Sephaniạ 3:5 - সান্তালী বাইবেল

⁵ Unireye tahenkan Probhu Isor doe dhoromgea; uni do bae behoka; uni do setakʼre acʼakʼ dhorom bicạre udukʼeda; oka hilokʼ hõ bae gạphileda. Menkhan bedhorom kạmikoakʼ lajao do bạnukʼtakoa.

Sephaniạ 3:5 Referans Kwoze

Dosar Biboron 32:4

“Uni kangeae asray buru do, uniyakʼ kạmi do sạbitgetaea; uniyakʼ sanam horko do hok reakʼ kana. Uni do ṭekʼhãḍicʼ Isor kanae, unire jãhãn behokakʼ do bạnukʼanaṅ; uni do sạri are dhoromgea.

Rak̕joṅ 3:23

Din hilokʼ setakʼ jokhecʼ ona do nãwã arokʼkana; uniyakʼ pạtiạr do maraṅgetaea.

Sereńko 145:17

Probhu Isor do acʼakʼ sanam horreye dhoromgea, ar sanam kạmireye pạtiạrgea.

Sephaniạ 3:15

Probhu Isor do amakʼ sạjạiye sạṅgiń giḍiakada, uni do amren bạirikoe laga ńir akatʼkoa. Israelren raj Probhu Isor do am talare menaea; am do ar tishõ bin bhạlạiyakʼ do alom botorakʼa.

Jesaea 28:19

Ar tinạkʼ dhao ona pheḍ hijukʼa unạkʼ dhaogepe dal ocokʼa; aṅga marsalokʼ khon setakʼ hạbicʼ, siń ar ńindạ ona do kajakte pheḍ hijukʼa. Niạ kathape bujhạule khan torasge hoyokʼtapea.”

Sephaniạ 3:17

Amren Probhu Isor do amrege menaea, ar rurukhiyạme lạgitʼ daṛe menakʼgetaea. Uni do am reaṅ ạḍiye rạskạkʼa ar uniyakʼ khạndri dulạṛ reakʼ tirpitokʼte uni doe thir hapekʼa. Ar am reaṅ rạskạteye sereńa.”

Jesaea 12:6

E Sionren hoṛko, ape do andoṛpe ar rạskạte sereńpe, ente Israelren uni sonoticʼ do maraṅgeae ape talare.”

Dosar Biboron 23:14

Ape rukhiyạpe lạgitʼ ar aperen bạiriko apeakʼ tire soprotko lạgitʼ aperen Probhu Isor do apeakʼ ḍera talareye dãṛãna. Onate apeakʼ ḍera do sonotpe dohoya jemon ape talare hirkhạwakʼ jãhãnakʼ ńelte aloe dea giḍipe.

1 Patras 1:17

Isor Baba do mimitʼ manwakoakʼ kạmi lekae bicạrkoa, uni do mẽtʼãhã ńelte bae bicạra. Onate Baba mente unipe hohowaekan khan, enḍekhan noa dhạrtire tinạkʼ din upriạ leka menakʼpe unạkʼ din uni botorae salakʼ din khemaope.

Romiko lạgitʼ Pạul Apostolakʼ ciṭhi 3:26

Onate ńitokʼ sạbudokʼ kana je, acʼ cetʼlekae dhoromge onkage Jisure pạtiạukʼicʼ hõ dhorom menteye ataṅea.

Sakariạ 2:5

Probhu Isore meneda, uni acʼtetʼge ona beṛhaete seṅgel reakʼ pạcriye hoyokʼa ar uni do acʼakʼ ṭhonokte onḍeye tahena.’ ”

Sereńko 37:6

Unige amakʼ dhorom do marsal lekae jhak jhak ocoytama; ar amakʼ dhorom kạmiko do tikin reakʼ setoṅ lekae hoeocoya.

Jobakʼ 34:10

“Onatege E bujan hoṛko, ińakʼ katha ańjompe. Isor khon bạṛicʼakʼ kạmi do sahaṛ akae baṛe tahenma.

