MIKHA 1:16 - Sura' Madatu

¹⁶ Galettungi sia ku’ku’i tu ulummu, belanna mintu’ tu anak pa’kaboro’mu; papada lua’i galepo’mu tu galepo’ dio langkan maega, belanna toyangmo male dipali’ tu tau iato mai dio mai kalemu.

MIKHA 1:16 Referans Kwoze

YESAYA 22:12

Manassa allo iato Natambaimokomi Puang, PUANGna mintu’ ma’dandan maritik, la tumangi’ sia la umbating, sia la ma’galettung sia la ma’pote dibolong.

YEREMIA 7:29

Ku’ku’i tu beluakmu ammu tibei, sia unnurrukko umbating dao lu tanete karing, kumua: Nasualemo PUANG sia Natampemo te pa’rapuan iate tu narampoi kasengkeanNa.

AYUB 1:20

Attu iato ke’de’mi tu Ayub, na kake-kakei tu bayu lamba’na sia naku’ku’i tu ulunna, nalumbang rokko padang, tukku menomba, anna ma’kada nakua:

AMOS 8:10

Attu iato la Kupopembali passanda bolong tu mintu’ pa’gaurammi sia la Kupopembali bating tu mintu’ naniammi. Attu iato la Kupatambeke’i nasangkomi sanda bolong sia la Kupopa’galettung tu mintu’ ulu. Iatu kapassanda-bolongan la Kupabutung sanda-bolong diona anak tungga’ sia iatu ma’katampakanna la susi allo nanii kamaparrisan.

YEREMIA 16:6

La to kapua la to bitti’ la mate lan tondok iate sia tae’ nadilamun tu tau iato mai sia tae’ nala umbatingi tau, sia moi misa’ tau tae’ untori-torianni kalena ba’tu unggalettunganni ulunna.

YEREMIA 6:26

E anak dara taungKu, ma’dodo karungko sia umpentombangko au. Ma’pote dibolongko susito kamatean anak misa’, sia mario-rioko umbating; belanna ta’pa nalaoiki’ to ma’kasanggang.

YESAYA 15:2

Male tu tau langngan banua kapemalaran, to Dibon male langngan inan madao la sibatingan. Dao Nebo sia Medeba nanii to Moab siurrukan; iatu ulunna tau iato mai digalettungi nasang sia diku’ku’i tu danggo’na.

2 DATU 17:6

Iatonna taun ma’pengkaseramo kadatuanna Hosea natalomi datu Asyur tu Samaria, anna pali’i tu to Israel lako Asyur, sia napopa’tondok dio Halah, dio biring salu Habor, iamo salu dio Gozan, sia dio lu mintu’ kota to Madai.

PA’TOLE 28:41

La den anakmu muane sia baine, apa tang la mupoanak, belanna la male dirampa.

YEREMIA 47:5

Iatu Gaza digalettungimo sia Askelon disanggangmo; e to Enak tu torronapa, la sangapaporoko untori’-tori’ kalemu?

AMOS 7:11

Belanna susite tu kadanna Amos nakua: Iatu Yerobeam la mate nakande pa’dang sia iatu to Israel manassa la male dipali’ lan mai tondok –

AMOS 7:17

Iamoto inde sia tu kadanNa PUANG Nakua: Iatu bainemu la pasandak salu lako rampanan kapa’ lan lu kota, iatu anakmu muane sia anakmu baine la songka nakande pa’dang, sia iatu pa’lakmu la ditaa-taa ulang pesuka’, na iko kalena la mate dio to’ padang tang masero, sia iatu to Israel manassa la male dipali’ lan mai tondokna.

YEREMIA 4:8

Iamoto la membungku’ karungkomi sia umbating sia unnurruk-urruk, belanna iatu katorrong-torronganna PUANG tae’pa natoyang dio mai kaleki:

BATING 2:19

Millikko ammu sumarro ke bongi, ke randukoi pa’kampan, barrakanni tu penaammu susito uai dio oloNa Puang, popempala’i tu limammu langngan Puang belanna sunga’na anakmu, tu ma’ipu napobua’ katangdiaran dio lu mintu’ kasepangan lalan.