Jobakʼ 23:10 - সান্তালী বাইবেল

¹⁰ Menkhan iń oka horteń calakʼkan ona doe baḍaekana; are biḍạu aṭkarliń khan iń do khạṭi sona lekageń hoykokʼa.

Jobakʼ 23:10 Referans Kwoze

Jakob 1:12

Bhạgangeae uni do one okoe biḍạureye sombhuriyetʼkan, ente lek kanae menteye sạbudlen khan uni do jit reakʼ mala lekate jione ńama. Ar okoe Isorko dulạṛedekan onko do jion emako lạgitʼe gokʼakatʼkoa.

1 Patras 1:7

Noako biḍạu do hijukʼgea jemon apeakʼ biswạs khạṭi mente sạbudokʼtape, ar onate Jisu Mạsiye sodorokʼre ape do sarhao, ṭhonok ar manotpe ńama. Okaṭakʼ sona do heṛ idikʼ ona hõ seṅgelre khạṭi ocoy hoyokʼa; menkhan apeakʼ biswạs reakʼ dam do ona sona khon hõ artetʼ sorosgea.

Sakariạ 13:9

Niạ tesar hạṭińrenko do seṅgel talateń idikoa; rupạ cetʼlekako khạṭi ocoy onkage onko doń khạṭikoa ar sona cetʼlekako biḍạu aṭkar onkage onkoń biḍạu aṭkarkoa. Onko do ińko hohowạńạ ariń roṛ ruạṛakoa; ińiń metakoa, ‘noko do ińren hoṛ kanako,’ ar onkoko mena, ‘Probhu Isor do aleren Isor kanae.’ ”

Sereńko 66:10

E Isor, am dom bachao akatʼlea; rupạ reakʼ mạilạ oḍok giḍikakʼ leka am do alem sapha akatʼlea.

Kạhtukko 17:3

Rupạ biḍạu aṭkar lạgitʼ do galao reakʼ jinis menakʼa ar sona biḍạu aṭkar lạgitʼ jinis do culhạ, menkhan manwa ontor do Probhu Isorgeye biḍạu aṭkara.

Sereńko 17:3

Am do ińakʼ ontorrem bolo akana ar ńindạ dom biḍạu akadińạ; arem biḍạu aṭkar edeńkana menkhan cetʼge bam ńam akada. Ińiń ṭhik akada jãhãn kại reakʼ kathare ińakʼ moca do ar bạń beohara.

Ibriko 11:17

Abraham do biḍạu ocokʼ jokhecʼ Isorre pạtiạu iạtege Isahak doe samaṅledea. Okoe ṭhen Isore gokʼ akatʼ tahẽkan unige acʼren sadher hopon dãṛẽye lạgitʼe samaṅedekan tahẽkana.

2Timothi 2:19

Enrehõ Isorakʼ gathaoakʼ kajak rehetʼ do teṅgo akana, ar ona cetanre mohor chapakatʼ leka noa kathako ol menakʼa, “Probhu Isor do acʼrenkoe baḍaeyetʼkoa, ar Mạsi do Probhu mente okoeko hohowaekan onko do sanam lekan bedhorom kạmi khonko sahaṛokʼma.”

Johan 21:17

Uni do tesar dhao Simon Patrase metadea, “Jona hopon Simon, sạrigem dulạṛ edeńkana?” Patras doe mon dukena, ente Jisu do tesar dhao uniye kulikedea, “Sạrigem dulạṛedeń kana?” Onate Patras do Jisui metadea, “E Probhu am do jotowakʼgem baḍaea, ar noa hõm baḍaegea amiń dulạṛetʼme kana.” Jisu do uniye metadea, “Ińren bhiḍiko gupikom.

Sereńko 1:6

ente Probhu Isor do dhorom hoṛkoakʼ hore moneyakʼa, menkhan bedhoromkoakʼ hor do maraokʼtakoa.

