TOMANGADA’ 9:11 - Sura' Madatu

¹¹ Kutiro pole’omi lan naarrang matanna allo, kumua iatu polean disilombai tangia tomalinta’ tongan unnalai, sia iatu kapataloan lan kasirarian tangia to matoto’ tongan unnalai, sia iatu kande tangia tokinaa unnalai, sia iatu kasugiran tangia tomanarang unnalai, sia iatu pa’kamase tangia tounnampui tangnga’ kinaa unnalai, belanna attu sia upa’ urrampoi sola nasangi.

TOMANGADA’ 9:11 Referans Kwoze

YEREMIA 9:23

Inde sia tu kadanNa PUANG: Iatu to maluangan ba’tengna, da nasattuanni tu kamaluanganna sia iatu to matoto’ da nasattuanni tu kamatotoranna sia iatu to sugi’ da nasattuanni tu kasugiranna,

TOMANGADA’ 3:17

Sipa’kadamo’ kaleku kukua: Puang Matua la umpaolai salu to malambu’ sia to tang malambu’, belanna iatu mintu’ apa sia mintu’ pengkarangan pantan den attunna.

TOMANGADA’ 3:14

Kutandaimo, kumua iatu mintu’ pengkaranganNa Puang Matua, matontongan; tae’ tau ma’din urrangnganni ba’tu unnalai; sia Napogau’ Puang Matua tu iannato, kumua anna mataku’ tu tau dio oloNa.

EFESUS 1:11

Lan dukamo Kalena tanii dipadadi mana’, dilampak unturu’ tanan penaanNa Puang Matua, tu umpakedo mintu’na, situru’ lalan pa’inaanNa.

2 OSSORANNA DATU 20:15

nama’kada nakua: Perangii, e mintu’ to Yehuda sia pa’tondokan Yerusalem sia kamu, datu Yosafat! Inde sia tu kadanNa PUANG lako kalemi: Da mimataku’ sia da mitiramban lako tu kaponan surodadu pada budannato, belanna tangia rarimmi to, sangadinna rarinNa Puang Matua.

PA’TOLE 8:18

Apa la mukilalai tu PUANG, Kapenombammu, belanna Iamo, tu ungkamaseangko kamatotoran la ungkabu’tui tu ianan, kumua anNa palanda’i tu basse, tu Natanan sola nene’ to dolomu Napalaoi sumpa, susitu a’ganna te allo iate.

TOMANGADA’ 4:4

Kutiro duka, kumua iatu mintu’ sara’ sia mintu’ kamalintaran mengkarang, umpabu’tu kamangimburuanna misa’ tau lako solana; ia duka tu apa iato tae’ gai’na sia susito unnula’ angin.

YEREMIA 46:6

Iatu to matippa’ tang pakala umpallaian kalena sia to lalong tae’ duka natilendok: daanna lu dio randan salu Efrat titodo tu tau iato mai anna tibambang.

TOMANGADA’ 7:13

Nannungi tu mintu’ pengkaranganna Puang Matua, belanna mindara ma’din umpamaloloi tu apa Napakelok?

TOMANGADA’ 4:1

Kutiro pole’omi tu mintu’ pa’pakario-rio tu dipogau’ lan naarrang matanna allo, tiromi tu uai matanna mintu’ to dipakario-rio, namoi misa’ tae’ tau umpakatanai tu tau iato mai; rampe dio tu to ma’pakario-rio den kakuasan – namoi misa’ tae’ tau umpakatanai tu tau iato mai.

TOMANGADA’ 2:12

Mangkato messaileomo’ la untiro kakinaan sia kabagan sia katangpaissanan, belanna umba nakua tu tangnga’na tau tu la ussonda datu tu diona apa mangka napogau’ datu?

