Jirimiạ 37:15 - সান্তালী বাইবেল

¹⁵ Ar onko rajkạmiyạko doko raṅgaoente Jirimiạko dalkedea, ar olokʼicʼ Jonathan oṛakʼre idikateko bondi dohokadea; onko do onage hajot khana lekako benao akatʼ tahẽkana.

Jirimiạ 37:15 Referans Kwoze

Jirimiạ 38:26

enḍekhan onkom metakoa, ‘raj iń nehõrade tahẽkana jemon Jonathanakʼ oṛakʼte aloe ruạṛ idiyiń, ente onḍeye kolkạń khan iń do gujukʼ hoyokʼtińạ.’ ”

Aposkạmi 5:18

Onko do apostolko sapʼkate hajotreko bhoraoketʼkoa.

Mathae 21:35

Ar onko cacasko do uniren gutikoko sapʼketʼkote mitʼ doko dal urkedea, mitʼ doko gocʼkedea ar mitʼ do dhiriteko tińkedea.

Jirimiạ 26:16

Unre rajkạmiyạko ar sanam hoṛko do naekeko ar nạbikoko metatʼkoa, “Nui do gujukʼ sạjại lek doe baṅkana. Uni do aboren Probhu Isor ńutumte abo ṭhen kathae roṛakada.”

2 Bõsbudạ 18:26

Unkinpe metakinạ raje men akada nui do jemon hajotreye doho ocokʼ ar nirạite raj ạuriye ruạṛ hijukʼ hạbicʼ uni do thoṛa dakʼ ar thoṛa piṭhạ chaḍa ar cetʼge alope emaya.”

2 Bõsbudạ 16:10

Niạ katha ańjomkate uni do ńeńelicʼ cetanre ạḍiye raṅgaoente hajot khanareye bhoraokadea. Ar onako dinre Asa raj do adom hoṛko cetanreye julumkeda.

Genesis 39:20

Unre Poṭiphor do hajotre Josephe bhoraokadea one oka ṭhạ̃ire raj bondiko dohoyetʼko tahẽkan. Menkhan Probhu Isor do hajotre hõ Joseph sãoteye tahẽkana. Uni do Probhu Isorre pạtiạugeye tahẽyena ar Probhu Isor do uniye dayawadete hajot khanaren sordarakʼ nońjorreye paṛao ocokedea.

Johan sodor 2:10

Am do okako dukem jom lạgidokʼkan onate thoṛa hõ alom botorokʼa. Ańjomme, Soetan do ape modren adomko biḍạupe lạgitʼ hajotreye bhoraopea, ar gel din hạbicʼ ape do kosṭope joma. Am do gujukʼ hạbicʼ pạtiạr akae tahenme, enḍekhan jitạukʼ reakʼ mala leka jioniń emama.

Aposkạmi 5:40

Unre Gamalielakʼ katha leka mukhiyạko doko mitʼ motena. Onko do apostolko bhitrite hoho idikate dalko lạgitʼko hukumkeda. Ar ona tayom doko aṛakʼkatʼkoa arko hukumatʼkoa Jisu reaṅ jemon jãhãnakʼ ar aloko roṛ baṛae.

Aposkạmi 5:28

“Uni hoṛ reaṅ alo cetʼako lạgitʼ kajaktele hukumatʼpe tahẽkana, menkhan ape do apeakʼ cecetʼakʼte Jerusalempe perecʼ akada ar uni hoṛakʼ mãyãm alere paṛao ocoy reakʼpe moneakada.”

Johan 18:22

Jisu noa kathae roṛketʼ khan sorre teṅgo akan tahẽkan kạmiyạko modren mitʼ hoṛ do uniye thapakedeteye metadea, “Maraṅ naeke nonkam roṛ ruạṛae kana?”

Luk 22:64

Ar mẽtʼko betʼketʼtaete uniko metadea, “Mase lạime, okoeye dalketʼmea?

Mathae 23:34

Ona iạte iń do nạbiko, ạkilanko, ar sostor baḍaeko ape ṭheniń koletʼkoa. Ar ape do onko modren adomko dope gocʼkoa ar adomko dope kuruskoa. Ar adomko do apeakʼ sunạgogkorepe cạbuktepe dalkoa ar mitʼ nagraha khon eṭakʼ nagrahatepe laga baṛakoa.

Jirimiạ 38:6

Unre onko do Jirimiạko sapʼkedea ar rajren hopon Malkiạwakʼ kuńreko bhoraokedea. Noa kuń do pahradarkoakʼ raca talarege tahẽkana. Ar Jirimiạ do baberte tolkate ona kuńreko pheḍkadea. Ona kuńre dakʼ do baṅ, menkhan eken losotʼge tahẽkana; ar Jirimiạ do ona losotʼreye unumokʼkan tahẽkana.

Jirimiạ 37:20

Ńitokʼ do, E ińren kisạ̃ṛ maharaj, nehõrokʼ kạnạń, dayakate ańjomtińme. Am samaṅre iń do noa nehõriń dohoyeda olokʼicʼ Jonathanakʼ oṛakʼte do alom kolkạńạ, arem kolliń khan iń do onḍegeń gujukʼa.”

Jirimiạ 18:23

Menkhan E Probhu Isor, iń gojeń lạgitʼ noako soṛojontro reakʼ katha dom baḍaegea. Onkoakʼ noa behok do alom ikạitakoa se amakʼ mẽtʼãhã samaṅ khon onkoakʼ kại do alom meṭaotakoa. Onko do samaṅregeko tohotʼ gurokʼma; ar amem edrekokʼ jokhecʼge halawakome.

Jirimiạ 37:4

Onako oktere Jirimiạ do hoṛko talareye dãṛãnkan tahẽkana, ente unhõ uni do hajotre bae bond ocoakan tahẽkana.

Jirimiạ 32:2

Unre Babel rajren lạṛhại phạdko do Jerusalemko gherao esetʼ akatʼ tahẽkana ar Jirimiạ do raj oṛakʼ reakʼ pahradarkoakʼ racareko bondi akade tahẽkana. Uni do onḍegeye tahẽkana,

Jirimiạ 39:15

Jirimiạ do pahradarkoakʼ racare tinre bondi akane tahẽkana unre Probhu Isorakʼ katha do uni ṭhen hecʼena,