Johan 12:49 - সান্তালী বাইবেল

⁴⁹ ente iń do apnarte cetʼge bạń roṛakada, menkhan okoeye kol akadiń uni Babageye hukum akawạdińạ cetʼko roroṛ hoyokʼ tińạ mente.

Santali Common Language New Testament

⁴⁹ ente iń do apnarte cetʼge bạń roṛakada, menkhan okoeye kolakadiń uni Babageye hukum akawạdińạ cetʼko roroṛ hoyokʼ tińạ mente.

Johan 12:49 Referans Kwoze

Johan 14:10

Am do cetʼ bam pạtiạukʼ kana, iń do Babare minạńa ar Baba do ińre menaea mente? Iń okako kathań lại apekan ona do apnar khonakʼ do bạń roṛeda, menkhan ińre menae Babageye kạmikana.

Johan 8:26

Ape roṛpe reaṅ ar bicạrpe lạgitʼ ạḍi okocʼge menakʼtińạ. Menkhan okoeye kol akadiń unire eṛeteakʼ do bạnukʼa; ar uni ṭhen khon okań ańjomakatʼ onage manwakoń lạiyako kana.”

Johan 5:30

Iń do apnarte cetʼge bạń ceka daṛeakʼa; cetʼlekań ańjoma onkageń bicạra. Iń do hok reakʼgeń bicạra, ente ińakʼ sana leka kạmi do bạń khojkana menkhan okoeye kol akadiń uniyakʼ menjoṅ lekageń kạmiya.

Johan 17:8

Ente okako katha lạiyakom metadiń tahẽkan iń do onakoń lại akawatʼkoa. Ar onko do onako ataṅketʼte sạrigeko baḍaekeda, iń do am ṭhen khoniń hecʼakana, arko pạtiạu akana, amge ińem kol akadińa.

Dosar Biboron 18:18

Iń do onkoren Israel boehako tala khon onko lạgitʼ am leka mitʼṭen nạbiyiń teṅgo akoa. Ar uniyakʼ mocatege ińakʼ kathakoń roṛa, ar iń oka lạlạiyiń hukumae onage uni doe roṛa.

Johan 14:31

Menkhan noa do hoyokʼ kana jemon hoṛkoko baḍae daṛeakʼ je, iń do Babań dulạṛede kana ar Baba cetʼ lekae hukum akadiń onkage jotowakʼ iń kạmikana. Ma beredokʼpe, dela nonḍe khon bon calakʼa.

Johan 15:15

Iń do golam bạń metapekana, ente kisạ̃ṛ cetʼe cekakan golam do ona bae baḍaea; menkhan iń do gateń metapekana, ente Baba ṭhen khon okań ańjomakatʼ onage apeń baḍae ocoakatʼpea.

Johan 8:42

Jisui metatʼkoa, “Isor do sạrige aperen babae hoylentape khan ińpe dulạṛkińạ, ente iń do Isor khoniń hecʼ akana ar ńitokʼ do ape talare minạńạ. Iń apnarte do bạń hecʼakana, menkhan unigeye kol akadińạ.

Johan 3:32

Uni do okae ńelakatʼ ar okae ańjomakatʼ ona reakʼ gohageye ema, menkhan okoe hõ uniyakʼ goha do bako aṅgoctaea.

Johan 3:11

Sạrigeń metamkana, ale okale baḍae akatʼ onagele roṛeda ar okale ńelakatʼ ona reaṅge gohale emeda, menkhan ape do aleakʼ goha bape luturakʼ kana.

Johan sodor 1:1

Noa puthire okako olakan ona do Jisu Mạsigeye sodor akada. Noako reaṅ Isor do Mạsi ṭhene sodorleda, jemon thoṛa ghạṛicʼ khange hoyokʼ lạgidokʼkan ghoṭnako acʼren gutikoe baḍae ocoko. Mạsi do acʼren goḍete kolkedete acʼren golam Johan do noa reaṅakʼkoe baḍae ocoledea.

Johan 5:19

Onate Jisu do onko mukhiyạkoe metatʼkoa, “Sạrigeń metapekana, Hopon do acʼte cetʼge bae ceka daṛeakʼa. Baba okaṭakʼ kạmikane ńelekan eken onageye daṛeakʼa, ente Baba okae cekae Hopon hõ onageye onkayeda.

Johan 6:68

Simon Patras do Jisui metadea, “E Probhu Isor, ale do okoe ṭhenle calakʼa? Jaejug jion reakʼ katha ma coṅ am ṭhenge.

Johan 7:16

Jisu do onkoe metatʼkoa, “Oka cecetʼakʼ iń emokʼkan ona do ińakʼ do baṅkana, menkhan okoeye kolakadiń, uniyakʼ kangea.

Johan 8:28

Onate Jisui metatʼkoa, “Manwa Hopon tinre coṭtepe rakabea unrepe baḍae daṛeakʼa, iń doń uni kangea. Ar noa hõpe bujhạu daṛeakʼa iń do ińte cetʼge bạń kạmikana, bickom Baba okae cetʼ akawạdiń onageń roṛeda.

Johan 14:24

Okoe bae dulạṛiń uni do ińakʼ katha leka ohoe calaolena. Okaṭakʼ kathape ańjometʼkan ona do ińakʼ katha do baṅkana menkhan okoe ińe kol akadiń uni Babawakʼ katha kangea.