Jirimiạ 50:29 - সান্তালী বাইবেল

²⁹ Probhu Isore meneda, “Babelrenko birudre sanam dhinkiạko hoho jarwakope. Ona beṛhaete lạṛhại phạdkoakʼ ḍera benaope; okoehõ alope dạṛ ocokoa. Uniyakʼ kạmi reakʼ kuṛại ńam ocoyaepe. Uni okalekae ceka akatʼ ape hõ unire onkage kạmipe, ente uni do Probhu Isor upạrte, Israelren uni sonoticʼ upạrte apnarteye maraṅokʼ kana.

Jirimiạ 50:29 Referans Kwoze

Jirimiạ 51:56

Babel upạrte jarkharkoko hijukʼa; uniren birbão hoṛ doko sapʼ ocokʼa ar onkoakʼ akʼ do rạpudokʼtakoa; ente Probhu Isor do hala hạliren Isor kanae; Babel reakʼ kuṛại do purạtegeye emaea.

Jesaea 47:10

Am do amakʼ ona dusṭami cetanrem bhorsakʼkana arem meneda, ‘celehõ bako ńeńel kana.’ Amakʼ ạkil ar bidiạge am dokin bhaṅgṭao akatʼmea; ente mone monetem meneda, ‘eken iń eskarge minạńa, iń chaḍa ar okoehõ bạnukʼkoa.’

Johan sodor 18:6

Ar eṭakʼko tulucʼ cetʼ lekae beohar akatʼ onkage acʼ sãote hõ beoharpe; uniyakʼ kạmiko leka purạ puri kuṛại emaepe. Okaṭakʼ bạṭire uni do eṭakʼko lạgitʼ bạṛicʼakʼe mesaletʼ tahẽkan, onare uniyakʼ purạ sạjại mesalkate jom ocoyepe.

Daniel 4:37

Ńitokʼ iń Nebukadnesar do uni sermaren raj sarhao, manot ar ṭhonokiń emaekana, ente uni okaṭakʼe cekae ona do ṭhikakʼgeye onkayeda, ar uniyakʼ jotowakʼ horge dhoromte perecʼgetaea. Ar okoe bạḍạiteko perecʼge uni do onkoe copotʼkoa.

Exodus 10:3

Mose ar Aron do unre Pharao ṭhen senkatekin menkeda, “Ibrikoren Probhu Isore meneda, ‘ar tinạkʼ din iń samaṅre bohokʼ bam kuḍburtama? Iń sewawạń lạgitʼ ińren hoṛko sen ocoakome.

Johan sodor 16:6

Noko hoṛko do Isorren hoṛko ar nạbikoko khũn akatʼkoa. Onate am do noa mãyãm ńũi lạgitʼem emakatʼkoa ar noage onko lạgitʼ do lek kana.”

2 Thessalonikiko 2:4

Isor mente cetʼko menakʼ onako sanamakʼ upạrte ar sewa ocokʼ jotowakʼ upạrteye teṅgokʼte uni do apnarte maraṅe udugokʼa; ar Isorakʼ mundilre duṛupʼkate acʼge Isor menteye udugokʼa.

Daniel 11:36

“Utạrren raj do acʼakʼ kusi lekae kạmiya. Uni do bạḍạiteye perejokʼa ar sanam debotako khone maraṅokʼa udugokʼa ar debotaren Isor upạrte hõ maraṅ maraṅ kathae roṛa; ar raṅgao ạuri cabakʼ hạbicʼ uni doe jo bahakʼa, ente okaṭakʼ ṭhik dohoakan ona do hoyokʼgea.

Daniel 5:23

Menkhan ona bodolte amge sermaren Probhu Isor upạrtem teṅgon akana. Am do uniyakʼ oṛakʼ khon ạguwakʼ bạṭikom oḍok ạgu ocoakada, ar onakore am ar amren mukhiyạko, amren bạhuko ar chuṭki erako ape do darkha rasape ńũ akada. Ar am do sonaren, rupạren, pitạlren, mẽṛhẽtʼren, kaṭren ar dhiriren benao akatʼko debotako okoe do ńeńelhõ bako ńeńel ar ańjom hõ bako ańjom ar bujhạu hõ bako bujhạu onkom sarhaoetʼkoa. Menkhan Isor do bam sarhaoede kana, one uniyakʼ tire amakʼ jiwi ar amakʼ goṭa horge menakʼtam.

