AYUB 24:12 - Sura' Madatu

¹² Lan mai kota nanii kendek tu sarro pekaindo’na to la mate sia penaanna to bangke metamba umpalaku pa’tunduan, apa tang Napalan penaa Puang Matua tu passambayangna.

AYUB 24:12 Referans Kwoze

TOMANGADA’ 4:1

Kutiro pole’omi tu mintu’ pa’pakario-rio tu dipogau’ lan naarrang matanna allo, tiromi tu uai matanna mintu’ to dipakario-rio, namoi misa’ tae’ tau umpakatanai tu tau iato mai; rampe dio tu to ma’pakario-rio den kakuasan – namoi misa’ tae’ tau umpakatanai tu tau iato mai.

2 PETRUS 3:15

Sia sipatu la mibilang, kumua iatu pesuka’ kalandoNa Puangta umpabu’tu kamakarimmanan, susi duka tu mangka nasurasangkomi Paulus, siulu’ pa’kaboro’ta, sitinaya kapaissanan dikamaseanni.

MALEAKHI 3:15

Na totemo tapokada kumua maupa’ tu to matampo; tangia kumua manaman manna, moi naumpogau’ kakelokan, ondongpi natoba duka tu Puang Matua, anna tilendok siapa.

MALEAKHI 2:17

Mipabo’yok tu PUANG napobua’ mintu’ kadammi. Ammi ma’kada kumua: Apara kipabo’yokanNi? Iamotu belanna mikua: Minda-minda tu umpogau’ kadake iamo melo dio pentiroNa PUANG, na iatu to susito nakalo’ penaanNa; umbara Nanii tu Puang Matua umpaden ukungan?

YESAYA 52:5

Apa totemo apara kukarampoi inde te? kadanNa PUANG. Belanna iatu taungKu dibaa moi tae’ bannangna, sia mintu’ tu to untaloi maramba, kadanNa PUANG, sia tontong dipa’kada solangi tu sangangKu tu’tu’ allo.

PA’PUDIAN 109:22

Belanna iatu aku te mandasa sia mase-mase, sia bangke tu penaangku lan ba’tengku.

PA’PUDIAN 69:26

Nake makarorrongi tu lili’na pangosokan tendana, nake tang nanii tau lan tu tendana.

PA’PUDIAN 50:21

Susimoto tu penggaurammu, apa ma’loko-lokoNa’; musanga kumua iatu Aku te susiNa’ iko! Apa la Kuada’ko, sia la Kupatama tangnga’mu tu mintu’nato.

PA’PUDIAN 12:5

Iamotu mintu’ to ma’kada nakua: Lilaki la kipopatalo! Sia pudukki umpangeaikan; mindapara tu la umparentakan?

AYUB 9:23

Iake ta’pa napatei ulang pebambaNa, Napetaai Puang tu kabuyuranna to tang sala.

TO PARENGNGE’ 10:16

Iatu rapang-rapang dipodeata dio lu tau iato mai natibemo, anna umpengkaolai PUANG; attu iato tang masemo penaanNa Puang untiroi tu kamandasanna to Israel.

KATASSURAN 22:27

Belanna iamannato tu perampangna, tu narampangan kuli’na; apa pole’pa senga’na tu la napennammu’ mamma’? Tonganna ianna meongli’ lako Kaleku, manassa la Kuperangi tu peongli’na, belanna Aku te maturu-turuNa’.

AYUB 9:24

Iatu lino disorong tama kuasanna to tang mekaaluk sia Natampun Puang tu lindona to ma’paolai salunna; iake tangia Puang umpogau’i, minda pole’opa?

AYUB 24:11

Dio alla’na da’dua kalada’ nanii tu tau iato umparra minna’ sia nalullu’ tu bua anggoro’ lan pa’parran anna ia kalena ma’rang tongan.

AYUB 24:13

Iatu to senga’ sangbilangan ualinna masiang, tae’ natandai tu batattaNa sia tae’ natorro dio lalanNa.

KADADIAN 4:10

Nakuami PUANG: Apara tu mangka mupogau’? Iatu gamara rarana adimmu metamba diong mai padang lako kaleKu!

PA’PUDIAN 10:13

Matumbai anna tontong bang tu to tang mekaaluk umbelle’ Puang Matua, sia nakua lan penaanna: Tae’ amMi la mepapakkanni?

YEREMIA 12:1

TonganKomi Kamu o PUANG, ke la sikara-karaki’; apa moi susito, moraina’ la sipa’kada Puang diona tu mai apa malambu’, kumua: Ma’apai anna maupa’ tu lalan to tang mekaaluk, sia manaman bang ia tu mintu’ to ma’kedo tang maruru’?

YEREMIA 12:2

Mitananmo tu tau iato mai sia mennuaka’mo; lobo’mo sia membuamo. Moi mandappi’Komi dio pudukna tau iato mai, apa mambela dio mai ba’tengna.