Jirimiạ 49:19 - সান্তালী বাইবেল

¹⁹ “Jordan reakʼ bir khon cetʼleka dhạcri kul do sikạr lạgitʼe oḍokʼ hijukʼ onkage mitʼ ripitʼre Edom do acʼakʼ disạm khoniń laga ńirea. Onḍe do ińren bachao akan hoṛkoń bahalkoa. Iń lekanicʼ do okoe menaea? Ar iń upạrte do okoeye teṅgo daṛekokʼa? Jãhãe gukʼpiyicʼ do cetʼ iń samaṅreye teṅgo daṛekokʼa?”

Jirimiạ 49:19 Referans Kwoze

Jirimiạ 12:5

“Manwa sãote ńir haparaokʼrem laṅgayen khan tobe do sadom sãote ńir haparaokʼ do cekatem daṛekokʼa? Eken sulukte perecʼ disạmrege khạtirjoma tahenem hudisetʼ khan enḍekhan jordan reakʼ bir gajaṛre do cekatem tahena?

Jirimiạ 30:21

Onkoren mukhiyạ do onkoren mitʼ hoṛe hoyokʼtakoa; onko tala khonge ḍanṭaoicʼe rakabokʼa. Iń do uniń hohoaea ar uni do iń ṭhene hijukʼa, ente bạń hohoae khan uni do cetʼ dil salakʼ iń ṭhene hecʼdaṛeakʼa?

Jobakʼ 41:10

Uni buskoye reakʼ dil do okoeyakʼge bạnukʼanaṅ; enḍekhan iń samaṅre okoeye teṅgo daṛekokʼa?

Jobakʼ 9:19

Daṛe reakʼ katha kan khan ma beṅgetʼaeme; ar bikʼcạr reakʼ katha kan khan ańjomtińae mente okoeye metaea?

Josuạ 3:15

Phosol samṭao reakʼ purạ okte jordan gaḍa reakʼ dakʼ do ḍhip khon se oḍokʼkan tahẽkana. Menkhan goha-sinduk gogokʼ naekeko do jordan gaḍa ṭhen seṭerkate dakʼreko boloyen khan cetan khon ạtu hijukʼkan dakʼ do thir hapeyena. Ona dakʼ do sạṅgiń reakʼ Sartham nagraha sor Adam ato ṭhen dun dun teṅgoyena; onate dakʼ do Araba doreão secʼ, metakʼme buluṅ doreão secʼ ạtu calakʼ do thirena. Onate Israelko do Jerikho nagraha reakʼ samaṅ secʼte gaḍako paromena.

Exodus 15:11

“E Probhu Isor, Debko modre am leka do okoe menakʼkoa? Okoe menakʼkoa am leka sonot ar ṭhonokanicʼ ar sarhao sereńkore botoranicʼ do? Ar hahaṛawakʼ kạkʼmiyicʼ hõ okoeyakʼ menakʼtaea?

Johan sodor 6:17

ente unkinakʼ edre sodorokʼ reakʼ ona maraṅ din do seṭer akana, ar uni samaṅre do okoeye teṅgo ṭarhao daṛekokʼa?”

Sakariạ 11:3

Bhiḍi gukʼpikoakʼ homor halaṅ ańjompe; onkoakʼ bhage bhage ạtiń ṭạnḍiko do nosṭo caba akana. Dhạcri kulkoakʼ hạnḍrạu ańjompe; jordan reakʼ bir do ujạṛena.

Nạhum 1:6

Uniyakʼ raṅgao samaṅre do okoeye ṭikạu tahẽdaṛekokʼa? Ar uniyakʼ botoranakʼ edre do okoeye sahao daṛeketaea? Uniyakʼ edre do seṅgel leka jolokʼkana; ar uni samaṅre lạṭu lạṭu dhiriko do gejerokʼ kana.

