HOSEA 11:10 - Sura' Madatu

¹⁰ Iatu tau iato mai la undi urrundu’ PUANG, la umburrung-burrung susi singa. Iake umburrungI, iatu mintu’ pia muane la sae dio mai rampe matampu’ sipa’parondoan.

HOSEA 11:10 Referans Kwoze

AMOS 1:2

Inde sia tu kadanna, nakua: Iatu PUANG umburrung lan mai Sion sia umpa’perangian gamaranNa lan mai Yerusalem, naurunganni mario-rio tu padang kariuanna to mangkambi’ sia marangke tu botto Karmel.

YOËL 3:16

Iatu PUANG umburrung lan mai Sion sia umpa’perangian gamaranNa lan mai Yerusalem, naurunganni tigega’ tu langi’ sia lino. Apa PUANGmo tu misa’ pentilindungan lako taunNa sia misa’ kota tambakuku lako to Israel.

YESAYA 31:4

Inde sia tu kadanNa PUANG lako kaleku, nakua: Susito misa’ singa ba’tu anak singa umburrungi pealanna, moi anna pomarambai sangtuntunan pangkambi’, tae’ duka natiramban sia tae’ napomataku’i tu kamarambanna tau iato mai –, susi dukamoto tu PUANGna mintu’ ma’dandan maritik la mengkalao rokko buntu Sion sia tanetena la parari.

YEREMIA 25:30

La ma’nubua’ko umpokadanni tau iato mai te mintu’ kada iate, kumua la sumadang tu PUANG dao mai masuanggana sia la umpemandui gamaranNa dao mai isungan maindanNa; la sumadang-madang unggarrakki tu pangleonNa; la unnarrakki mintu’ tu untongkonni kuli’na padang, susi arrakna to manglullu’ bua angoro’.

YEREMIA 31:9

Anna sae tu tau iato mai situang tangi’na, AngKu solanni natontong mengkamoya-moya; la Kusolan lako to’ salu’-salu’ dio lalan marante, tu tae’ nanii titodo lette’na. Belanna Aku napoambe’ Israel na Efraim iamo anak pa’bunga’Ku.

YESAYA 64:2

susi api undukkui ranga’-ranga’ sia ten to api umpopa’kalimbuang uai la umpa’peissananni tu sangamMi lako mintu’ ualimMi, kumua anna ma’parondo mintu’ bangsa dio oloMi,

2 PETRUS 2:10

ondong polepi tu to umpalolang kalena unturu’ kamoraian pa’kalean lan kamailuan masarepa, sia tang umbilang mintu’ kapaan. Barani sia umpattuan penaanna sia tang magiang ullangdo mintu’ tu mai disanganna mala’bi’,

ROMA 8:1

Iamoto totemo tae’mo ukunganna tu to lan Kristus Yesu.

PENGGAURANNA RASULU’ 24:25

Apa iatonna uleleanni Paulus tu diona kamalamburan sia diona kauntaloian kale sia iatu kadipaolaian salu, mataku’mi tu Feliks, nama’kada nakua: Da’ito laomoko, nadennopa palambi’ku kutambaiko.

YOHANES 8:12

Ma’kada pole’omi Yesu lako tinde tau nakua: Akumote tu arrangna lino. Minda-minda unturu’Na’, tae’ nala lumingka lu lako lu dio mai lan malillinna, sangadinna la den arrang katuoan dio.

ZAKHARIA 10:12

La Kupabatta’ tu tau iato mai tete dio PUANG, anna lolang tete dio sanganNa, kadanNa PUANG.

ZAKHARIA 8:7

Inde sia tu kadanNa PUANGna mintu’ ma’dandan maritik, Nakua: Tonganna la Kurampanan tu taungKu dio mai tondok kabu’tuan allo sia dio mai tondok kalambunan allo.

HABAKUK 3:16

Iatongku rangii tu iannato, ma’rundedemi tu ba’tengku, bannang dio oni iato anna ma’parondo tu pudukku, sia langgang tu bukungku, angku ma’parondo dio inan kunii bendan; moi susito la rapa’na’ umpeagii tu allo kapussakan, ke narampoi tu bangsa iato, tu ma’tuntunan sae ullaoikan.

MIKHA 4:5

Belanna mintu’ bangsa pantan lolang tete dio sanganna deatanna, apa iatu kita la lolangki’ tete dio sanganNa PUANG, Kapenombanta, tontong sae lakona.

AMOS 3:8

Iake umburrung-burrungi tu singa, mindara tang mataku’? Iake ma’kadami tu Puangta PUANG, mindara tang ma’nubua’?

AMOS 3:4

Ma’dinraka tu singa umburrung-burrung lan lu pangala’, ke tae’i tu kandena? Ma’dinraka tu singa mangura gumarau-rau lan mai lo’ko’na, ke tae’i apa nadammak?

HOSEA 3:5

Undinnato la mengkatoba’ tu to Israel, sia undaka’ PUANG Kapenombanna, sia Daud datunna, na sae mennolo ma’parondo tu tau iato mai lako PUANG sia lako kameloanNa, – lan attu la sae.

