Jirimiạ 31:12 - সান্তালী বাইবেল

¹² Onko do hecʼkate Sion reakʼ cetan ṭhạ̃ireko rạskạkʼa; ar iń emakʼ ḍher anaj, nãwã darkha rasa, sunum, bhiḍi merom ar pal ḍaṅgrakoren hopon ńamkateko rạskạkʼa. Onko do bhage dakʼ ńamakʼ bagwan lekako hoyokʼa; onko do ar bako nijorokʼa.

Jirimiạ 31:12 Referans Kwoze

Jesaea 35:10

Probhu Isorren chaḍao hoṛ doko ruạṛ hijukʼa. Onko do rạskạ sereń sereńte Sionteko bolokʼa; onkoakʼ bohokʼ reakʼ mukuṭ do jaejug reakʼ rạskạge hoyokʼtakoa. Onko do kusi ar rạskạte onako ńama, unre duk ar kũhrạukʼ dokin dạṛjoṅa.

Joel 3:18

“Enhilokʼ maraṅ buruko khon nãwã darkha rasako ńamokʼa ar huḍiń buruko khon do toage. Jihudạ reakʼ sanam dakʼ ạtukʼ nalako khon do dakʼ ạtu oḍokokʼa. Probhu Isorakʼ oṛakʼ khon hõ mitʼṭecʼ jharna phuṭạukʼte Siṭim reakʼ buru nalare dakʼe emakʼa.

Jesaea 58:11

Iń Probhuge Isorge sanam ghạṛicʼ iń ạyurpea; ar khaṅgoṭ jaegakoreń tirpit ocopea ar hoṛmore daṛeń danapea. Ape do dakʼ ńametʼkan bagwan lekape hoyokʼa ar nonkan dakʼ jharnakope hoyokʼa ona do baṅge ańjedokʼa.

Johan 16:22

Onkage ape hõ ńitokʼ do haron ar kosṭope ńameda; menkhan arhõ apeko sãoteń ńapamokʼa unre apeakʼ mon do rạskạte perejokʼa ar ona rạskạ do okoe hõ bako recʼ daṛeapea.

Jeheskel 17:23

Israel reakʼ usul buru cetanre ona khon ḍạrko oḍokokʼa ar jo bahakʼa; ar ona do mitʼṭecʼ napae okocʼ debdạru dare hoyokʼa. Joto lekan cẽṛẽko do ona reakʼ ḍạrre tukạko benaoa ar ona reakʼ umulreko tahena.

Jesaea 65:19

Iń do Jerusalem iạteń rạskạkʼa ar ińren hoṛko iạteń kusikʼa; ona talare ar jãhãn rakʼjoṅ do baṅ ańjomokʼa.

Jesaea 60:20

Amren siń cando do tisge ar bae hạsurokʼa, ar amren ńindạ cando hõ ar bae adokʼa. Probhu Isorge amakʼ jaejug reakʼ marsale hoyokʼa; ar amakʼ hirdạukʼ reakʼ dinko do mucạdokʼtama.

Johan sodor 21:4

Uni do onkoakʼ mẽtʼ dakʼe jodtakoa. Moron do ar baṅ hoyokʼa; duk, haso ar rakʼ joṅ do ar baṅ tahena, ente pạhilakʼ joto do parom calao akana.”

Johan sodor 7:17

ente Bheḍa Hopon okoe do siṅghạsonre menae unige onkoren gupiyicʼe hoyokʼa. Ar jiwetʼ dakʼ reakʼ jharna ṭhene idikoa, ar Isor do onkoakʼ mẽtʼdakʼe jodtakoa.”

Romiko lạgitʼ Pạul Apostolakʼ ciṭhi 2:4

Am do Isorakʼ asambheṛ daya, sahao daṛe ar soborim neṅghaoetʼtaea. Am dom hiṛiń akada, Isorakʼ noa daya do kại khone ạcur ruạṛetʼmea mente.

