Sakariạ 12:1 - সান্তালী বাইবেল

¹ Noa kangea Israel babotre Probhu Isorakʼ katha do. Probhu Isor, one okoe do sermae aṭetʼ akatʼ, okoe do dhạrti reakʼ rehetʼe bạisạu akatʼ, okoe do manwa bhitrire Jiue sirjạuakawade, uniye meneda,

Sakariạ 12:1 Referans Kwoze

Jesaea 42:5

Probhu Isor do serma sirjạukateye bel akada; uni do dhạrti ar onare oka janamokʼ onakoe aṭetʼ akada; uni do onare tahenkan hoṛko sãhetʼe emako kana ar onḍe okoeko dãṛãnkan onko do jiue emakokana. Uniye meneda,

Jirimiạ 51:15

Probhu Isor do acʼakʼ daṛete dhạrtiye sirjạu akada, ar acʼakʼ ạkiltege pirthimi reakʼ rehetʼe bạisạu akada ar uniyakʼ bujte sermae pasnao akada.

Jesaea 57:16

Iń do jaejug hạbicʼ manwa do bạń dusiyea se ińakʼ edre unre bạń dohoya. Ente iń khonge jiu do oḍokokʼ kana ar ińge jiu reakʼ sahẽtʼ doń benao akada.

Ibriko 12:9

Ona chaḍa bon ńelakada, dhạrtiren babako do aboko ḍanṭaoetʼbon tahẽkana ar abo do onko bon manotetʼko tahẽkana. Enḍekhan okoe do sanam jiukoren Baba kane unire gobol tahen do cetʼ artetʼge lek baṅkan tabona, jemon jion bon ńam?

Jesaea 48:13

Ińakʼ tite pirthimi reakʼ rehetʼ iń bạisạu akada ar jojomtite sermakoń pasnao akada; ar onakoń hohowakʼre mitʼ domte teṅgo godokʼ kana.

Jesaea 44:24

Amren Probhu Isor, okoe doe amren chakʼḍaoicʼ kan, ar okoe do kukhireye gaṛhaoletʼme uniye meneda, “Iń kangeạń Probhu Isor do; ińge jotowakʼ iń sirjạuakada. Iń do sermań aṭetʼ akada ar ińge prithimiń pasnao akada.

Sosolhayic̕ 12:7

Hasa do hasarege ruạṛ calakʼa. Isor okoe jiue emakade uni jiu do acʼ ṭhengeye ruạṛ calakʼa.

Numeri 16:22

Menkhan Mose ar Aron do otre ombakʼ hapeyentekin menkeda, “E Isor, am do sanam manwakoren babańcaoicʼ kanam. Eken mitʼ hoṛe kại akatʼte cetʼ goṭa Israel somaj cetanre amakʼ edrem sodortama?”

Genesis 2:7

Unre Probhu Isor do hasaren mitʼṭen herel manwae benaokedea ar mũreye oṅadete jiwiye aderadea. Onate manwa do jiwiyanicʼe hoyena.

Jeheskel 18:4

Jiwetʼ sanam hoṛge ińren kanako, apat ar hopon banarge ińren kanakin. Jãhãegeye kại unigeye gujukʼa.

Jirimiạ 38:16

Onate Sedekiạ raj do danaṅre Jirimiạ ṭhen kiriạyenteye menkeda, “Okoe sahẽtʼe em akawatʼ bon uni jiwetʼ Probhu Isor ńutumte kiriạkateń meneda, am do bạń gocʼmea ar okoe am gocʼme reakʼko kurumuṭukan onkoakʼ tire hõ bạń soprotmea.”

Jirimiạ 30:16

“Menkhan okoe amko ses utạretʼme onko sanamgeko marao ocokʼa; amren sanam bạiri do bondi dosareko calakʼa. Ar okoe ame luṭ akatʼme uni hõe luṭ ocokʼa; okoe amakʼ jinisko recʼetʼme iń hõ onkoakʼ jiniskoń recʼ ocoytakoa. Hoṛ do amko metama, ‘nui kangeae uni sạṅgiń ocoakan Sion do one uniyakʼ khoj okoehõ bako hataoetʼkan,

Jobakʼ 26:7

Utạr reakʼ rimil do phaelaoreye pasnaoeda; ar phaelao jaegare dhạrti doe aka dohoakada.

Jirimiạ 10:12

Probhu Isor do acʼakʼ daṛete dhạrtiye sirjạu akada, ar acʼakʼ ạkiltege pirthimi reakʼ rehetʼe bạisạu akada ar uniyakʼ bujte sermae pasnao akada.