1 Korinthiko 4:5

Onate Probhu Isore hijukʼ lahare, metakʼme ona niṭ akan din lahare okaṭakʼ hõ alope bicạra. Ńutre oka okoge menakʼ uni do unre ona marsalteye ạguya ar manwa ontor reakʼ okoakʼ monsubạkoe sodora. Unre mimitʼ hoṛ do Isor ṭhen khon sarhaoko ńama.

Romiko lạgitʼ Pạul Apostolakʼ ciṭhi 2:5

Menkhan amakʼ mon do keṭecʼgea; am do kại khon mon ạcur bam khojkana. Onate Isorakʼ edre tis sodorokʼ, enhilokʼ lạgitʼ amakʼ bakhra sạjạyem sõcjoṅ kana. Ar unrege Isorakʼ dhorom bicạr do sodorokʼa.

Luk 12:2

Oko reakʼ sanamakʼ do sodorokʼa ar danaṅre menakʼ jotowakʼ do baḍaeyokʼa.

Sephaniạ 2:1

E bin lajaokʼ jạtrenko, ape do midokʼpe ar mitʼ sãote jarwakʼpe.

Habakkuk 1:3

Cedakʼ dusṭami hoṛ ńelko lạgitʼ dom jorae moṭeńkana? Cedakʼ am do behokakʼem sahaoeda? Iń samaṅre jarkhar ar santao hoyokʼkana ar jhogṛa hõ jaoge hoyokʼkana.

Mikạ 7:9

Ńitokʼ do Probhu Isorakʼ edrele asen baṛayetʼkana, ente ale do uni upạrtele kại akada, menkhan mucạtʼre uni doe ale sejokʼa ar aleakʼ ạidạriye teṅgoalea. Uni do marsalteye oḍok ạgulea ar ale do uniyakʼ dhorom reakʼ bicạrle ńela.

Mikạ 3:11

Onḍenko mukhiyạ do ghus jomkateko bicạra, ar naekeko do ṭakate cecetʼakʼko emokʼa ar nạbiko hõ ṭaka hataokateko nạbiya. Ar Probhu Isorakʼ gokʼṛo reakʼ as dohokateko mena, “Probhu Isor do cetʼ abo talare bạnuiya? Abo cetanre jãhãn muhin do baṅ hijukʼa.”

Jeheskel 48:35

Nagraha beṛhaete bhit reakʼ jokha do hoyokʼa gel irạl hajar ḍaṅ. Ar un khon nagraha reakʼ ńutum do hoyokʼa, ‘Probhu Isor do nonḍege menaea.’ ”

Jirimiạ 21:12

‘E Dạud bõsrenko, Iń Probhu Isorgeń meneda, ape do din hilokʼ setakʼ jokhecʼ hok reakʼ bicạrtakope. Luṭ ocoakanicʼ do uniren sasantaoicʼ khonpe rukhiyạyea; ar baṅkhan apeakʼ bạṛicʼ kạmiko khạṭirte ińakʼ edre do seṅgel leka oḍokokʼte jolokʼa, ona do okoehõ bako ĩṛĩcʼ daṛeakʼa.

Jirimiạ 8:12

Onko do cetʼ akoakʼ ona bạṛicʼ kạmi iạteko lajaokʼkana? Baṅa, onko do cetʼ lajaoge bạnukʼtakoa; onko do lajaokʼge bako cetʼakada. Ona iạte onko do gurokʼko sãoteko gurokʼa. Ar tinre onkoń sạjạikoa unre onko doko tawakʼ ńur ocokʼa. Iń Probhu Isorge noa katha doń meneda.”

Jirimiạ 6:15

Onko do akoakʼ ona baṛicʼ kạmi iạte cetʼko lajaokʼ kana? Baṅa, onko do cetʼ lajaoge bạnukʼtakoa; onko do lajaokʼge bako baḍaea. Ona iạte onko do gurokʼko sãoteko gurokʼa. Ar tinreń sạjạikoa unre onko doko tawakʼ ńurokʼa. Iń Probhu Isorge noa katha doń meneda.”

