PA’PUDIAN 9:10 - Sura' Madatu

¹⁰ PUANGmo tu napobenteng malangka’ mintu’ to dipakario-rio, Iamo tambakuku lan attu kamandasan.

PA’PUDIAN 9:10 Referans Kwoze

PA’PUDIAN 91:14

Belanna la’ka’ tongan lako Kaleku, iamoto angKu la urrampananni, sia belanna natandai tu sangangKu, iamoto angKu la urrinding pala’i.

SARAMBU PEADA’ 18:10

Iatu sanganNa PUANG sangtinti to menara matoto’; iatu to malambu’ mallai lako natang matumba-tumba dio.

YEREMIA 29:13

Sia la miappa’Na’, ke midaka’Na’, ke ponnoi penaammi malaku pa’tunduan lako Kaleku.

PA’PUDIAN 5:11

Pasalai tu tau iato, o Puang Matua! Nake tobangi natumang pakira-kiranna, suale pala’i belanna buda salana, belanna nabali-baliKomi.

2 TIMOTIUS 1:12

Iamo bannangnato, angku perasai dukai te mintu’nate. Apa tae’ duka kupomasiri’i, belanna kuissan kumua minda tu kupatonganmo sia kukatappa’i, kumua Iamo kuasa la ungkarimmanni tu apa kupa’peannan landa’ lako tu Allo iato.

1 YOHANES 5:20

Sia taissan kumua saemo tu AnakNa Puang Matua sia Nakamaseammoki’ kapaissanan, kumua anta tandai tu To tongan; iatu kita te lanki’ To tongan, iamotu lan AnakNa, – Yesu Kristus –. Ia tonganmo Puang Matua te sia katuoan matontongan.

PA’PUDIAN 57:1

Lu lakona pangala sengo. Unturu’ baenan sengo: Dandi’ bala’-bala’i. Pa’pudianna Daud; misa’ ianan ballo, tonna mallai dio mai olona Saul, anna male tama lo’ko’.

PA’PUDIAN 37:28

Belanna iatu PUANG ungkabarii katonganan, sia tae’ Natampei tu to Naala mase, tau iato mai makarimman sae lakona, apa iatu bati’na to tang mekaaluk la diroto’i.

2 KORINTUS 4:6

Belanna Puang Matua mangka ma’kada kumua: La parrang, tu arrang lan mai malillinna, Ia dukamo parrang lan penaangki umpaarrangikan kapaissanan kamala’biranNa Puang Matua lan rupanNa Kristus.

1 OSSORANNA DATU 28:9

Na iko, e Salomo, anakku, la mutandai tu Kapenombanna ambe’mu sia ponno penaammu sia masorok ba’tengmu la umpengkaolai, belanna Nasudi PUANG tu mintu’ penaa sia Natarru’ tu mintu’ apa ditangnga’, Iake mudaka’I tu Puang, inang la Naelorangko unnappa’I, apa iake muboko’I, la Natibeko sae lakona.

YOHANES 17:3

Inde sia tu katuoan tontong sae lakona, ke natandaiKomi, o Puang tu misari sia tongan, sia iatu Yesu Kristus tu mangka Misua.

YESAYA 45:19

Tae’ lenpa Kuma’kada lan kabunianna ba’tu lan inan dio lu padang mapittuk; sia tae’ lenpa Kuma’kada lako bati’na Yakub, kumua: Daka’-daka’ bangNa’; Akumo tu PUANG, umpokada apa tongan, umpa’peissanan apa malambu’.

1 YOHANES 2:3

Dionamote taissanni kumua tatandaimo, iake takaritutui tu parentaNa.

2 SAMUEL 22:3

Kapenombangku sia Buntu batungku, tu kunii mentirerung, Iamo kupobalulang, sia tanduk kasalamarangku, sia benteng matoto’ku. Sia pentilindungangku, sia pela’bakku; tu mangka ullendokanna’ dio mai pa’pakario-rio.

PA’PUDIAN 37:39

Apa iatu kasalamaranna to malambu’ bu’tu lu dio mai PUANG, Iamo pentirerunganna lan attu kamaparrisan.

YESAYA 25:4

Belanna Kamumo tu pentilindungan matoto’na to bitti’, sia pentilindungan ma’toto’na to bongko lan kapu’duranna, sia pentirerungan, ke uran bara’i, sia pentionganan, ke sarrangi tu allo. Belanna iatu urrungna to masa’ga’ susimoto uran bara’ untu’ba’ benteng tembo’ susi lassu’ dio to’ padang marangke.

NAHUM 1:7

Iatu PUANG masokan sia misa’ pentirerungan lan attu kapussakan; Natandai duka Ia tu mintu’ to umpentirerungI.