RUT 2:4 - Sura' Madatu

⁴ Ta’kala saemi tu Boas dio mai Betlehem, nama’kada lako to massasa’ dalle sisikan, nakua: Narondongmorokomi PUANG! Mebalimi tu tau iato mai lako nakua: Napamasakke-sakkemorokomi PUANG!

RUT 2:4 Referans Kwoze

2 TESALONIKA 3:16

Anna Iamora tu Puang, oto’na mintu’ kamarampasan, tontong ungkamaseangkomi kamarampasan lan mintu’-mintu’na. Anna rondongmorokomi Puang sola nasang.

LUKAS 1:28

Tonna tamamo tu malaeka’, nakuami lako: Kurre sumanga’mu, e to dikamasei la Narondongmoko Puang Matua.

TO PARENGNGE’ 6:12

Attu iato ombo’mi tu Malaeka’Na PUANG anna ma’kada lako, nakua: Narondongmoko PUANG, e pa’barani lalong.

2 TIMOTIUS 4:22

AnNa Puangmora urrondong penaammu sia pa’kamaseanNamora Puang Matua urrondongkomi sola nasang.

PA’PUDIAN 118:26

Maupa’ tu to sae umpotete sanganNa PUANG! La kipassakkekomi lan mai banuanNa PUANG.

RUT 4:11

Ma’kadami mintu’ to buda tu dio babangan iato sia mintu’ pekaamberan, nakua: Kamimo sola nasang tu titanan sa’bi. Na PUANGmora umpasusi Rahel sia Lea tu baine tama banuammi, tu mangkamo umbangun tongkonanna to Israel! La batta’komi lan mintu’ penggaurammi dio Efrata sia la umpalayukkomi sangammi lan Betlehem.

YOSUA 24:15

Apa iake misangai tang melo tu umpengkaolai PUANG, melo ke mipilei totemo minda tu minii mengkaola: lakoraka mintu’ deata tu napenombai nene’ to dolomi sambalinna lu Salu, lakoraka deata to Amori tu minii ma’tondok. Apa iatu aku sia to lan banuangku la mengkaolakanni lako PUANG.

KADADIAN 18:19

Belanna mangkamo Kuturo ta’ba, dikua anna patudui tu mai anakna sia bati’na, la ungkaritutui lalanNa PUANG, la umpogau’ kamaloloan sia kamalamburan anNa palanda’i PUANG lako kalena tu apa mangka Napokadanni.

1 TIMOTIUS 6:2

Iato to umpopuang to ma’patongan, da natunai tu belanna siulu’mo, sangadinna la samengkaola-olanna lako puangna, belanna ma’patongan tu puangna sia dipakaboro’, tu birisan umpogau’ kameloan. Susimo la muadaranni to sia la mupakilalanni.

RUT 2:3

Malemi anna rampo lako bela’, narurukki tu buli dalle sisikan dio boko’na to massasa’ dalle sisikan; siappa’mi rampo lako sangtempe’ bela’na Boas, tu dio mai pa’rapuanna Elimelekh.

RUT 2:5

Ma’kadami Boas lako taunna tu umbandoro’i to massasa’ dalle sisikan, nakua: Mindara nanii torro te baine mangura?

KADADIAN 28:3

Na Puang Matuamora tu Umpoissan angge maritik umparongko’ko umpopembati’ko sia umpopemba’ka’ko, anna iko nanii garonto’na ba’tu pira-pira bangsa.

KADIBILANGAN 6:24

Na PUANGmora umpamasakkekomi sia ungkatirinnaikomi;

TO PARENGNGE’ 6:16

Ma’kadami PUANG lako Nakua: Manassa Aku urrondongko, iamoto la mutalo tu mintu’ to Midian susito misa’ri.

1 SAMUEL 17:37

Sia nakuapa Daud: Iatu PUANG, tu urrampananna’ dio mai kanuku singa sia dio mai kanuku beruang, Ia duka la urrampananna’ dio mai limanna to Filistin iatu. Ma’kadami Saul lako Daud: Malemoko, na PUANGmora urrondongko.

1 OSSORANNA DATU 2:51

Salma, ambe’na Betlehem, na Haref, ambe’na Bet-Gader.

PA’PUDIAN 134:3

Sangapaoi anNa pamasakkeko PUANG lan mai Sion, Puang umpadadi langi’ sia lino.

YEREMIA 31:23

Nakua kadanNa PUANGna mintu’ ma’dandan maritik, Kapenombanna to Israel: Iatu kada iate la napake pole’ tau dio tana Yehuda, sia lan mintu’ kotana, ke mangkami Kupopembali tu toto’na, nakua: Napamasakkemoroko PUANG e inan kamaloloan sia buntu masero!