NEHEMIA 1:11 - Sura' Madatu

¹¹ O PUANG, tananni talingamMi tu passambayangna taumMi sia iatu passambayangna mintu’ taumMi, tu parannu penaanna ungkabangnga’ sangamMi, sia pamaupa’i tu taumMi allo iate, dennoupa’ nalolongan kamamasean dio olona tau iate. Belanna iate aku te pangulu to ma’pairu’na datu.

NEHEMIA 1:11 Referans Kwoze

NEHEMIA 1:6

La Mitanding talinga sia la Mibidaran tu matamMi la umperangii passambayangna taumMi, tu kupennoloan lako Kalemi keallo sia kebongi diona to Israel, taumMi; kupangakuammo tu kasalanna to Israel, tu kipogau’ umbaliKomi; ia duka tu aku sia sangdadiangku umpogau’ nasangmokanni kasalan.

NEHEMIA 2:8

sia misa’ sura’ lako Asaf, petoro’ pangala’na datu, anna benna’ kayu la kupotangdan rattiang dio babanganna benteng tu sikande Banua Kabusungan sia dio rinding tembo’ kota sia dio banua la kunii torro. Nabenmo’ datu tu sura’ iato mai, belanna narondongna’ pa’kaborro’Na KapenombangKu.

NEHEMIA 2:1

Iatonna bulan Nisan taun ma’penduang – pulona kaparentanna datu Artahsasta, tonna sakka’ tu uai anggoro’ dio tingayona, kuangka’mi tu uai anggoro’, kutadoanni datu. Tae’ lenpa kumasussa to lendu’na dio olona datu.

IBRANI 13:18

Passambayangangkan, belanna kikatappa’i kumua bannang pute tu sukaran inaangki morai la umpalolang kaleki lan mintu’ apa susitu sipato’na.

SARAMBU PEADA’ 21:1

Iatu penaanna datu lan limanNa PUANG susito salu’-salu’, Napalolong lao umba-umba tu Naporai.

PA’PUDIAN 130:2

O Puang, perangii tu gamarangku, sangapaoi amMi tanding talingai tu mintu’ pengkamoyaku.

EZRA 7:6

iamote tu Ezra ke’de’ dio mai Babel. Ia misa’ pandita sura’, tu manarang lan Sukaran alukna Musa, tu Napa’bengan PUANG, Kapenombanna to Israel; nabenmi datu tu mintu’ pa’poraianna, belanna narondong limanNa PUANG, Kapenombanna.

PA’PUDIAN 86:6

O PUANG, tananni talinga tu passambayangku, sia perangii tu pengkamoyaku.

EZRA 1:1

Iatonna taun pamulanna kadatuanna Koresh, datu Persia, Napatiakka’mi PUANG tu penaanna Koresh, datu Persia, kumua anna dipalanda’ tu kadanNa PUANG, tu nalopian Yeremia, anna mesua metamba-tamba lan lu mintu’ parentana sia napa’peissanan duka lan sura’ nakua:

KADADIAN 40:21

Napatamai tu pangulu pa’kampa pangiru’ tama toena sule, kumua napennoloan polei tu irusan lako Firaun.

KADADIAN 40:23

Tae’ duka nakilalai pangulu pa’kampa pangiru’ tu Yusuf, sangadinna nakalupai.

KADADIAN 41:9

Saemi mennolo tu pangulu pa’kampa pangiru’ lako Firaun, nakua: Iate allo kukilalai tu salaku.

KADADIAN 32:11

Rampananna’ dio mai limanna siulu’ku, dio mai limanna Esau, belanna mataku’na’, saei manii ullampak-lampakna’ la’bo’ sia iate mai pia sola indo’na.

SARAMBU PEADA’ 1:29

Belanna ungkabiri’ kapaissanan, tae’ napilei tu ungkataku’ PUANG,

KADADIAN 43:14

Na Puang Matuamora tu Umpoissan angge maritik umpamaturu-turui tu puang iato anna katuru-turuikomi, natangga’i tu siulu’mi sia Benyamin duka misolan sule! Iate aku te, iake dipasayu’na’, elo’namo angku sayu’.

KADADIAN 32:28

Nakuami tinde tau: Tae’mo mudisanga Yakub, sangadinna Israel, belanna mangkamoko sirari Puang Matua sia tolino ammu patalo.

KADADIAN 40:2

Sengke tonganmi tu Firaun lako to parea mase’ponna sola duai, tu pangulu pa’kampa pangiru’ sia pangulu pa’kampa kande.

KADADIAN 24:42

Nasusi to, iate allo saemo’ lako to to’ bubun, angku massambayang kukua: O PUANG, o Kapenombanna puangku Abraham, pamaupa’i tu lalan kuolainna.

KADADIAN 40:1

Denmi pissan tonna mangka tu mintu’nate, iatu pa’kampa pangiru’na datu Mesir sia pa’kampa kandena ungkadakean penaa puangna, iamotu datu Mesir.

2 OSSORANNA DATU 6:40

Iamoto, o Kapenombangku, la Mitiro sia la Miperangii tu passambayang indete inan iate.

PA’PUDIAN 61:5

La mari’pina’ lan tendaMi sae lakona, sia la mentilindungna’ diong to’ ongan pani’Mi. Sela

PA’PUDIAN 106:46

Sia Napabu’tu tu kamamasean lako tau iato mai, lan ba’tengna mintu’ to urrampai.

YEREMIA 42:12

Sia la Kukaturu-turuikomi, anna maturu-turu lako kalemi, anna patorrokomi lan padangmi.

MALEAKHI 3:16

Attu iato iatu mintu’ to ungkataku’ PUANG pada sipa’kada-kada, kumua: Napalan penaa sia Narangi PUANG sia dio oloNa den disura’ tu misa’ sura’ kapengkilalan, napomeloi tu to ungkataku’ PUANG sia umpakala’bi’ sanganNa.