HOSEA 2:17 - Sura' Madatu

¹⁷ Iake allo iato la sibasseNa’ tu olo’-olo’ dio lu padang napomeloi tau iato mai, sia iatu manuk-manuk dao lu langi’ sia olo’-olo’ mendonglo’ dao kuli’na padang. Attu iato la Kule’to tu pana sia pa’dang sia mintu’ pa’buno lan tondok, angKu patorro marampa’i tu tau iato mai.

HOSEA 2:17 Referans Kwoze

KATASSURAN 23:13

Iatu mintu’ apa Kupokada lako kalemi la mikanana’i; iamotu tae’ muma’din la ussa’bu’ sanga deata senga’, da natassu’ len dio pudukmu to.

PA’PUDIAN 16:4

Sitodon tampomo tu kamaparrisanna, to umpengkanorongi (deata) senga’! Nokana’ untedokki tu mai rara napenomban tau iato mai, ba’tu ussa’bu’i randan dipudukku tu sanganna.

YOSUA 23:7

Da misikadamak tu bangsa torropa misisolan sia da misa’bu’i tu sanganna deatanna sia da mipalao sumpa tete dio sanganna sia da mipengkaolai ba’tu tukku umpenombai.

ZAKHARIA 13:2

Sia allo iato, kadanNa PUANGna mintu’ ma’dandan maritik, la Kuputtai tu sanga dipa’deatainna lan mai tondok iato, naurunganni tae’ lenmo nala ungkilalai tau iato mai; sia ia duka tu mintu’ nabi sia penaa bulituk la Kupa’dei lan mai tondok.

YEREMIA 10:11

– La susi kadammi lako tau iato mai, kumua: Iatu mintu’ deata, tu tae’ napadadi langi’ sola lino, la pa’de dao mai kuli’na padang sia lan mai nasambo langi’, –

KATASSURAN 15:1

Attu iato napenaniammi Musa sola to Israel tu nanian iate umpudi PUANG, nakua: La menanina’ umpudi PUANG, belanna matande tongan tu kamala’biranNa, Napembuangan tu darang sia to ussakei tama tasik.

YOSUA 7:26

Mangkato napabendannimi tau misa’ tombonan batu daona lu, tu tontong sae lako allo iate. Namane PUANG umparapa’i tu kare’dekanna ara’Na. Iamoto nasangai tau tu inan iato lombok Akhor sae lako allo iate.

YEREMIA 2:2

Maleko umpokadai anna rangii mintu’ tau lan Yerusalem, kumua: Nakua kadanNa PUANG: Kukilalaipa tu kamamalirammu tommu mangura sia pa’kaboro’mu tommu ma’rampanan kapa’, tommu turu’Na’ lan padang pangallaran, iamotu dio lu padang tang dipantananni.