PA’PUDIAN 109:14 - Sura' Madatu

¹⁴ Sangapaoi anna bantang lan karangan inaanNa PUANG tu kakadakeanna to dolona, sia da nadipai’pinni batu mapipang tu kasalanna indo’na.

PA’PUDIAN 109:14 Referans Kwoze

NEHEMIA 4:5

Da Misamboi tu kakadakeanna tau iato mai sia da nadipa’dei tu kasalanna dio oloMi, belanna iatu tau iato mai umpa’dikki penaanna mintu’ tau ma’bangun sule. –

KATASSURAN 20:5

Da’ mutukku umpenombai sia da’ mupengkaolai, belanna Akumo PUANG, Kapenombammu, Kapenomban manoka ditimba oloNa, tu umpapakkanni kakelokanna mintu’ ambe’ lako anakna, sae lako osso’ ma’pentallunna sia ma’penna’pa’na tu mintu’nato ungkabiri’Na’,

YEREMIA 18:23

Apa Kamu, o PUANG, unnissanni tu tangnga’na tau iato mai la umpateina’, da Miseroi tu kakadakeanna sia da Mipa’dei tu kasalanna dio mai oloMi, sangadinna la tibambang dio oloMi. Ukungi tu tau iato mai, ke nalambi’mi tu attu kasengkeamMi.

YESAYA 43:25

Aku, Akumote tu umpa’dei mintu’ kakadakeammu belanna iamo pa’poraiangKu sia tae’mo Kupalanni penaa tu kasalammu.

2 DATU 11:1

Iatonna tiromi Atalya, indo’na Ahazia kumua iatu anakna matemo, ta’kala malemi umpatei nasangi tu bati’na datu.

2 DATU 9:27

Iatonna tiromi Ahazia, datu to Yehuda, tu iannato, mallaimi umpempatui Bet-Hagan. Apa undi naula’ Yehu, nakua: Pongko dukai tu! Panai dao karetana! Napabasaimi tau dio lalan tuka’ langngan Gur, sikandappi’ Yibleam; mallaimi lako Megido, namate dio.

2 DATU 8:27

Unturu’mi bate lalanna bati’na Ahab sia umpogau’ apa kadake dio pentiroNa PUANG, susi penggauranna bati’na Ahab, belanna to sirapu dio bati’na Ahab.

2 SAMUEL 21:1

Iatonna linona Daud denmi karorian pannang situru’-turu’ bang tallung taun; iamoto anna masambayang tu Daud umpekutananni langngan PUANG. Napebaliimi PUANG Nakua: Iamo tu Saul, sola bati’na kaindanan rara bangsia, belanna mangka umpatei to Gibeon.

2 SAMUEL 3:29

Iatu rara iato nata’pa daomora ulunna Yoab sia mintu’ rapunna. Lan banuanna Yoab tang la ka’tu tau nakasunni rara sia golenan sia kupi’ anna ma’tekken sia nakande pa’dang sia karorian.

SURA’ KATOMINAAN 26:39

Sia minda-mindakomi tu torronapa, la marangke tu kalena lan tondokna ualinna natumang kakelokanna sia diona duka kakelokanna nene’ to dolona, anna marangke tu kalena, susitu nene’ to dolona.

KATASSURAN 34:7

tu umpatontong kamasokananNa lako ma’sa’bu-sa’bu tau, tu umpagarri’ mintu’ kapatodo-tintingan sia kakelokan sia kasalan; inang tae’ nabilang maseroi tu mintu’ to umpogau’ kasalan, sangadinna umpapakkanni kakelokanna mintu’ ambe’ lako anak-lanto mimi’na sae lako osso’ ma’pentallunna sia ma’penna’pa’na.