YEHEZKIEL 2:1 - Sura' Madatu

¹ Ma’kadami lako kaleku Nakua: E ma’rupa tau, millikko ammu bendan, belanna la Kupa’kadaiko.

YEHEZKIEL 2:1 Referans Kwoze

DANIEL 10:11

Ma’kadami lako kaleku nakua: E Daniel, to tarru’ dipakaboro’, palan penaai te kada la kupokadangko sia bendanko, belanna totemo disuana’ sae lako kalemu. Iatonna pokadai te iannate lako kaleku, bendanmo’ ma’parondo.

YEHEZKIEL 4:1

E iko, ma’rupa tau, alako misa’ batu tela, padioi tingayomu, ammu pattai lako tu misa’ kota, iamotu Yerusalem.

YEHEZKIEL 3:17

E ma’rupa tau, Kuangka’moko to ma’kampana to Israel. Iammu rangii tu kada tassu’ dio randan pudukKu, la mupakilala tu tau iato mai tete dio sangangKu.

YEHEZKIEL 5:1

Na iko, e ma’rupa tau, alako misa’ pa’dang mataran, tu la mupake susi piso peku’ku’na misa’ to ma’ku’ku’; kallu’i tu ulummu sia danggo’mu; ammu ala misa’ timbangan ammu taa-taai tu beluak.

YEHEZKIEL 3:4

Ma’kadami lako kaleku Nakua: E ma’rupa tau, laoko umpellambi’i to Israel, ammu ma’kada lako tete dio kadangKu.

YEHEZKIEL 3:1

Ma’kadami lako kaleku Nakua: E ma’rupa tau, kandemi tu apa mutiro; kandemi tu sura’ tilulun; ammu male ma’kada lako to Israel.

PENGGAURANNA RASULU’ 9:6

Malimbangunmoko mumale tama tondok, nalanpa mudipokadan tu apa sipatu la mupogau’.

PENGGAURANNA RASULU’ 26:16

apa malimbangunko muke’de’, belanna iari patunna te, angKu pa’pekitanan Kaleku lako kalemu, la kupamanassako mendadi rasulu’ sia sa’bi, nala diona tu kamangkangKu mukita, nala diona tu la Kuninna umpa’pekitanan Kaleku lako kalemu undinna;

YOHANES 3:16

Belanna tenmoto tu Puang Matua ungkamasei tu issinna te lino, naurunganni umpa’kamaseanni tu Anak tungga’Na, kumua anna minda-minda umpatonganNi tae’ nala sanggang, sangadinna ungkabu’tui katuoan sae lakona.

YOHANES 3:13

Moi misa’ tau tae’ kendek langngan suruga, sangadi Ia tu mangkanna songlo’ dao mai suruga, Iamotu Anak rampan dilino.

MATIUS 17:7

Saemi tu Yesu ungkaka’i tinde tau sia Nakua: Malimbangunkomi sia da mimataku’.

DANIEL 10:19

Da mumataku’, e to tarru’ dipakaboro’, torro marampa’ko, mengkabatta’ko, ondongpi mengkabatta’ko. Iatonna marassan ussipa’kadanna’, matoto’mo’, angku ma’kada kukua: O puangku, ma’kadamokomi, belanna mangkamo’ mipamatoto’.

DANIEL 8:17

Saemi dio tu kuninna bendan; iatonna saemo, tirambanmo’ angku tukku rokko padang, apa ma’kada lako kaleku nakua: Tandai, e ma’rupa tau, kumua iate patiro mendeata iate umpatu attu ma’katampakanna lino.

YEHEZKIEL 37:3

Ma’kadami lako kaleku, Nakua: E ma’rupa tau, ma’dinraka te buku iate mai tuo sule? Mebalimo’ kukua: O Puangta PUANG, Kamu unnissanni tu iannato.

YEHEZKIEL 20:3

E ma’rupa tau, sipa’kadako pekaamberanna to Israel sia ma’kadako lako mukua: Inde sia tu kadanNa Puangta PUANG Nakua: Saerokomika la umpalaku pa’timbangangKu? La lelukraka tuoKu, tae’ Kuelorangkomi umpalaku pa’timbangangKu, kadanNa Puangta PUANG.

