buno kapararian; na ikomora angKu nisak-nisakki tu ba’tu pira-pira bangsa sia Kusabu’i tu batu pira-pira kadatuan.

YEREMIA 50:31

Tonganna, la Kuukungko, e Kamatampoan, kadanNa PUANG, PUANGna mintu’ ma’dandan maritik, belanna saemo tu allomu, sia attu Kunii unnukungko.

YESAYA 34:5

Belanna malangomo tu la’bo’Ku lan suruga; tiromi la songlo’mo rokko Edom sia la unnukung misa’ bangsa tu Kupamanassamo la disabu’i butung pepayu.

YESAYA 10:5

Upu’ allona Asyur, tu pebamba sengkeKu, sia lan lisu pala’na tu kamare’dekangKu butung pelonga’.

TOMANGADA’ 9:2

Pada bangsia mintu’na tu napotaanna mintu’ tolino, pada tu dalle’ urrampoi to malambu’ sia to tang mekaaluk, to melo sia to masero, susi duka tu to maruttak, to memala’ sia to tang memala’; susitu apa urrampoi to melo, ten dukamoto tu to kadake gau’na; susitu apa urrampoi to umpalao sumpa, ten dukamoto tu to mataku’ umpalao sumpa.

PA’PUDIAN 17:13

Ke’de’Komi, o PUANG, tingngoi tu tau iato mai, sia pemparrakanni amMi rampananni la’bo’Mi tu katuoangku dio mai to tang mekaaluk.

SURA’ KATOMINAAN 26:33

Apa iatu kamu, la Kupasisarak-sarakkomi dio lu mintu’ bangsa sia la Kunonok tu pa’dang dio boko’mi sia la mempadang lo’bang tu tondokmi sia iatu kotami la daun lauan.

SURA’ KATOMINAAN 26:25

sia la Kuparampoikomi pa’dang, anna pabala’i tu basse mipoka; iammi sirampunmo lan kotami, manassa la Kupasaeangkomi ropu, ammi disorong lako ualimmi.

KATASSURAN 15:9

Ma’kadami tu uali, nakua: La mangula’na’, la kupellambi’i, la untaa-taana’ pangrampa; iatu penaangku la kupatosso lako tau iato mai sia la unnonokna’ la’bo’ku; limangku la ussanggangi tu tau iato mai.

YESAYA 57:1

Iatu to malambu’ sanggang, natae’ bang misa’ tau ussailei, sia iatu to masallo’ diurakkimo, natae’ bang tau umpoinaai; belanna diona kakadakean, anna diurakki tu to malambu’;

YEHEZKIEL 13:8

Iamoto, inde sia tu kadanNa Puangta PUANG, belanna umpokadakomi pa’pakena sia tang tongan, iamoto manassa la Kuukungkomi, kadanNa Puangta PUANG.

YEHEZKIEL 29:10

manassa iamoto mentingoNa’ lako kalemu la unnukungko sia iatu messarakna salu Nilmu sia la Kupopendaunlauan nasang tu tondok Mesir sia padang talo randuk dio mai Migdol sae lako Siene, tarru’ lako katonanna tondok Etiopia.

PA’PUDIAN 80:17

Iatu kayu iato diballa butung rompon; sia mintu’ tau iato sabu’mo diona kaumpalessekamMi matamMi.

PA’PUDIAN 83:15

Susi api unnimbakan pangala’ tamman, sia susito dukku api ullalle mintu’ tanete,

YEREMIA 17:27

Apa iake manokakomi umperangiiNa’, kumua: la mipamadatu tu allo katorroan sia da mimamaa sia umbaa pamaan tama babangan Yerusalem ke allo katorroan, manassa la umpadukkuNa’ misa’ api lan babanganna, tu la ussappii mintu’ tongkonan layukna Yerusalem sia tang pa’de-pa’deanna.

YEREMIA 21:14

Belanna Aku la umpapakkannikomi sitinaya bua penggaurammi, kadanNa PUANG sia Akumo la umpadukku api lan to pangala’na, anna lallei tu mintu’ apa untikui.

YEHEZKIEL 24:9

Iamoto, inde sia tu kadanNa Puangta PUANG Nakua: Upu’ allona tu kota umpentombang rara. Aku kalena la umpakapuai tu api dapo’.

AMOS 5:6

Daka’i tu PUANG, ammi tuo, da narampoi bati’na Yusuf susi tu api ma’kande pu’pu’, anna tae’ misa’ tau untundui tu Betel umpa’deanni.

AMOS 7:4

Susite tu apa Napatiroanna’ Puangta PUANG: Manassa untambai api la umpalalo ukungan. Api iato napamarangke tu uai kapua sia la nakande duka tu pa’pa’lakan.