YEREMIA 33:9

Attu iato kota iato la dadi misa’ sanga Kupoparannu, sia kadipudian sia kadipangkeran dio lu mintu’ bangsa lan lino, tu la urrangi kareba diona mintu’ kameloan tu Kupogau’ lako tau iato mai; la tiakka’ sia tigega’ penaanna diona mintu’ kameloan sia kasalamaran tu Kupogau’ lako tau iato mai.

YEREMIA 7:9

Umba nakua? Bokomokomi sia papatean sia pasandak salu lako rampanan kapa’ sia umpalao sumpa tang tongan sia memala’komi lako Baal sia mengkaola lako kapenomban, tu tang mitandai –

YEREMIA 7:6

iake tae’i ammi pakario-rio to sae tang sia pia biung sia baine balu sia tang umpatibollo rarana to tang kasalan dio inan iate sia iake tae’i mipengkaolai tu kapenomban senga’, tu la umpabu’tuangkomi kamandasan,

YEREMIA 5:22

Tae’raka mila ungkataku’Na’, kadanNa PUANG, tae’raka mila ma’parondo dio oloKu, tu umpadadi bungin naposapa’ tasik, sia napokatonan tontong tu tang nalendu’i? Moi umbassan-bassan tu bombangna, tang nalambi’ duka lako, moi mematu-matu, tae’ duka naleanni.

YEREMIA 2:2

Maleko umpokadai anna rangii mintu’ tau lan Yerusalem, kumua: Nakua kadanNa PUANG: Kukilalaipa tu kamamalirammu tommu mangura sia pa’kaboro’mu tommu ma’rampanan kapa’, tommu turu’Na’ lan padang pangallaran, iamotu dio lu padang tang dipantananni.

YESAYA 49:10

Tang la mekatopo ba’tu mekama’rang, tae’ nala ussarussu’i angin padang aak sia tae’ nala ulla’da’i allo, belanna iatu tau iato mai la Nasolan To madulu’na sia la Naanta’ lako to’ mata kalimbuang.

YESAYA 42:13

Iatu PUANG tassu’ susi misa’ pa’barani, Natukka’ ara’Na anNa maparrang susito parari; la unnarrak-arrak parari, metalillingan tongan; la umpa’petiroan kalalonganNa unnea ualinNa.

YESAYA 2:5

Maikomi, e bati’na Yakub, la lolang lanki’ arrangNa PUANG.

PA’PUDIAN 119:120

Rumonting tu kaleku diona kametakuramMi, sia mataku’na’ belanna mintu’ pa’paolaimMi salu.

PA’PUDIAN 2:11

Mengkaolakomi lako PUANG situang kamatakuran, sia sende paimankomi situang kama’parondoan.

AYUB 37:1

Tonganna, iamorato tu napoma’rundede penaangku, sia lumo’dok diong mai to’ inanna.

KADA OMBO’ LAKO RASULU’ YOHANES 10:3

metambami umpekapuai gamaranna susi gamara singa umburrung-burrung na iatonna metamba, pantan unnonimi tu pitu guntu’.

YESAYA 66:2

Mintu’nate apa iate inang panggaraga limangKu, susimoto anna dadi tu mintu’ ma’dandan maritik, kadanNa PUANG; apa iatu tau iato Kutiro lumbang, iamotu to umpamadiongan penaanna sia to bonnong penaanna sia ungkataku’ kadangKu.

YESAYA 66:5

Tananni talinga tu kadanNa PUANG, e kamu tu ma’parondona belanna kadanNa: Iatu mintu’ siulu’mi, tu ungkabiri’komi sia ussisarakangkomi belanna sangangKu ma’kada nakua: Melo ke umpaombo’i kamala’biranNa tu PUANG, angki tiroi tu kasendeammi. Apa ia kalena la kasirisan tu tau iato mai.

YEHEZKIEL 26:16

Mintu’ arung dio biring tasik la mengkalao dao mai isungan kapayunganna anna lossokan bayu lamba’na sia ullendokan pakean disulan ma’rupa-rupa oki’na; la napennammu’ tu katirambanan; tau iato mai unno’ko’ diong lu padang sia tontong ma’parondo napobua’ katike’kenan.

YESAYA 11:11

Allo ia dukato la dadi kumua Puang la unnete’ pole limanNa la ulla’bakki sule tu taunNa tu mai torronapa, tu mai torronapa dio Asyur, dio Mesir, dio Patros, dio Etiopia, dio Elam, dio Sinear, dio Hamat na dio lu tondok ma’randan tasik.

YEREMIA 50:4

Allo iato sia attu iato, kadanNa PUANG, pada la sae tu mintu’ to Israel sola to Yehuda, situang tangi’na undaka’ PUANG, Kapenombanna.

ZAKHARIA 10:10

Ondongpi la Kusolan sule tu tau iato mai lan mai tondok Mesir sia la Kurampun dio mai Asyur, angKu solanni lako padang Gilead sia lako Libanon; apa tang la ganna’mo lako tau iato mai.