HOSEA 4:6 - Sura' Madatu

⁶ Iatu taungKu la sanggang, belanna tae’ kapaissananna. Belanna mutumpu tu kapaissanan, iamoto angKu tumpuko, damo mutoe toean to minaa dio oloKu; belanna tae’mo mukilalai tu Sukaran alukNa Kapenombammu, iamoto natae’ dukamo Kula ungkilalai tu bati’mu.

HOSEA 4:6 Referans Kwoze

YESAYA 5:13

Iamoto anna dipali’ tu taungKu, belanna tae’ pengkilalanna sia mintu’ to mala’bi’na la mangelo sia iatu to kamban la mandasa-dasa diona kama’rangan.

SARAMBU PEADA’ 19:2

Moi natutuki’ ke tang unnampuiki’ tangnga’ melo, tae’ gai’na, naminda-minda lumingka tarru’ matira’, madomi’ bang tilende’.

HOSEA 6:6

Belanna nakalo’ penaangKu tu kamamaliran, tangia pemala’ pangrere’; sia kapaissanan diona Puang Matua, tangia pemala’ ditunu pu’pu’.

HOSEA 4:1

Perangii tu kadanNa PUANG, e to Israel, belanna den apa Napasalanni PUANG tu pa’tondokan, belanna tae’mo kamarurusan, tae’mo kamamasean sia tae’mo kapaissanan diona Puang Matua lan tondok iato.

MATIUS 15:8

Manassa iate tau iate pudukna manna ungkasiri’Na’, apa iatu penaanna tae’ nalattu’ lako Kaleku.

HOSEA 8:14

Ondongpi nakalupaimo Israel tu To tumampana sia umpabendan tongkonan layuk, tonna marassan to Yehuda umpebudai kota ditambakuku. Apa la Kupasonglo’ tu api tama kota iato mai, anna purai nakande tu mintu’ tambakukunna.

YESAYA 17:10

Belanna mukalupai tu Puang Matua oto’na kasalamarammu sia tang mukilalaimo tu Buntu batu pentirerungammu. Iamoto ammu garaga pa’lak ballo, sia mutananni tananan to salian lembang.

YEREMIA 2:8

Iatu mintu’ to minaa tae’ nama’kada kumua: Umbara Nanii tu PUANG sia mintu’ tu to sikambi’ sukaran aluk tae’ namorai untandaiNa’ sia mintu’ to mangkambi’ memboko’ dio mai Kaleku sia mintu’ nabi ma’nubua’ nalopian Baal sia unturu’ kapenomban tae’ gai’na.

2 OSSORANNA DATU 15:3

Masai allomo tu to Israel tae’ Kapenomban tonganna, sia tae’ to minaanna, tu ma’pangada’, sia tae’ tu sukaran alukna.

HOSEA 13:6

Iatonna dikambi’imo, dipedia’imi tu tau iato mai. Iatonna dia’mo umpamadaomi penaanna: iamoto anna tang ungkilalaiNa’.

YESAYA 1:3

Iatu sapi natandai iatu puangna sia iatu keledai natandai iatu palunganna puangna, apa iatu Israel tae’ paissanna, sia iatu taungKu tae’ inaanna.

YEREMIA 4:22

Belanna tang paissan tu taungKu sia tae’ natandaiNa’; iatu tau iato mai susito pia baga sia tang keinaa; manarang umpogau’ kadake, apa tae’ naissanni umpogau’ melo.

AYUB 36:12

Apa, iake tang ma’perangii, namangsanni kandean doke sia ka’tu sunga’na lan katangpaissananna.

YEREMIA 5:21

Perangiimi te, e bangsa baga sia tae’ tangnga’na, tu kemata, apa tae’ napatiro, tu ketalinga, apa tae’ naparangi.

YESAYA 3:12

Iatu taungKu naparenta pia’-pia’ sia napatunduk baine. E mintu’ taungKu napapusakomi panglalanmi sia nabutai tu lalan sipatu la miola.

PA’PUDIAN 119:139

Nabonnongmo’ kamukkunangku, belanna naboko’imo mintu’ ualingku tu kadamMi.

PA’PUDIAN 119:61

Natekkemo’ poyana mintu’ to tang mekaaluk, apa tae’ angku kalupai tu sukaran alukMi.

