Sosolhayic̕ 8:7 - সান্তালী বাইবেল

⁷ ente jãhãe manwa tinre bako baḍaea cetʼ hoyokʼa mente unre okoe hõ bako lại daṛeaea ona do tinre hoyokʼa.

Sosolhayic̕ 8:7 Referans Kwoze

Sosolhayic̕ 10:14

Bebujko do ḍher kathako roṛa, menkhan cetʼ darae kana ona do celege bako baḍaea, ar tayomte cetʼ hoyokʼa ona do manwa okoeye lạiyaea?

Mathae 24:50

Enḍekhan guti bae ńel horakatʼ dinre ar bae baḍae akatʼ ghuṛire uni kisạ̃ṛ doe hijukʼa.

Sosolhayic̕ 9:12

Okoe hõ bae baḍaea tinreye gujukʼa mente. Cetʼleka hako do jhạlireko aṭkaokʼ ar cẽṛẽ do jhampare onkage muhin do manwa cetanre ackage hijukʼa ar muhinreye paṛaoakʼ.

Kạhtukko 24:22

ente onko cetanre maraokʼ do acʼkage hijukʼa, Probhu Isor ar raj ṭhen khon cetʼlekan muhin hijukʼ ona do okoeye baḍaea?

Mathae 24:44

Onate ape hõ sapṛao akan tahenpe, ente bape hudisetʼkan ghuṛirege Manwa Hopon doe hijukʼa.

Sosolhayic̕ 6:12

Manwawakʼ goṭa jionre uni lạgitʼ bhageakʼ do okoeye baḍaea? Uni do acʼakʼ thoṛa ar baṅ tahẽ utạrakʼ dinko umul lekae khemaoeda. Ar uniye sen len khan siń cando latarre oka hoyokʼ ona do okoeye lại daṛekea?

Sosolhayic̕ 3:22

Onateń ńelkeda, nijakʼ kạmire rạskạkʼ chaḍa ar bhage jãhãnakʼ do manwa lạgitʼ bạnukʼa. Onage uniyakʼ kuṛại do, ente uniyakʼ gujukʼ tayom cetʼ hoyokʼtae ona do okoeye udukʼ daṛekea?

Kạhtukko 29:1

Jaoge nisṛạu reakʼ katha ańjomkate hõ okoe hoṛ hoṭokʼ keṭecʼgeye dohokatae uni do ackageye jarkharokʼa; ar bae teṅgo ṭarhao daṛeakʼa.

Sosolhayic̕ 7:14

Suk dinkore rạskạkʼme; menkhan duk dinre do niạko katha hudisokʼme, Isor cetʼleka suke dohoakatʼ onkage duk hõe dohoakada, jemon manwa do acʼakʼ tayom din reakʼ cetʼge aloe baḍae daṛeakʼ.

Ester 5:12

Hamane menkeda, “Eken ona do baṅ Ester rạni oka bhoje sapṛaoletʼ tahẽkan onare iń chaḍa raj sãote ar okoe hõ bako neota ocolena. Uni do gapa arhõ raj sãote ińe neota akadińạ.

Kạhtukko 27:1

Gapa din lạgitʼ do alom sarhaokʼa, ente oka hilokʼ cetʼ hoyokʼa ona do bam baḍaea.

Sosolhayic̕ 9:1

Ona iạte iń do niạko reaṅiń hudiskeda ariń ńelkeda, dhorom ar ạkilan hoṛko ar onkoakʼ kạmi do jotoge Isorakʼ tire menakʼa. Okoehõ bako baḍaea onko samaṅre cetʼ menakʼa mente- dulạṛ se edre.