AYUB 34:29

Iake ma’pakappai tu Puang, mindara la ma’pasala? Sia iake Nabunianni lindoNa tu misa’ tau, mindara la untiroi – la pada-pada tu misa’ bangsa ba’tu misa’ tau –

2 SAMUEL 17:14

Nakuami Absalom sia mintu’ to Israel: Iatu pa’timbanganna Husai, to Arki melo na pa’timbanganna Ahitofel. Apa inang pangelorannamo PUANG susito, belanna la Nadampa tu pa’timbanganna Ahitofel, kumua anNa pasaeanni kasanggangan PUANG tu Absalom.

MALEAKHI 3:18

Attu iato la balik tu penaammi, ammi tiroi tu kasisengaranna to malambu’ sia to kelok, sia kasisengaranna minda tu mengkaola lako Puang Matua na minda tu tae’ namengkaola lako Kalena.

1 SAMUEL 17:50

Susimo kanataloanna Daud tu to Filistin iato umpake lobang sia batu, sia tang napopengkaa tu to Filistin sia napatei apa tae’ pa’dang lan limanna Daud.

DANIEL 4:35

Iatu mintu’ to untongkonni kuli’na padang direken tae’ bang gai’na; Napogau’i lako tu mintu’na angge maritik dao langi’ sia mintu’nato untongkonni kuli’na padang unturu’ pa’poraianNa, sia moi misa’ tau tae’ untukka’i tu limanNa, ba’tu ma’kada lako Kalena kumua apara tu Mipogau’?

2 SAMUEL 17:23

Iatonna tiromi Ahitofel, kumua tae’ nadituru’ tu pa’timbangna, nalapikkimi tu keledainna, anna male lako banuanna dio tondokna; iatonna mangkamo umpasanni tu mintu’ to lan banuanna nataa-taanni tu apanna, untoke’mi kalena; susimo kamateanna to, anna dilamun diong panglamunanna ambe’na.

PA’TOLE 8:17

Da muma’kada lan penaammu, mukua: Kamawatangangku sia kamatotoranna limangku, anna pabu’tuanna’ tu ianan iate.

1 SAMUEL 6:9

Tiro meloi, ianna ma’palulako lili’ tondokna, iamotu Bet-Semes, manassamo kumua Puang umparampoi tu kasanggangan kapua iate lako kaleta. Apa iake tae’i nama’palulako, taissanmo kumua tangia limanNa umpandasaki’, sangadinna inang toto’tamo kita.

PA’PUDIAN 76:5

Pandillak-dillak tonganKomi sia mala’bi’, dao mai buntu nanii pangrampan.

SARAMBU PEADA’ 1:5

Minda-minda tu kinaa melo ke naperangii anna rangngannipi penaa, sia minda-minda unnampui tangnga’ kinaa, melo ke ullolongampi timbangan melo,

TOMANGADA’ 9:2

Pada bangsia mintu’na tu napotaanna mintu’ tolino, pada tu dalle’ urrampoi to malambu’ sia to tang mekaaluk, to melo sia to masero, susi duka tu to maruttak, to memala’ sia to tang memala’; susitu apa urrampoi to melo, ten dukamoto tu to kadake gau’na; susitu apa urrampoi to umpalao sumpa, ten dukamoto tu to mataku’ umpalao sumpa.

ZAKHARIA 4:6

Ma’kadami lako kaleku nakua: Inde sia tu kadanNa PUANG lako Zerubabel Nakua: Tangia tete dio kamatotoran sia tangia tete dio kamasa’garan, sangadinna tete dio PenaangKu, kadanNa PUANGna mintu’ ma’dandan maritik.

TOMANGADA’ 9:3

Inde sia tu apa tarru’ kadake tu mintu’na dadi lan naarrang matanna allo, iamotu pada tu dalle’ urrampoi sola nasang; iamoto iatu penaanna ma’rupa tau ponno kakadakean, sia kapusan lan penaanna lan mintu’ allo katuoanna; sia undinnato mintu’ tau ma’palulako inan tomate.

YEREMIA 48:14

Umba la mikua ma’kada kumua: Kami te to lalong, mintu’kanni to parari sa’ga’!