MATIUS 15:14

Elo’na ia namale. Perenden butanna ia to buta tu tau iatu mati’. Iake to buta urrenden to buta, inang la tobang sola duai rokko garuang.

HOSEA 8:12

Moi angKu surasanni pessangpulo sa’bunna tu Sukaran alukKu, apa inang nasanga iate apa iate lu dio mai to tama sae.

HOSEA 8:1

Padioi pudukmu tu napiri tanduk. Susi misa’ langkan maega tu kasanggangan sae urrampoi banuanNa PUANG! Belanna natengkaimo tau iato mai tu basseKu sia nabali-bali tu Sukaran alukKu.

HOSEA 4:12

Iatu taungKu mekutana lako kayunna, natekkenna ma’patudu. Belanna misa’ penaa ma’patudu lako gau’ sala umpapusa tau iato mai, naurunganni ma’gau’ sala umboko’i Kapenombanna.

HOSEA 2:13

Iamoto manassa la Kunaran sia la Kusolan tama padang pangallaran sia la ma’kada malamma’Na’ lako kalena.

1 SAMUEL 2:12

Iatu mai anakna muane Eli sala’ kedo, tae’ nadampangi tu PUANG sia iatu katongananna sia taana to minaa, ke to buda sae memala’.

YESAYA 45:20

Sipulungkomi ammi pada sae mengkareke’, e kamu tu tilendokmo dio mai ma’rupa-rupa bangsa. Tae’ tangnga’na tu tau iato mai tu umbaa rapang-rapang dipodeata kayu anna penombai tu deata tang nakulle patunduan.

YESAYA 27:11

Ianna marangkemo tu mai tangkena, direbong-rebongmi, anna sae tu mai baine umballai; belanna inang tae’ inaanna te bangsa iate, iamoto anna tae’ Nakatirinnai To pagaraganna sia tae’ anNa katuru-turui To kumombongna.

YESAYA 28:7

Ia duka te tau iate mai re’ba len napobua’ uai anggoro’ sia tumbang len naginta’ tuak palango; moi dukato minaa sia nabi re’ba len napobua’ tuak palango, pusa natumang uai anggoro’, tumbang len napobua’ tuak palango, tire’ba len lan patiro mendeata, titu’mu’ len untingayo pa’bisaran.

MATIUS 1:6

Na Isai undadianni tu Daud, datu. Anna Daud undadian Salomo dio baine umbalui Uria;

PA’PUDIAN 119:153

Tiroi tu kamandasangku, amMi rampananna’! Belanna tae’ angku kalupai tu sukaran alukMi.

SARAMBU PEADA’ 10:21

Iatu pudukna to malambu’ umpamakarimman buda tau, apa iatu to baga umpomate kataeranna tangnga’ kinaanna.

YEHEZKIEL 44:23

Anna pamanassanni taungKu umpasisengaranni tu maindanna anna tang maindanna, sia tang maruttakna anna maruttakna.

HOSEA 4:14

Tae’ angKu la umpapakkanni tu gau’ salana tu mai anakmi baine sia tu pasandak salunna tu mai minintummi baine. Belanna ia kalena tu tau iato mai male senga’ ussolan baine bualang, sia umpennoloan pemala’ sola to ma’gau’ sala dio to’ dipa’deatainna. Susimo to tu bangsa tae’ inaanna manassa la sanggang.

HOSEA 5:4

Tae’ anna eloranni tu penggauranna la mengkatoba’ lako Kapenombanna. Belanna den penaa pa’gau’ sala torro lan ba’tengna, sia tae’ natandai tu PUANG.

HOSEA 7:9

Napurai to salian lembang tu kamawatanganna, apa tae’ nasa’dingi. Ondongpi nasitutu’imo uban, apa tae’ naissanni.

HOSEA 7:11

Susi bang bu’ku’ baga tu Efraim, tae paissanna. Natambai tu Mesir la untundui, namaleo lako Asyur.

PA’PUDIAN 18:27

Sia lako to masallo’, Mikasallo’i duka. Apa lako to leko’ penaanna, Miuali.

YESAYA 29:12

Ba’tu iatu sura’ iato diben to tang naissan ma’basa nakua: Basaika ade’ te, apa mebali nakua: Tang kuissan aku ma’basa.

HOSEA 9:17

La Natibe Kapenombangku tu tau iato mai, belanna tae’ naperangii; iamoto anna salamba salao dio lu mintu’ bangsa.