PA’PUDIAN 126:2 - Sura' Madatu

² Attu iato naponnoi petaa mammi’ tu sadangki, sia narandan la’tek silelean tu tongka’ dililaki. Attu iato den to kapere’ ma’kada kumua: Umpogau’mo apa kalle-kallean tu PUANG lako tau iato mai!

PA’PUDIAN 126:2 Referans Kwoze

AYUB 8:21

Iake nalambi’i attunna tontong tu Puang la umpopetaako, sia tontong umpasila’tekan randan pudukmu.

YESAYA 35:10

mintu’ to Nala’bak PUANG la sule sia la kumalasi-lasi sae lako Sion; sia kaparannuan masae lako la napomakota dao ulunna; tau iato mai la unnappa’ kasendean sia kaparannuan, apa mintu’ kamasussan sia kasumarroan la mallai.

PA’PUDIAN 71:19

Iatu kamaloloamMi sumpu langngan langi’, o Puang Matua, tu mangkamo umpogau’ ba’tu pira-pira penggauran kapua; o Puang Matua, mindaora ussitintibatuangKomi?

YEREMIA 33:11

La dirangi pole’omo tu arrak kaparannuan sia kamaruasan sia gamara to ma’rampanan kapa’ sia gamaranna tu mintu’ tau nakua: Pudimi tu PUANGna mintu’ ma’dandan maritik, belanna masokan tu PUANG, belanna iatu kamasokananNa tang leluk sae lakona! iake umbaai pemala’ pa’pudian tama banuanNa PUANG; belanna la Kupopembali tu toto’na te tondok iate, naurunganni susito dolona, kadanNa PUANG.

PA’PUDIAN 53:6

Tonna iato naluang nasang kamatakuran kapua, anna moi to tae’ bannangna nanii mataku’; belanna pantan Napatorro simisa’mo Puang Matua tu buku lampana mintu’ to umpatama limbuko, la mupadenan kamasirisan tu tau iato mai, belanna Natibemo Puang Matua.

NEHEMIA 6:16

Iatonna rangimi ualingki tu iannato, mataku’mi tu mintu’ bangsa untikuikan sia rosso penaanna, anna mangaku kumua iate pengkarangan iate dikarang tete dio pa’tunduanNa Kapenombanta.

ROMA 11:15

Belanna iake ia napasikaelo issinna lino tu kadisa’biangananna to Israel, la ma’patumba pole’opi ke ditarimai sule, ke tang katuoan dio mai to’ to mate?

PA’PUDIAN 51:14

Pasulei lako kaleku tu kaparannuan kasalamaran lu dio mai Kalemi, sia penaa mengkaolakumora la ussande’na’.

PA’PUDIAN 14:7

Naludaomora mai Sion tu kamakarimmananna to Israel! Iake Napaka’pannimi PUANG sule tu serongna taunNa, maneri parannu paiman tu Yakub, la sende pakadua tu Israel.

EZRA 3:11

Sibali-balimi tu tau iato mai menani umpudi sia umpakaraya PUANG nakua: belanna masokan, sia belanna iatu kamasokananNa tang tileluk sae lakona lako to Israel. Mandumi siarrakan tu mintu’ to buda sia umpudi PUANG, belanna tiotonmo tu parandangan banuanNa PUANG.

KADIBILANGAN 23:23

belanna tae’ gai’na tu kada la ullangdo Yakub, sia pa’basa-basa la dinii unnea Israel. Totemo melo ke dipokadai tu diona Yakub sia diona Israel apa tu la Napogau’ Puang Matua.

YESAYA 51:11

Iatu mintu’ to Narampanan PUANG la sule sia la kumalasi-lasi sae lako Sion; sia kaparannuan masae lako la napomakota dao ulunna, tau iato mai la unnappa’ kasendean sia kaparannuan, anna mintu’ kamasussan sia kasumarroan la mallai dio mai kalena.

YEREMIA 31:7

Belanna nakua kadanNa PUANG: Unnarrak-arrakkomi diona Yakub, sia kumalasi-lasikomi diona pangulunna mintu’ bangsa; pa’petaleranni sia pudii sia ma’kadakomi kumua: Narampanammo PUANG tu taunNa, iamotu to Israel torronapa.

YEHEZKIEL 36:36

La naissan mintu’ bangsa torronapa untikuikomi, kumua Akumote, tu PUANG, umbangunni sule tu apa sanggangmo sia untananni tu apa talo. Akumote, tu PUANG, mangka umpokadai tu iannato sia Aku dukamo la umpogau’i.