Jirimiạ 3:3

Ona iạte achaṛ dakʼko akoṭokʼ kana ar niron din reakʼ dakʼ hõ baṅ hijukʼkana. Am do kusumbi ạimại lekagem ńelokʼkana; ar lajao hõ bam lajaokʼ kana.

Jesaea 50:4

Probhu Isor do sikhnạt reakʼ alaṅgeye em akawadińạ jemon katha hotete laṅga akan hoṛkoń goṛo daṛeako. Uni do dinạm hilokʼ setakʼ jokhecʼe ebhen edeńkana ar ińakʼ luture cetao ocoyetʼtińạ jemon mitʼṭen cela lekań ańjomtae.

Jesaea 45:21

Dela, mambla samaṅtape, dạkhiltape; ar mitʼsãote sopolhaepe. Niạ ghoṭna hoyokʼ ona do laha khon okoeye men akawatʼpea? Sedaeakʼ ona do lahare okoeye sodor akada? Iń Probhu Isorge cetʼ ona do bạń onka akada? Iń chaḍa ar cele Isorge bạnukʼkoa; iń do dhoromren Isor kạnạń, ar babańcaoicʼ hõ ińge. Iń chaḍa ar cele Isor hõ bạnuiya.

Jesaea 33:2

E Probhu Isor, alere dayakʼme; ale do am lạgitʼgele koyokʼ hor akada. Dinạmge setakʼ jokhecʼ ińren hoṛkoren daṛe baṛe hoyokʼme, ar muhinre bańcaoleme.

Jobakʼ 8:3

Isor do cetʼ hok upạrteye kạmikana? Sanam daṛeanicʼ do cetʼ ṭhikakʼ doe beṭhikeda?

Genesis 18:25

Noa do am lạgitʼ baṅ hoedaṛeakʼa. Bạṛicʼ hoṛko sãote dhorom hoṛkom maraoko ona do baṅ hoedaṛeakʼa. Dhạrtiren bikʼcạricʼ do cetʼ hok reakʼ bae bicạra?”

Sakariạ 9:9

“E Sion kuṛi, ma rạskạkʼme. E Jerusalem, hulạsokʼme. Ńelme amren raj do am ṭhene daraekana; uni doe dhoromgea ar uni ṭhen do bańcao menakʼa; uni doe mạ̃hirgea, ar gadha cetanre gadha hopon cetanreye decʼ hijukʼkana.

Jobakʼ 7:18

Din hilokʼ setakʼ jokhecʼ dom tolasede kana, ar jao ghuṛiyem biḍạu aṭkar edekana.

Sereńko 92:15

Onate porcarokʼa, Probhu Isor doe dhoromgea; unige ińren daṛe do ar unire jãhãn behok do bạnukʼa.

Jeheskel 18:25

“Enhõ ape dope menetʼkana, ‘Probhu Isorakʼ hor do ṭhikakʼ baṅkana.’ E Israelko, ańjompe. Ińakʼ hor do cetʼ behok reakʼ hor kana? Ona do baṅa, bickom apeakʼ kangea behok reakʼ hor do.

Hosea 14:9

Ạkilan doe okoekana? Uni do noako reaṅe baḍaema. Probhu Isorakʼ hor do dhorom reakʼ hor kana; dhorom hoṛ do ona hortegeko taṛama, menkhan bedhoromicʼ doe tohotʼ gurokʼa.

Sephaniạ 3:13

Israelren onko sarecʼ hoṛ do behokakʼ bako kạmiya; onko do eṛe katha hõ bako roṛa ar onkoakʼ moca khon phạsiaratetʼ hõ baṅ tahena. Onko do jom-ńũkate khạtirjomako jạpitʼjoṅa ar celege bako botor ocokoa.”

Hosea 6:5

Ona iạte ińren nạbiko hotete ape doń getʼ khanḍa khunḍi akatʼpea, ińakʼ moca reakʼ kathateń gocʼakatʼpea; ińakʼ bicạr reakʼ ray do ape cetanre bijli leka malkao rakapʼ akana.