HOSEA 9:4 - Sura' Madatu

⁴ Tae’ anna untedokan uai anggoro’ PUANG tu tau iato mai, sia tae’ anna alai penaanNa Puang tu pemala’ pangrere’na; disanga kande ro’ lako kalena tau iato mai; mintu’ tau tu ungkandei urruttakki kalena, belanna iatu roti iato la napokandena siamo, sia tae’ anna ma’din dibaa tama banuanNa PUANG.

HOSEA 9:4 Referans Kwoze

HOSEA 8:13

Umpennoloan pemala’ tu tau iato mai, iamo tu duku’, anna kandei. Apa tae’ nakalo’i penaanNa PUANG to; totemo Nakilalaimo Puang tu kakadakeanna tau iato mai sia Naukungi diona tu kasalanna; la sule tu tau iato mai lako Mesir.

YEREMIA 6:20

Iamoto apara gai’na mibanNa’ tu dupa dio mai Syeba sia bangle mellong dio mai tondok mambela? Iatu pemala’ pantunu pu’pu’mi tang nakalo’ penaangKu sia iatu pemala’ pangrere’mi tang Kupopaiman.

PA’TOLE 26:14

Iatongku ma’pote dibolong tae’ kukandei sia tae’ kualai moi misa’ tu apa tongku maruttak, sia tae’ kusorongi tu misa’ apa lako pa’tomatean, sangadinna kuperangii tu gamaranNa PUANG, Kapenombangku, sia kupogau’ unturu’i tu mintu’na apa Mipasan lako kaleki.

YOËL 2:14

Mindara unnissanni, den sia manii upa’ anNa sule sia menassan sia untampe pa’kamasean dio boko’Na, la dipokande dipemalaran sia pemala’ pantedok lako PUANG, Kapenombammi.

HOSEA 3:4

Belanna iatu to Israel la masai torro tang didatui, tang diarungi, tang memala’ sia tae’ batu dipodeatanna, tae’ epo’na ba’tu balo’ taunna.

YEHEZKIEL 24:17

Pela’-pela’ko sumarro; da muma’pote dibolong; pamanda’ bangi tu passapummu, sia ma’sepatuko, da mutampun puduk daoanmu sia da mukandei tu roti nabangko tau.

YOHANES 6:51

Akumote tu roti tuo, tu lu dao mai suruga; iake denni tau misa’ ungkandei te roti iate, la tuo sae lakona; na iatu roti la Kupa’bengan iamotu kaleKu, la napotuo issinna te lino.

MALEAKHI 2:13

Iatu ma’penduanna mipogau’, susite, iamotu mipasitutu’i uai matammi tu inan pemalaranNa PUANG, ke tumangi’komi sia sumarro, belanna tae’mo Nasailei tu pemala’ sia tae’mo Natarimai diong mai limammi butung to apa nakalo’ penaanNa.

AMOS 5:22

Ondongpi, moi ammi pennoloan pemala’ ditunu pu’pu’ lako Kaleku, sia kande dipemalarammi, tae’ kuporai sia iatu pemala’ kasalamarammi, iamotu sapi malompo inang tae’ duka Kula untiroi.

YOËL 1:13

Ma’tambeke’komi sia unnurrukkomi, e kamu mintu’ to minaa; sumarrokomi e mintu’ to untoe pentoean dio inan pemalaran; maikomi ammi ma’bongi ma’pote dibolong, e kamu to untoe pentoeanna Kapenombangku, belanna iatu kande dipemalaran sia pemala’ pantedok dipatoyang dio mai banuanNa Kapenombammi.

YEHEZKIEL 24:22

Sia la mipogau’ susitu mangkanna kupogau’; tae’ ammi la untampunni tu puduk daoammi, sia iatu roti nabangkomi tau, tae’ mila ungkandei,

YESAYA 66:3

Minda-minda urrere’ misa’ sapi, samanna umpatei tau; minda-minda umpemalaran anak domba, samanna to ulle’to pasallo asu; minda-minda umpennoloan kande dipemalaran, samanna to umpemalaran rara bai; minda-minda untunu dupa napopemala’ kapengkilalan, samanna umpudi dipa’deatainna. Susitu tau iato mai unturu’ lalan pa’poraianna, sia umposende penggauran megi’giranna,

YESAYA 57:6

Dio lu to’ batu malangngo’ diong lombok nanii tu taa ma’parongko’mu; iamotu ussukaranni dalle’mu, lako batu iato munii untongkai tu pemala’ pantedok sia munii umbaa kande dipemalaran. La Kupomatanaraka tu apa iato?

