Jirimiạ 46:21 - সান্তালী বাইবেল

²¹ Misorren din mạjuri lạṛhại phạdko do lodgopʼ mĩhũ leka kanako. Onko hõ ruạṛkate mitʼ domteko dạṛ pharakokʼa; ar bako teṅgo ṭarhaokʼa, ente onko cetanre maraokʼ reakʼ dinge hijukʼkana, onkoakʼ sạjại ńam reakʼ okte do sor hecʼ akana.

Jirimiạ 46:21 Referans Kwoze

Jirimiạ 46:5

“Iń do cetʼ iạte noakoń ńeleda? Onko do botor caṛhao akatʼkoa, arko pạcakana, onkoren lạṛhại bir doko bhagao ocoyena. Onko do tayom secʼ beṅgetʼ ruạṛ baṅkate am ińko dạṛjoṅkana, ente beṛhaetege toras do menakʼa.

2 Rapajko 7:6

Probhu Isor do rãt gạḍi, sadomko, ar maraṅ mitʼ dol lạṛhại phạdkoakʼ sabad Aramrenkoe ańjom ocoketʼkoa. Onate Aramren lạṛhại phạdko do ako akoreko mepenena, “Ńelpe, Israelren raj do abore jhãp em lạgitʼ Hittiren raj ar Misorren rajkine bhaṛa ạguakatʼkinạ.”

Mikạ 7:4

Onko modren sanamko khon bhage hoṛ do rạṅgạini lekako hoyakana, ar joto khon dhorom hoṛ do kuṛitʼrama reakʼ beṛha lekage. Aperen pahradarko lạiyakope, apeakʼ sạjại reakʼ din do sor akana mente. Ar andesalekʼ reakʼ okte do ńitokʼkangea.

Obodiạ 1:13

Ińren hoṛkoakʼ muhin hilokʼre am do onkoakʼ phaṭok duạrkotem boloyena, onkoakʼ maraokʼ hilokʼ onkoakʼ muhim ńelte ạḍim kusiyena ar onkoakʼ dhon-duribem luṭana,

Amos 6:4

Ape do hạti ḍaṭate benaoakʼ parkomrepe giticʼ akana ar apeakʼ palak parkomrepe tiyạr akana. Ape do aperen pal khonpe bachao akatʼko bhiḍi hopon ar goṛa tala khon mĩhũpe jometʼkoa.

Hosea 9:7

Israel do jemone baḍae ńam, sạjại reakʼ din do seṭer akana ar hisạb hatao reakʼ din hõ hecʼakana. Onkoakʼ kại do lekhare ḍhergea Isorko hirkhạwaekante, nạbiko do lelha ar jiuan hoṛ do khepako hudisetʼkoa.

Jirimiạ 50:27

Uniren sanam ḍaṅgrako gocʼkope; onko do gocʼko lạgitʼko idi ocokʼma. Hae, onko do sạjạiyokʼ reakʼ dinge paṛao akatʼkoa.”

Jesaea 34:7

Onko sãote do bir ḍạṅgrako, sanḍ ḍaṅgrako ar juạn ḍaṅgrako hõko gurkoa. Onkoakʼ disạm do mãyãmte ńũ bulokʼa, ar itilte dhuṛi do poṭomokʼa.

Sereńko 37:13

Probhu Isor doe baḍaea bạṛicʼkoakʼ mucạtʼ din do sor hijukʼ kana, ar onatege uni do onko ńelteye landayeda.

2 Samuel 10:6

Amonrenko tinreko bujhạu daṛeada, onko do Dạud ṭhenko kurud ocoakana mente. Unre onko do Bethrehobren ar Sobaren bargel hajar otten lạṛhại phạdko, ar Makaren mitʼ hajar hoṛko ar Toabren gelbar hajar hoṛkoe bhaṛaketʼkoa.

Jeheskel 35:5

“ ‘Ḍher din khon am do Israelren bạirim hoyakana ar onkoakʼ muhinre tinre onkoakʼ sạjại do purạteko em ocoakana unre am do tarwaṛe reakʼ daṛerem soprotketʼkoa.

Jirimiạ 50:11

“E Babelrenko, ape do ińakʼ ạidạripe luṭ akawana ar onatepe rạskạkʼ kana, arpe kusikʼ kana. Ape do phosol enokʼkan mĩhũ lekape don baṛaekana ar khacaṛ sadom lekape hinhạukʼ kana;

Jirimiạ 46:9

E sadomko, ape do ńir bhiṛạukʼpe. E rãt gạḍiko, ape do giṛgiṛạu baṛaepe. E birbanṭako, ḍhal akʼsenkan Kusren ar Puṭren hoṛko, ar Ludren dhinkiạko, ape do laha idikʼpe.

Jirimiạ 18:17

Onkoren bạiriko samaṅre onko do purub reakʼ hoe lekań chirchạturkoa; ar onkoakʼ muhin hilokʼ doń dea giḍikoa.”

Jesaea 10:3

Sạjạiyokʼ dinre tinre sạṅgiń khon jarkharakʼ hijukʼa unre ape do cetʼpe cekaea? Goṛo ńam lạgitʼ okoe ṭhenpe ńir calakʼa? Apeakʼ dhon durib do okoe ṭhenpe doho oṭokakʼa?

Kạhtukko 15:17

Aṛakʼ utu ar ona seletʼ dulạṛge bhagea jel utu daka ar ona seletʼ kurud khon do.

Dosar Biboron 32:15

“Menkhan Jisurun doe moṭayena are phandakeda. E Jisurun, am do ḍher jomte ạḍim moṭayena. Ona tayom uni do acʼren sisirjạuicʼ Isore bạgi giḍiadea, ar acʼakʼ asrayokʼ buru hõe nihạ̃t giḍikada.

Mathae 22:4

Unre uni do arhõ eṭakʼ gutiko noa menkateye kolketʼkoa, ‘ńelpe bhojiń tear akada, ar ińren daṅgra ar posaokoń gur akatʼkoa. Ar ńitokʼ do sanamakʼ sạt akana, ado dela hijukʼ tabonpe.’

Jirimiạ 46:22

Bạiriko tinreko laha hijukʼa unre Misorrenko do biń lekako leń calakʼa arko dạṛa; ar bạiriko do ṭeṅgocʼante Misor upạrteko hijukʼa.

Jirimiạ 48:44

Okoe toras khone dạṛjoṅ uni do ghaḍlakʼreye ńurokʼa, ar okoe ghaḍlakʼ khone rakapʼ hijukʼ uni do jhãmpareye sabokʼa; ente iń do Moab reakʼ sạjạiyiń ṭhik dohoakada. Iń Probhu Isorge noa katha doń meneda.

Jirimiạ 49:8

E Dedanren hoṛko, ape do ńir ruạṛokʼpe ar dạṛjoṅpe, danaṅ ṭhạ̃ite senkate okokʼpe, ente Esao cetanre muhiniń paṛao ocoya ar uniń sạjạiyea.

Jeheskel 30:22

Iń Probhu Isorgeń menetʼkana, Misorren raj Pharao upạrten kạnạń. Iń do uniyakʼ keṭecʼakʼ ar rạputʼatʼ banar tigeń rạpudtaea ar uniyakʼ ti khon tarwaṛeń ńur ocoytaea.