“Am do siṅgạ oroṅme. Probhu Isorren hoṛko upạrte bạiri do pajhaṛ cẽṛẽ lekae hijukʼkana, ente hoṛko do iń emakʼ bondobos reakʼko bebatao akada ar ińakʼ ạn-ạri upạrteko hul akada.
Onko do ạḍi bebạṛicʼko botorokʼa, ar ạḍi ãṭ hasokoa, gidrạ janamede kan maejiu leka bedonteko thakao cabakʼa, onko do cahapʼkate apan apin secʼko beṅgetʼjoṅa ar mẽtʼãhã do jaljalaokʼtakoa.
Ape do kulijoṅpe ar ńelpe, herel hoṛ do cetʼ kukhire gidrại janam daṛekea? Enḍekhan cetʼ iạte daṛean herel hoṛ do bedonokʼkan maejiu leka lacʼ cetanre ti capo akan ar sanamkoakʼ mẽtʼãhã do mulin akaniń ńeletʼkana?
Ńelpe, uni do rimilko lekae oṭaṅ hijukʼkana. Uniyakʼ rãt gạḍiko do bharḍo leka hijukʼkana ar uniren sadomko do pajhaṛ cẽṛẽ khon hõko coṭkargea. Hae, hae, abo do bon jarkharena!
“Probhu Isor do sạṅgiń khon, dhạrti reakʼ ses simạna khon nonkan mitʼ jạtrenko ape upạrteye ạgukoa one onkoakʼ pạrsi bape bujhạutako. Onko jạtrenko do pajhaṛ cẽṛẽ leka ape cetanre sã menteye uḍạu ạgukoa.
Pạhilicʼ doe tahẽkana dhạcri kul leka ar uniyakʼ do cẽṛẽ leka phạ̃kṛạ̃kʼ tahẽkantaea. Ar ńel ńeltege uniyakʼ phạ̃kṛạ̃kʼkin do or chaḍaoena ar uni do ot khon cetanteye rakapʼ ocoyena. Unre uni do manwa leka banar jaṅgateye teṅgoyena ar manwawakʼ ontore emocoyena.