Jesaea 51:13

Ar ape okoeye sirjạu akatʼpe uni do cedakʼpe hiṛińkedea? Uni do sermae pasnao akada ar dhạrti reakʼ rehetʼe bạisạu akada. Cikʼpạyicʼakʼ kurkurạukʼ edrete cedakʼ ape do siń sạṭupʼpe torasokʼ kana? Uni cikʼpạyicʼakʼ edre do botoranakʼ cetʼ hõ baṅkana.

Jesaea 45:18

Probhu Isor, okoe do sermae sirjạu akatʼ, uni kangeae Isor do; one uni dhạrti do muṭhạne emakawatʼ are benao akatʼ, unige onae bandhoakada. Ar dhạrti do ạlmạl bae benaoleda, bickom girobasokʼ lạgitʼgeye benaokeda. Uni doe meneda, “Iń kangeạń Probhu Isor do, iń chaḍa eṭagicʼ do ar cele hõ bạnuiya.

Jesaea 45:12

Ińge dhạrti sirjạukate onare manwań sirjạukedea; iń do ińakʼ tite sermań pasnao akada ar sermaren siń cando, ńindạ cando ar ipilkoń benao akatʼkoa.

Jesaea 40:22

Prithimi cetan reakʼ sermare unige siṅghạsonreye duṛupʼ akana, dhạrtiren hoṛko do sosrocʼ leka kanako. Orwal leka uni do sermae pasnao akada, tahen lạgitʼ tạmbu leka onae ṭaṅgao akada.

Jesaea 40:12

Okoe dakʼko do acʼakʼ loṭteye soṅakada ar sermako do okoe acʼakʼ bitạteye jokha akada? Dhạrti reakʼ dhuṛi do ạṛire okoeye sahopʼ ocoakada ar buru ar ḍuṅgriko hõ okoe tulạteye tulạ akada?

Sereńko 104:2

Kicricʼ lekage am do marsalem horokʼ akawana; rimilge am do tạmbu lekam ṭaṅgao akada.

Malaki 1:1

Malaki hotete Israelko ṭhen Probhu Isorakʼ katha.

Sakariạ 9:1

Hadrak ar Damesek upạrte Probhu Isorakʼ oka katha sodorlen ona do purạukʼa. Israel gusṭirenko ar eṭakʼ sanam manwakoakʼ mẽtʼ do Probhu Isorrege menakʼa.

Joel 3:19

Menkhan Misor do dhaṅdhaserakʼ ṭhạ̃ige hoyokʼa ar Edom do jarkharakʼ hahaṅkar hoyokʼa, ente Jihudạren hoṛko cetanre santao hoyakana ar onkoakʼ disạmre bin dusạnkoakʼ mãyãm joro ocoakana.

Rak̕joṅ 2:14

Amren nạbikoakʼ dorson do ạuṛiyakʼgea ar eṛeyakʼkana; amakʼ bondi dosa jemon sạṅgińokʼtam onate onko do amakʼ ghạṭko bako udukʼ akawatʼmea. Nạbi lekate okako lạiyakatʼ ona do eṛegea; ona do bhul horteye idiakatʼpea.

Jirimiạ 50:34

Menkhan onkoren chakʼḍaoicʼ doe daṛeangea; uniyakʼ ńutum do phạdkoren Probhu Isorge. Uni do onkoakʼ mamblae calaotakoa jemon onkoakʼ disạmre suluke ạgui ar Babelren hoṛkoe ḍamaḍol ocoko.”

Jirimiạ 30:10

“Onate E ińren golam Jakob, am do alom botorokʼa; E Israel, alom as chuṭạukʼa. Iń do sạṅgiń ṭhạ̃i khon am ar bondi idi ocoakan amren hoponko khạṭigeń bańcaokoa. Jakob do arhõ suluk ar nirạiteye tahena ar okoehõ bako botor ocoyea.

Jobakʼ 37:18

Chańcre dulakʼ ạrsi leka keṭecʼakʼ okaṭakʼ rimil ona do cetʼ Isor sãotem pasnao daṛeakʼa?

Genesis 1:8

Isor okaṭakʼ phaelao jaegae sirjạuketʼ ona reakʼ ńutum do sermae dohokeda. Nonkate ạyupʼena ar setakʼena ar ona do dosar din hoyena.

Sereńko 134:3

Ot ar sermaren sisirjạuicʼ Probhu Isor do Sion khone bhor apema.