Jirimiạ 4:7

Mitʼṭen dhạcri kul do gajaṛ bạgikateye oḍok hecʼakana; ar jạtrenko maraoko lạgitʼ hõ mitʼ hoṛe mohnḍa akana. Amakʼ disạm ujạṛ lạgitʼ uni do acʼakʼ ṭhạ̃i khone oḍok akana. Amakʼ nagrahako do jarkharokʼa, onḍe do celege bako tahena.

Jesaea 40:25

Uni sonoticʼe meneda, “Okoe tulucʼpe juriyińa? Ar okoe iń soman doe hoyokʼa?”

Sereńko 143:2

Iń amren golam do alom bicạrińạ, ente amakʼ mẽtʼãhã samaṅre sanam jiwiyankoge dhorom doko baṅkana.

Sereńko 89:8

E Probhu, sanam daṛean Isor, okoe menaea am lekan daṛeanicʼ do, E Probhu? Amakʼ pạtiạrtetʼge am doe esetʼ ạcur akatʼmea.

Sereńko 89:6

Sermare nonkan cele menakʼkoa okoe do Probhu Isor sãoteye jurikokʼa? Serma goḍetko modre Probhu Isor soman do okoe menaea?

Sereńko 76:7

Am, hẽ amge ạḍi botoranicʼ kanam; amakʼ edre rakapʼlenre okoe hale am samaṅre doe teṅgo daṛeakʼa?

Jobakʼ 9:21

Iń doń miridosgea, onate do cetʼ cekakʼtińạ? Iń do apnarakʼ jiwigeń hirkhạwakʼ kana.

1 Bõsbudạ 12:15

Ona bochor reakʼ pạhil candore jordan gaḍa reakʼ dakʼ tinre perecʼlena unre nokoge paromkate gaḍa purub ar gaḍa pạchim bilạn ṭạnḍire girobasokʼkan sanamkoko laga ńirletʼkoa.

Numeri 16:5

Uni do Korah ar uni dolren hoṛkoe metatʼkoa, “Gapage Probhu Isor doe udukʼ abona okoe do uniren kanako ar okoe do uni ńutumteko begar ocoakana. Unige acʼren hoṛko acʼ samaṅreye sen ocoakoa. Ar okoeye bachao akawan unige acʼ samaṅreye sor ocoaea.

Jesaea 46:9

Sedae reakʼ kathako disạipe. Iń kangeạń Isor do, iń chaḍa eṭakʼ jãhãe ar celege bạnukʼkoa; Iń kangeạń Isor do, Iń leka do ar celege bạnuiya.

2 Bõsbudạ 20:6

“E Probhu, aleren hapṛamkoren Isor, am dom semaren Isor kana. Am do sanam jạtrenkoakʼ rajosṭikom ḍanṭaoeda. Daṛe ar ektiạri do amakʼ tirege ar celege am do bako teṅgo daram daṛeama.

Sereńko 76:8

Serma khon amakʼ bicạr reakʼem ańjom ocokeda; E Isor, am do bicạr lạgitʼgem beretʼena

Jirimiạ 25:9

Iń do utạrren sanam jạtrenko ar ińren golam Babelren Nebukadnesar rajiń hoho ạguiyea. Noa disạm ar onaren hoṛko upạrte ar beṛhaeten sanam jạtrenko upạrte onkoń ạgukoa. Iń do purạte onko hoṛkoń maraokoa ar onko do botoran ar landa-dhutʼan jạtrenkoń hoyocokoa; onkoakʼ disạm do jaejug lạgitʼ iń ḍahao maraoa.

Daniel 7:4

Pạhilicʼ doe tahẽkana dhạcri kul leka ar uniyakʼ do cẽṛẽ leka phạ̃kṛạ̃kʼ tahẽkantaea. Ar ńel ńeltege uniyakʼ phạ̃kṛạ̃kʼkin do or chaḍaoena ar uni do ot khon cetanteye rakapʼ ocoyena. Unre uni do manwa leka banar jaṅgateye teṅgoyena ar manwawakʼ ontore emocoyena.