Tujila 9:31 - Hudani Kielien

³¹ Ingiekude Yudaya, Jialili, Samaliyai gochudedu jiohui man pinnanshizhi hendawo. Hhela Ezhanyi zunjizhi giezho. Shenlin hhelai bayasughazho. Ingiese xianxin giesan kunla yebeiseye olodozho.

Tujila 9:31 Referans Kwoze

Loma 5:5

Xiwon matai ulie kushidaghakushi Huda matande ogisan Shenlinni tungo giezhi orekune matai zhughede kie durughawo.

Loma 15:13

Xiwon ogisan Huda ta xianxin giekude yanyanji bayasukui, pinnanni tai zhughede durughazhi Shenlinni nenlighala xiwon olon ogi gie!

Tujila 8:1

Siqifanyi alasande Saolo tunyi giewo. Ene uduse Yelusalenni jiohuii hende heizho. Shitulase chugo psedu tujila sandazhi Yudaya, Samaliyani go oronde echiwo.

Ifuso 4:12

Ingiezhi giekushi Mexihani wiliede oluzhi shentulai goude zhunbei gieghadene Mexihani beyeni hendaghane giezho.

2Gelindo 13:10

Ingiese bi tai hhende wikude ene kielienyi tande huaikushi bi tai chanlakudei zhao Ezhan made ogisan qienlighala tande gundude ulie giene giezho. Ene qienli kunni bixindaghaku pusho, hendaghaku wo.

2Gelindo 10:8

Ezhan bijiende qienli ogikushi tai qida olugha ese giezho, hendagha giezho. Bijienyi qienlii bi goujinie gofende kuaise shizhene ulie giene.

2Gelindo 7:1

Ingiese mii orentula, matande enezighan dain giesan bise beye, zhughe jieredu zannannilane waghazhi man widaghadene Hudai zunjiku zhugheghala onqienji zhiguishighaye.

Tujila 16:5

Ingiese jiohuilani kunlai xianxin gieku khiduzhezhi kun niudunie olodowo.

Tujila 12:24

Hudai kielien yebeiseye ondazhi xianxin giesan kunla olodozho.

Tujila 6:7

Hudai kielien ondazhi Yelusalende tujila zhenzhen olodozho. Tebie olon buwalaye ene xinyanni shunjizho.

Yuda 1:20

Mii orentula, ta zui zhigui xianxin gieku jierene goyalane hendagha. Shenlinyi kouizhi onxian gie.

Xibolai 4:9

Ingiese Hudai bexinlade da nie hhamuraku wine.

1Qimotai 1:4

Pse yama genzi witu guhuade, ulie baraku xienrenlai niere jilasande hhelai izhigie bu miigha giezho. Ene shiqinlade zi jianjindune, xinyanghala chengun oluku Hudai jihuade yama zoin uwo.

1Qiesalonijia 5:11

Ingiese ta chan gieku mutun nieniedene surughazhi kieliezhi nieniene hendagha.

Geloxi 1:10

Ingiedene ta udu daokude Ezhanyi pei shidaku mutun giezhi yandeliuzhe hhei bayasugha, yanyanji gou wilie jiere olon jiego khizheghazhi Hudai olon tani.

Feilibi 2:1

Ingiese Mexihai miende tande sughaku kielien, orezhi sidaghaku, Shenlinghala laiwon gieku, pse renyi, ubali xiiku bise

Ifuso 5:21

Mexihai zunjiku zhugheghala nieniene shunji.

Ifuso 4:29

Zannan kielienni nie amanda bu khizheghazhi heshide kunlade banjiku kielien kielie. Ingiese chenliesan kunde haochu wine.

Ifuso 4:16

Mexihai kouizhi nie beyei sidasunla man chigharade lienjizho. Go iyanzi zoinlane khizheghazhi nie beyeni oreku dunda fugiedazhi hendaghazho.

2Gelindo 12:19

Ta sumulase bijien izhi tai melie goyane huizho giezhou? Bijien Mexihai miende Hudai melie kieliezho. Mii orentula, bijien giesanlashi man tai hendaghane giezho.

1Gelindo 14:26

Gaijiula, qingiese matugiene? Ta hhantulakude jien kunde zeburei onshiku, surughaku, Huda uzheghasan, psedu kielien, fanyi gieku winema, enelai man kunlai hendaghaku mutun gie.

1Gelindo 14:12

Taye niekielien wo. Ta Shenlinni nenlii neiizhoma, jiohuini hendaghaku mutun jinlianji olon gie.

Loma 14:19

Ingiese matan heqituzhi nieniene hendaghakui xiacha gieye.

Loma 14:17

Hudai gojiashi ijieku, ochiku pusho, Shenlin ogisan gundan, heqi, bayasuku wo.

Tujila 2:47

Hudade doulazho. Olon kunla hhelai kuaizho. Ezhan yebeiseye kun olon jiuizho.

Tujila 5:11

Jien jiohuini kunla, pse ene shiqinyi chenliesan kunla man hende ayizho.

Tujila 20:32

Ede bi tai Hudade, hhei nenjientu daolide jiuizhi ogiye. Ene daoli tai hendagha shidane, pse taiji soyuji zhiguishisan kunlare hhantu Hudai jiachanni jienliegha shidane.