Dosar Biboron 8:2

Disạipe, aperen Probhu Isor do pongel bochor hạbicʼ hahaṅkarreye dãṛã ạyur ocoketʼpea mente. Apeakʼ bạḍạiko rạpudtape lạgitʼ ar monre menakʼtapeakʼ, metakʼme uniyakʼ hukumkope manaoa se baṅa, ona biḍạu aṭkarpe lạgitʼ uni do noae kạmi akada.

2 Rapajko 20:3

“E Probhu Isor, disạime baṛe, am samaṅre oka leka pạtiạrạnicʼ iń tahẽkana ar goṭa ontorte am botoram tulucʼ iń dãṛãnkan tahẽkana ar amakʼ mẽtʼre oka ṭhikakʼkan onageń kạmiyetʼ tahẽkana.” Ar niạ menkate Hiskiạ do hũk hũke rakʼkeda.

Genesis 18:19

Iń Probhu Isor do noa lạgitʼge uniń bachao akadea jemon acʼren hoponko ar oṛakʼren eṭakʼ sanamko dhorom ar ińakʼ sanaleka calakʼ reakʼ solhae emako. Ar onko do uniyakʼko ańjomtaete onka lekako calakʼ, enḍekhan iń Probhu Isor do Abraham reaṅ okań menakatʼ onageń onkaea.”

1 Korinthiko 3:15

ar ona kạmiyakʼ atar giḍilentae khan enḍekhan uni do lokshan hoyokʼtaea. Acʼtetʼ doe bańcaokʼa, menkhan uniyakʼ dosa do nonkan hoṛleka hoyokʼtaea one okoe do seṅgel talateye parom hecʼakan.

Jobakʼ 6:29

Hudis ruạṛpe, behokko do alope hoyokʼa; arhõ hudispe, ente iń do ńithõ dhoromge minạńa.

Jobakʼ 7:18

Din hilokʼ setakʼ jokhecʼ dom tolasede kana, ar jao ghuṛiyem biḍạu aṭkar edekana.

Jobakʼ 23:7

Unre mitʼṭen dhorom hoṛ do uni ṭhen mamblae samaṅkea; ar ińren bikʼcạricʼakʼ ti khon jaejug lạgitʼ iń do bańcaoiń ńamkea.

Jobakʼ 23:9

Utạr secʼre tinreye kạmiya unre hõ uni do bae ńelokʼa; ar dạkhin secʼ iń ạcurlenre hõ uni do bạń ńel ńamea.

Jobakʼ 31:6

Khạṭi tulạte Isor do ińe soṅeńma, enḍekhane baḍae daṛeakʼa, iń doń miridosgea.

Sereńko 7:9

E dhoromren Isor, am do mon ar ontorem ḍunḍhạueda; amge bedhoromkoakʼ bạṛicʼakʼko cabaetakome menkhan amren dhoromko do teṅgo ṭarhao akae dohokom.

Sereńko 11:5

Probhu Isor do acʼ botoraekan koe biḍạu aṭkaretʼkoa, menkhan okoe bedhorom ar jor julumgeko dulạṛetʼ onko do bae moneyako kana.

2 Samuel 22:22

Ente Probhu Isorakʼ horrege iń doń dãṛãn kana; ar bạṛicʼakʼ kạmikate ińren Isor khon bạń ocokʼ akana.

Jobakʼ 10:7

Baḍaegeam dusi doń baṅ kana ar amakʼ ti khon okoehõ bako rukhiyạ daṛeạńạ.

Jobakʼ 31:4

Uni do cetʼ ińakʼ dãṛãnko bae ńeleda? Ińakʼ taṛamko reakʼ cetʼ bae lekhayeda?

Jobakʼ 33:9

Amem meneda, ‘iń doń saphagea, ińakʼ do jãhãn kạige bạnukʼtińạ; iń doń dhoromgea, ińre jãhãn dosge bạnukʼa.

Jirimiạ 12:3

E Probhu Isor, am dom baḍae akadińạ; arem tunkhi talaseyedeń kana ar tinạkʼ iń botoramkan ona hõm biḍạu aṭkar edeńkana. Onko do bhiḍiko leka gurko lạgitʼem tiyạkʼ idiyetʼkoa; ar gurko hilokʼ lạgitʼem begar dohoyetʼkoa.