Jirimiạ 50:32

Uni bạḍạiyicʼ doe sombotʼ bhindạṛokʼa ar berede lạgitʼ do celege bako goṛowaea; uniyakʼ nagrahakore seṅgeliń junḍiyakʼa, ar beṛhaeteakʼ jotowakʼ doń jeretʼ giḍikataea.”

Jirimiạ 50:26

E Babelren bạiriko, ape do sạṅgiń khon uni upạrte hijukʼpe. Uniyakʼ murạiko jhijtaepe; jarwa akatʼ anaj leka puńjiyepe. Ar purạte marao utạrepe, uniyakʼ cetʼge sarecʼ alope dohoytaea.

Jirimiạ 50:24

E Babel, iń do am lạgitʼ mitʼṭecʼ jhạliń oḍao akada ar begor baḍaete onarem jhạli akana; am dom ńamakana ar sapʼ hõm sapʼ ocoakana, ente am do iń upạrtem teṅgolena.

Jirimiạ 50:9

Iń do utạr reakʼ disạm khon maraṅ maraṅ jạtrenkoń jarwakoa ar onkoń buskukote Babel upạrteń ạgukoa. Onko do Babel upạrte lạṛhại phạdko sapṛaokoa ar onako ạidạrijoṅa. Onkoakʼ sar do gạkhuṛ birbão hoṛko leka baṅ ạuṛiyagokʼtakoa.

Jesaea 37:23

Am do okoeyem henosta akadea? Ar okoe upạrte opoman reakʼ kathako dom roṛetʼkana? Am do okoe upạrtem kikiạukʼ kana ar okoe cetantem beṅgetʼ paromeda? Am do Israelren uni sonoticʼ upạrtege noakom nonka akada.

2 Thessalonikiko 1:6

Isorakʼ dhorom bicạr do noage, okoe apeko duk ocoyetʼpe uni hõ onkoe duk ocokoa;

Jirimiạ 49:16

E dhiri paṛakʼkore girobasokʼ kan buru reakʼ usul ṭhạ̃iren ạidạriyicʼ, am dom torasanicʼ kanre hõ amakʼ ontor reakʼ bạḍạikoge am doe eṛe akatʼmea. Am do pajhaṛ cẽṛẽ leka coṭrem tukạlere hõ latarteń or pheḍ ạgumea.

Jirimiạ 51:3

Babelren dhinkiạko do akoakʼ akʼ aloko ṭuniạutakoma se akoakʼ mẽṛhẽtʼ aṅgrop hõ aloko horogma. Uniren juạnko do alope aṛakʼkoa; uniren lạṛhại phạdko dope marao utạrkoa.

Jirimiạ 51:24

Probhu Isore meneda, “Babel ar Baelre tahenko Sionre oka behokakʼko kạmiakatʼ onko do apeakʼ mẽtʼ samaṅrege kuṛạiyiń emakoa.”

Jirimiạ 51:49

Babel iạte goṭa dhạrtiren hoṛko cetʼlekako gocʼlen onkage Israelkoakʼ gujukʼ hotete Babelrenko hõko gocʼ ocokʼa.

Obodiạ 1:15

“Sanam jạtrenko lạgitʼ Probhu Isorakʼ din do sor hecʼakana. Am cetʼkom ceka akatʼ onkage amre hõ hoyokʼa; amakʼ kạmi reakʼ jo do amakʼ bohokʼ cetanrege ruạṛ hijukʼa.

Jirimiạ 25:14

Babelrenko do aema jạtrenko ar maraṅ maraṅ rajkoren golamko hoyokʼa; onkoakʼ kạmiko lekatege iń do kuṛạiyiń emakoa.’ ”

Jirimiạ 48:26

“Moab bul ocoyepe, ente uni do iń upạrte apnartetʼ maraṅe udugokʼ kana. Uni do acʼakʼ becʼreye jobe akana; uni do landa-dhutʼicʼgeye hoyokʼa.

Rak̕joṅ 1:9

Uniyakʼ mạilạ do uniyakʼ kicricʼrege laṭkao akantaea; darakan din reakʼ do bae dạndilena. Uni doe sombotʼ bhindạṛ akana; jiwi raṛecʼtae lạgitʼ do celege bạnukʼkotaea. Uniye meneda, “E Probhu Isor, ińakʼ duk baṛe ńeltińme, ente bạiriko doko jitạu akana. ”

Rak̕joṅ 3:64

E Probhu Isor, onkoakʼ kạmi leka baṛe kuṛại emakom.