KADIBILANGAN 28:2

La mupasan tu to Israel sia pokadanni, kumua: la mikanandai mipennoloanni lako Kaleku tu pemala’ dipemalaran lako Kaleku, iamotu kandeKu, dipopemala’ pantunu, dipobau busarungngu’ dio oloKu, lan attu dipamanassa.

SURA’ KATOMINAAN 21:21

Iatu mintu’ bati’na Harun, to minaa, minda-minda tu tattan kalena, tae’ nama’din mareke’ la umpennoloan pemala’ pantunu, dipemalaran lako PUANG; den tattanna, iamoto natae’ nama’din mareke’ umpennoloan kinandeNa Kapenombanna la umpemalaranni.

SURA’ KATOMINAAN 21:17

Kuako lako Harun, kumua: Minda-minda tu bati’ siosso’mu tu tattan kalena tae’ nama’din mareke’ la umpemalaran kinandeNa Kapenombanna.

SURA’ KATOMINAAN 21:8

La mubilang masero, belanna umpemalaran kinandeNa Kapenombammu; iamoto sipatu la mupamasero, belanna maseroNa’, Aku tu PUANG umpamaserokomi.

SURA’ KATOMINAAN 21:6

La masero tu tau iato mai dio oloNa Kapenombanna sia da napamatunai tu sanganNa Kapenombanna, belanna tau iato mai umpennoloan pemala’ pantunu, dipemalaran lako PUANG, iamotu kinandeNa Kapenombanna; iamoto sipatu la masero tu tau iato mai.

SURA’ KATOMINAAN 17:11

Belanna iatu penaa duku’ lan rarana sia mangkamokomi Kuben dao inan pemalaran la umpadenan kadiseroian kasalan penaammi, belanna iatu rara umpaden kadiseroian kasalan tete dio penaanna.

KATASSURAN 40:23

Napalenna’mi tu roti dao, napasirundunan melo dio oloNa PUANG, susitu Napepasanan PUANG lako Musa.

KADIBILANGAN 19:11

Minda-minda ungkaka’ batang rabukna sala umbanna misa’ tau, la maruttak pitung allo.

KADIBILANGAN 4:7

La nasamboi duka sampin lango-lango tu meda nanii roti dipennoloan, napatorroi dao piring, dolong-dolong, balubu sia sere’ dipa’bolloan; sia roti dipatontong bang, la torro dao.

KATASSURAN 29:40

sisola taa sangpulona ta’pung mani’sa’ dipasigerok minna’ dilambuk, taa a’pa’ hin sia misa’ pemala’ pantedok taa a’pa’ hin uai anggoro’ la dipasisola tu anak domba misa’na.

YEREMIA 16:7

Sia tae’ tau sae unti’pek-ti’pek roti tanda maindunna la umpakatana to kamatean, sia la umbenni pangiru’ pa’pakatana, moi anna ambe’na ba’tu indo’na.

DANIEL 1:8

Iatu Daniel napamanassamo lan penaanna, kumua tae’ nala urruttakki lenni kandena datu sia uai anggoro’ nairu’ datu, tu kalena; iamoto anna messiman lako pangulu to mase’ponna datu, kumua da anna ruttakki lenni tu kalena.

YOËL 1:9

Iatu kande dipemalaran sia pemala’ pantedok dialai dio mai banuanNa PUANG; iatu mintu’ to minaa, iamo tu to untoe pentoeanNa PUANG rossomo penaanna.

HOSEA 7:16

Messaile sia tu tau iato mai, apa tae’ nalu langngan; butungi to misa’ pana disanga melo, apa tae’mo gai’na. Iatu mai arungna la tibambang nakande pa’dang natumang kada layukna. Dionamo to nanii tau ullo’boi lan lu tondok Mesir.