DANIEL 9:25 - Sura' Madatu

²⁵ Issanni sia tandai, kumua randuk dio mai attu tassu’na tu kada la umpemeloi sia umbangunni sule tu Yerusalem sae lako kaparentanna misa’ to ditokko, iamotu misa’ arung, den pitung minggu, sia annan pulona ndua minggu la dinii umpemeloi sia umbangunni, anna torro susito, sola tana lapangna sia kalo’na, apa siappa’ attu kadipakario-rioan.

DANIEL 9:25 Referans Kwoze

EZRA 4:24

Susito ditorroimi tu pengkarangan dio banuanNa Puang Matua dio Yerusalem, anna tadang sae lako taun ma’penduan kadatuanna Darius, datu Persia.

YOHANES 4:25

Nakuami tinde baine lako: Kuissan sia kumua la sae tu Mesias, tu disanga Kristus; ianNa sae, la Napa’peissanan lako kaleki tu mintu’nato.

YOHANES 1:41

Bunga’na sitammumi Andreas tu Simon, siulu’na, nakuami lako: Kikabu’tuimo tu Mesias, ke dipallemba’i battuananna Kristus.

YESAYA 55:4

Kupatunannangmo la ma’katottongi lako mintu’ bangsa sia la napodatu sia la napekapuangi mintu’ bangsa.

YESAYA 9:6

La kapua tu parentaNa sia tae’ upu’na tu kamarampasan dao isungan kapayunganna Daud sia lan nalili’ parentaNa, la Napabantang sia Naparandanganni katonganan sia kamaloloan randuk totemo tontong sae lakona; kamamaliranNa PUANGna mintu’ ma’dandan maritik la umpogau’i tu ianna te.

MIKHA 5:2

Iamoto la Nasa’biangan Puang tu tau iato mai sae lako attu, kumua iatu tau la kianak, kianakmo. Attu iato iatu to torropa tu siulu’na la sule sola to Israel.

DANIEL 9:23

Iatonna bunga’ pengkamoyamu, tassu’mi misa’ kada sia saemo’ umpokadangko, belanna ikomo tu tarru’ dipakaboro’. Palan penaai tu kada iato sia pariba’tengi tu patiro mendeata.

DANIEL 8:25

Sia tete dio kabulitukanna anna palaloi tu pa’pakenanna; la napakapua tu penaanna, sia nasanggangi buda tu to tae’ namangea. Sia la pabali-bali duka lako Arungna mintu’ arung, apa la sabu’ ia tang narumbu lima.

NEHEMIA 6:15

Disundunnimi tu rinding tembo’ tonna allo ma’penduangpulo llima bulan Elul, iamotu lan limangpulo ndua allona.

NEHEMIA 4:8

sia sipakulu-kulu la ke’de’ ullaoi Yerusalem sia umpamarukkai.

NEHEMIA 3:1

Ta’kala ke’de’mi tu Elyasib, tominaa kapua, sola mintu’ siulu’na, iamotu mintu’ to minaa, anna bangunni tau iato mai sule tu babangan Domba. Napamaindanmi sia napalakoi ba’bana, napamaindanmi tau iato mai sisola duka tu menara Mea na menara Hananeel.

KADA OMBO’ LAKO RASULU’ YOHANES 19:16

Dio bayu lamba’Na sia dio pupunNa den misa’ sanga disura’ nakua: Datunna mintu’ datu sia Puangna mintu’ puang.

KADA OMBO’ LAKO RASULU’ YOHANES 1:5

sia lu dio mai Yesu Kristus, tu dadi sa’bi maruru’, tu pa’bunga’ tuo dio mai mintu’ to mate, sia dadi Pangulunna mintu’ datu lan te lino. Nalako tu To-umpakaboro’ki’, sia mangkamo ulla’bakki’ raraNa, dio mai mintu’ kasalan,

PENGGAURANNA RASULU’ 5:31

Iamora Te tu napakalangka’ lima kananNa Puang Matua mendadi Pangulu sia To pakarimmanan la umpa’kamasean katobaran lako to Israel sia kadipa’deian kasalan.

PENGGAURANNA RASULU’ 3:15

Ammi patei tu Panglalan lako katuoan, apa Napamalimbangunmo Puang Matua dio mai to’ to mate, iamotu iannato tu kikatottongi.

MARKUS 13:14

Iammi kitai tu kamaparrangan megi’giran tu umpabu’tu kasanggangan, bendan dio inan tang sipatu – minda-minda tu umbasai natangnga’ mandalanni – ianna attu iato la mallai langan tanete tu to dio tana Yudea.

MATIUS 24:15

Iamoto, iammi kitami tu kamaparrangan megi’giran tu umpabu’tu kasanggangan bendan dio inan masero, susitu napokada nabi Daniel minda-minda tu umbasai natangnga’ mandalanni –

DANIEL 8:11

Umpatarompo’ duka kalena unnea arungna ma’dandan maritik, sia naputtai tu pemala’ allo-allo lako Puang sia nasongkan tu inan maindanNa.

PA’PUDIAN 71:10

Belanna mintu’ ualingku ussipakulu-kuluina’, sia iatu to undaka’ sunga’ku sama turu’ undaka’ lalan.

EZRA 7:8

Rampomi lako Yerusalem tonna bulan ma’pellima, taun ma’pempitu kaparentanna datu.

EZRA 7:1

Iatonna mangkamo tu mintu’ apa iato, tonna ma’parenta tu Artahsasta, datu Persia, ke’de’mi tu Ezra, anakna Seraya, anakna Azarya, anakna Hilkia,

2 SAMUEL 15:25

Nakuami datu lako Zadok: Baai tama kota sule tu pattinNa Puang Matua Iake Nakaturu-turui siana’ PUANG, manassa Napasule siana’ sia Napatiroi pole’na’ tu pattinNa sia kao’koranNa.

EFESUS 5:16

da mimatei punala allo, belanna attu iate, attu kadake.

PENGGAURANNA RASULU’ 8:30

Ma’dondomi tu Filipus lako narangii marassan umbasa sura’na nabi Yesaya, nakuami: Miissan siaraka tu mibasa?

MATIUS 13:23

Na iatu tiambo’na rokko to’ padang lunak, iamotu to urrangii tu kada iato anna pemanassai; namembua melo tongan, naumpakendek burana, den manglokkon pessaratu’, den pennannan pulona, den pentallungpulo.

NEHEMIA 4:2

sia ma’kada dio olona siulu’na sia mintu’ surodadu Samaria nakua: Apa todaoia napogau’ tu to Yahudi langga’? Sipaturaka la dipopa’elo’na bang tu tau iato mai? Ma’dinraka la memala’? Ma’dinraka la namangkai allo totemo? Ma’dinraka la napatuo sule tu batu tembo’ ro’pok tu nakandemo api?

TOMANGADA’ 3:3

Den tu attu papatean sia den tu attu ma’pamondo, den tu attu mangrondon sia den tu attu ma’pate’dek.

MIKHA 5:1

Na iatu iko, e Betlehem Efrata, moi ammu bitti’ dio lu mintu’ tongkonanna Yehuda, apa dio mai kalemu la nanii bu’tu lako Kaleku tu misa’ tau tu la dadi to ma’parentana to Israel, tu bu’tu tempon dio mai, dio mai allo tae’ tipamulanna.