YEHEZKIEL 17:2

E ma’rupa tau pokadako misa’ karrume, paissanni misa’ pa’pasusian tu to Israel,

YEHEZKIEL 16:2

E ma’rupa tau, paissanni Yerusalem tu mintu’ penggauran megallianna,

YEHEZKIEL 15:2

E ma’rupa tau, apara napolosong tu kayu garonto’ anggoro’ na iatu mintu’ kayu mentangke dio lu mintu’ kayu lan lu pangala’?

YEHEZKIEL 14:13

E ma’rupa tau, iake morongannai naden misa’ tondok kasalan lako Kaleku tete dio katangmarurusanna, sia iake la Kupata’pai lima, sia iake la Kuparoto’i tu roti la napopamuntu sia iake Kuparampoi karorian sia iake la Kusabu’i lan mai tu tolino sia olo’-olo’,

YEHEZKIEL 14:3

E ma’rupa tau, iate tau iate mai napalanpa penaanna tu rapang-rapang dipodeata sia napatulangdan sipatu lindona tu katitodoan sae lako tobang rokko kakadakean; ma’dinparaka la Kueloran tu tau iato mai sae mekutana lako Kaleku?

YEHEZKIEL 13:2

E ma’rupa tau, ma’nubua’ko unneai tu mai nabi to Israel, tu ma’nubua’ ammu ma’kada lako to ma’nubua’ unturu’ tanan penaanna, kumua: Perangii tu kadanNa PUANG.

YEHEZKIEL 12:3

Na iko, e ma’rupa tau, pasakka’i tu mintu’ apa parallu dio pa’paliran, sia la maleko butung to dipali’ ke allona dio pentirona tau iato mai; manassako la ke’de’ dio mai inanmu lako misa’ inan senga’ dio pentirona tau iato mai. Umbai la napalan penaa sia tau iato mai, belanna misa’i bati’ pabali-bali.

YEHEZKIEL 7:2

E iko ma’rupa tau, inde sia tu kadanNa Puangta PUANG diona tu tondok Israel, kumua: Saemo tu katampakanna! katampakanna diona tu a’pa’ tetukna tondok iato!

YEHEZKIEL 3:10

Ma’kadami lako kaleku Nakua: E ma’rupa tau, iatu mintu’ kada tu la Kupokadangko, la mupariba’tang tongan sia la mupalanda’ tongan tama pa’perangimmu.

YEHEZKIEL 2:8

Na iko, e ma’rupa tau, perangii tu apa Kupokadangko; da mupabali-bali susite to pabali-bali; popengangai tu sadangmu, ammu kandei tu apa Kubenko.

YEHEZKIEL 2:6

Na iko, e ma’rupa tau, da mukataku’i tu tau iato mai sia da mukataku’i tu kadanna, moi natikuiko a’da’ sola duri sia moi ammu sisola te’tek buku; da mukataku’i tu kadanna sia da mukagiangi tu olona, belanna tau iato mai to pabali-bali.

PA’PUDIAN 8:4

Iangku tingara langi’Mi, panggaraga limamMi, sia bulan na bintoen tu mangka Mikombong:

YEHEZKIEL 2:3

Ma’kadami lako kaleku Nakua: E ma’rupa tau, Kusuako lako to Israel, lako tu mai bangsa pabali-bali, tu unneaNa’; iatu tau iato mai sia nene’ to dolona umboko’i dukaMo’ sae lako allo iate;

YEHEZKIEL 1:28

Susito tindak sarira ditiro, tu paan lan gaun, ke palauranni, susito tu rupanna tu arrang untikui tu api. Susimoto tu rupa dinii umpa’peomboran kamala’biranNa PUANG. Iatongku tiromi to, lumbangmo’ rokko padang, angku rangii misa’ gamara Ma’kada.

YEHEZKIEL 40:4

Ma’kadami tu muane iato lako kaleku nakua: e ma’rupa tau, pata’pai matammu sia tananni talingammu sia paninaai tu mintu’na la Kupatiroangko; belanna la dipatiroangko tu iannato, iamoto mudibaa sae indete. Pa’peissananni tu mintu’ apa la mutiro lako to Israel.

YEHEZKIEL 43:18

Ma’kadami lako kaleku Nakua: E ma’rupa tau, inde sia tu kadanNa Puangta PUANG, Nakua: Inde sia tu apa dipondok diona inan pemalaran: Iato allo, ke upu’mi digaragai la dipemalarammo tu pemala’ ditunu pu’pu dao sia la dipi’pikki rara lako,