Naparandukmi Yesu ma’kada lako tinde tau unnala pa’pasusian Nakua: Den misa’ tau mantanan anggoro’ lan misa’ pa’lak, narompoi tiku lao, sia nagaraga tu pa’parran anggoro’ sia napabendan tu barung malangka’ misa’, napa’petesananni lako to ma’tesan nake’de’ lako tondok senga’.
sia ma’kadako lako, mukua: Inde sia tu kadanNa PUANGna mintu’ ma’dandan maritik, Nakua: Manassa la den misa’ muane diganti Taruk. Iamo la tuo diong mai inanna sia iamo la umbangunni tu Banua kabusunganNa PUANG.
Ma’perangiko, Yosua, tominaa kapua, la iko la mintu’ solamu tu unno’ko dio tingayomu – belanna iatu tau iato mai iamo muane dipotanda kalle-kallean – tonganna la Kupasae tu taungKu, iamo tu Taruk.
Apa totemo Nakua tu PUANG tu umpadadina’ taunNa tempon lan mai pa’tambukan angku pasulei tu Yakub lako, sia angku pasipulungi tu to Israel lako – sia dipakala’bi’mo’ dio pentiroNa PUANG sia Kapenombangku tu kupomatoto’ –:
Pemarangai dao mai isungan maindanMi, dao mai suruga, sia pamasakkei tu taumMi Israel, sia tondok tu mangka Misorong lako kaleki, – susitu Miallu’ Mipalaoi sumpa lako nene’ to doloki – iamotu misa’ tondok sebo pangandu’ sia tani’ enoan.
Pata’paKomi matamMi dao mai suruga sia tiroi lan mai inan maindan mala’bi’Mi. Umbamira tu kamakaritutuamMi sia penggauran matoto’Mi? Tang lattu’ lako kaleku tu karantangan buaMi sia kamamaseamMi?