PA’PUDIAN 43:4 - Sura' Madatu

⁴ Angku rampo lako to’ kapemalaranNa Puang Matua, lako Puang Matua, tu oto’na kaparannuan sia kasendeangku, angku ma’katapi umpudiKomi, o Puang Matua, o Kapenombangku!

PA’PUDIAN 43:4 Referans Kwoze

YESAYA 61:10

Iatu penaangku umpoparannu tongan PUANG, iatu deatangku unnarrak-arrak umposende-sende Kapenombangku, belanna Natamangkaleimo’ pakean kasalamaran, sia Napabayuina’ bayu lamba’ kamaloloan, sangtinti to muane diparampo ma’passapu susito minaa sia ten to baine diparampo umbeloi kalena.

PA’PUDIAN 57:8

Rapa’ tu penaangku, o Puang Matua, inang rapa’ tu penaangku; la menanina’ sia umpakendek pa’pudian.

PA’PUDIAN 33:2

PudiMi tu PUANG naturu’ oni katapi, sia penanianNi pa’pudian naturu’ dandi sangpulo ritinna.

PA’PUDIAN 81:2

Ra’ban-ra’bankomi umpenanian Puang Matua, tu tapopamuntu, pela’tekanni tu Kapenombanna Yakub.

PA’PUDIAN 42:6

Ma’apai ammu ma’dosso-dossora, e deatangku, sia apara bannangna ammu ma’rundede lan kaleku? Rannuanni tu Puang Matua, belanna inang la kupudipa, tu To ullendokanna’ sia Kapenombangku.

PA’PUDIAN 26:6

Kubasei tu limangku tanda tasikku masero pindan, kumane ullilingi inan pemalaramMi, o PUANG!

2 SAMUEL 6:5

Iatu Daud sola mintu’ to Israel ma’marua’-rua’ dio oloNa PUANG, umpannoni ma’rupa-rupa (oni-onian) kayu sapuko, iamotu katapi, dandi, ganda’-ganda’, giring-giring sia taa’-taa’.

ROMA 5:11

Sia tangia manna to, sangadinna ussattuan poleki’ Puang Matua tete dio Puangta Yesu (Kristus), apa belanna Iari anta kabu’tui kasikaeloan totemo.

KADA OMBO’ LAKO RASULU’ YOHANES 5:8

Iatonna alami tu sura’ iato, tukkumi tu a’pa’ a’gan kepenaa sia iatu duangpulo nna’pa’ penatua dio oloNa Anak domba iato, pada untoe katapi sia gori-gori bulaan ponno kemenian, iamo mintu’ pangandona to masallo’.

PA’PUDIAN 57:9

Millikko, e penaangku, millikkomi, e dandi sia katapi; la untundanna’ dannari lambe’.

PA’PUDIAN 63:2

O Puang Matua, Kamumo Kapenombangku, Kamumo tu kupeangla’, napoma’rangKomi deatangku, sia nakamali’Komi kaleku, dio padang rangke sia ba’ta’, sia tang nailli’ uai.

ZAKHARIA 13:9

Iatu taa tallunna to, la Kupatama api, sia la Kupakombong susito salaka napakombong tau, ondongpi la kusudi, susito bulaan nasudi tau. La nasa’bu’ tau iato mai tu sangangKu sia la Kuperangii. La ma’kadaNa’ Kukua: Iatu tau iato mai taungKu sia ma’kada duka tu tau iato mai nakua: Iatu PUANG iamo Kapenombangku.