Sereńko 40:17 - সান্তালী বাইবেল

¹⁷ Iń do reṅgecʼ ariń nacargea, menkhan iń reaṅ do Probhu Isorgeye dạndikʼ kana. E ińren Isor, alom biloma amkangeam ińren gokʼṛoyicʼ ar babańcaoicʼ do.

Sereńko 40:17 Referans Kwoze

Sereńko 70:5

Iń do reṅgecʼ ariń nacargea; E Isor, usạrate iń ṭhen hijukʼme. Am do ińren goṛoyicʼ ar babańcaoicʼ kanam; E Probhu, alom biloma.

Jesaea 41:17

“Reṅgecʼ ar nacarko do dakʼ reakʼko ńam baṛayeda, menkhan bako ńameda; tetaṅte alaṅ do sạkitʼ caba akantakoa. Menkhan iń Probhu Isorge onkoń roṛ ruạṛakoa; iń Israelren Isor do onko bạń bạgi giḍikoa.

Ibriko 13:6

Onate abo do dilkate bon men daṛeakʼa, Probhu Isor do ińren goṛoyicʼ, iń do bạń botorokʼa; manwa do cetʼko cekayińạ?

Sereńko 34:6

Nui nacaricʼ do Probhu Isore hohoadea; ar Probhu Isor do uniyakʼe ańjomketʼtaea ar sanamakʼ kosṭo khon uniye bańcaokedea.

1 Patras 5:7

Apeakʼ sanam dạndiko unire lade giḍikakʼpe, ente uni do ape reaṅe dạndikʼ kana.

Sereńko 54:4

Isorge iń doe goṛowạńa; ar Probhuge iń doe sapʼ dohoyińạ.

Sereńko 40:5

E ińren Probhu Isor, ḍhergetama amakʼ hahaṛa kạmiko do! Ale lạgitʼ okaṭakʼem goṭa akatʼ! Onań roṛ sodorlere, ariń lạilere ona do tishõ baṅ mucạdokʼa. Ar am leka do okoe menaea?

Jakob 2:5

E ińren dulạṛiạ boehako, ańjomtińpe. Dhạrti secʼte okoeko reṅgecʼge, onkoge cetʼ Isor do biswạsre kisạ̃ṛokʼ lạgitʼ bae bachao akatʼkoa? Okoe Isorko dulạṛede kan onko do uni okaṭakʼ rajosṭi udukʼako lạgitʼe gokʼatʼko tahẽkan ona rajosṭiren bhạgiyạdarko hoyokʼ lạgitʼ cetʼ noko reṅgecʼ hoṛko bae bachao akatʼkoa?

Sereńko 86:1

E Probhu Isor, ińakʼ katha luturakʼtińme ar roṛ ruạṛạńme, ente iń do nandan ariń nacargea.

Sereńko 69:33

Probhu Isor do nacarkoakʼ kathae ańjoma; ar uniren hoṛko, okoe do bundi dosare menakʼko, onko do nicạṛ mẽtʼte bae ńelkoa.

Johan sodor 22:20

Okoe noako reaṅe gohayetʼkan uni doe meneda, “Sạrige iń do ạḍi usạrageń hijukʼkana.” Amen. Probhu Jisu, dela hijukʼme.

1 Patras 2:23

Hoṛko tinre uniko henostawadea unre uni do onko bae henostawatʼkoa, ar duk jom jokhecʼ hala ruạṛako lạgitʼ botor hõ bae udukʼatʼkoa, bickom acʼ do dhorom bicạricʼ ṭhengeye jimạyena.

2 Korinthiko 8:9

Ape do aboren Probhu Jisu Mạsiyakʼ daya dan reakʼ kathape baḍaegea, uni do apnartetʼe kisạ̃ṛgere hõ ape khạtirteye reṅgecʼena, jemon uniyakʼ reṅgejokʼ hotete apepe kisạ̃ṛ daṛeakʼ.

Mathae 8:20

Jisu do uniye metadea, “Toyoko do bhugạkʼ menakʼtakoa ar cẽṛẽkoakʼ hõ tukạ menakʼa, menkhan Manwa Hopon do bohokʼ dohoytae lạgitʼ jaega hõ bạnukʼtaea.”

Sereńko 109:22

Iń doń nacar ariń reṅgecʼgea; iń do ontore dukiń ńam akada.

Sereńko 34:4

Iń do Probhu Isoriń hohowadea, uni doe ańjomketʼtińạ; ar ińakʼ sanam botor khon uni doe bańcaokedińa.

Sereńko 35:27

Dhorom horteń calakʼkan, noa katha ańjomkate okoeko rạskạkʼkan onko do kusiteko hulạsokʼma. Ar jao ghuṛigeko men ma, “Probhu Isorakʼge sarhao hoyokʼtaema; uni do acʼren gutikoakʼ bhạlại iạteye kusikʼ kana.”

Jesaea 25:9

Enhilokʼ hoṛko mena, “Ńelpe, nui kangeae aboren Isor do; abo do uni koyokʼ horrege bon tahẽkana jemone bańcao daṛeabon. Uni kangeae Probhu do; abo do uni koyokʼ horre bon tahẽkana. Dela, abo do uniyakʼ bańcao kạmi iạte rạskạ arbon hulạsokʼma.”