Hosea 3:5

Ar ona tayom do akoren Probhu Isor ar onkoren raj Dạud secʼko ruạṛa. Mucạtʼre onko do Probhu Isorakʼ bhor ńam lạgitʼ botor salakʼ uni ṭhenko hijukʼa.

Sereńko 130:4

Menkhan am ṭhen do ikạ menakʼa, jemon hoṛko botoram.

Jeheskel 20:40

Unre disạm talare ińakʼ sonot burure, Israel reakʼ usul burure, Israelren sanam hoṛ do ińko sewawạńạ ar iń do onḍe onkoń ataṅkoa. Onḍe iń do apeakʼ joto lekanakʼ sonot samaṅokʼakʼ, dan ar bhage bhage sandeskoń ataṅtapea.

Jesaea 51:11

Probhu Isorren rukhiyạ akan hoṛ doko ruạṛ hijukʼa ar sereń sereńte Sionteko rakapʼa. Ar jaejugakʼ rạskạge onkoakʼ bohokʼ reakʼ mukuṭ do hoyokʼtakoa. Onko do ạḍiko hulạsokʼa ar duk ar kũhrạu do onko khon ńir pharakokʼa.

Jesaea 1:30

Ape do ona debdạru dare lekan kope hoyokʼa one oka reakʼ sakam do tolmojokʼkan; ar ona bagwan lekan kope hoyokʼa one oka do dakʼte baṅ paṭao akatʼ.

Jirimiạ 31:4

Ńitokʼ do uniye meneda, “E kũạri kuṛi Israel, iń do arhõń jut ruạṛmea, onate am do arhõm jut dohṛakʼa. Am do arhõ amakʼ tablam hataoa ar rạskạkʼko tulucʼem enecʼa.

Jirimiạ 3:14

‘Iń Probhu Isor do arhoń meneda, ‘E bạṛicʼ horte sen akan hoṛko, dela ruạṛ hijukʼpe, ente iń kangeạń aperen jãwãe do. Iń do ape tala reakʼ mimitʼ nagraha khon mitʼ hoṛ ar mimitʼ bõsrenko khon babar hoṛ bachaokate Sionteń ạgupea.

Jirimiạ 31:6

Nonkan dinko hijukʼa tinre Ephrayimakʼ buru coṭre pahradarko do hohoateko mena, ‘Dela, Sionte aboren Probhu Isor ṭhen bon calakʼa.’ ”

Jirimiạ 31:7

Probhu Isore meneda, “Ape do Jakob lạgitʼ kusi monte sereńpe; sanamko khon soros jạtrenko lạgitʼ sarhao sereńpe. Ape do sarhao sereńate menpe, ‘E Probhu Isor, amren hoṛko, Israelren sarecʼ hoṛko baṛe bańcaokom.’

Jirimiạ 31:24

Onko hoṛ do Jihudạ ar ona reakʼ sanam nagrahareko girobasokʼa ar cacasko ar okoe do akoren ạsul janwarko anteko ạcur baṛaekan onko hõ onḍeko tahena.

Jirimiạ 31:25

Iń do laṅga akankoń cerṭha ocokoa ar nacarkoakʼ ontor doń daṛe ocoytakoa.”

Jirimiạ 32:15

ente noa disạmre oṛakʼ-duạr, jaega-jumi ar darkha bagwan do arhõ kiriń ạkhrińokʼa. Iń Israelren Isor phạdkoren Probhuge noa katha doń meneda.’

Jirimiạ 33:12

Noa potit jumi, okare manwa ar janwar celege bạnukʼko, onḍe ar onḍenakʼ sanam nagraha ar atoko do arhõ gukʼpiko ar bhiḍiko lạgitʼ ạtiń ṭạnḍige hoyokʼa.

Jirimiạ 33:13

Usul ar copotʼ buru ṭoṭha reakʼ sanam ato ar nagrahakore, Benjạmin ṭoṭhakore, Jerusalem beṛhaete ar Jihudạ ar Negeb reakʼ sanam ato ar nagrahakore bhiḍi gukʼpiko do akoren bhiḍiko lekha lekhateko chaṛ sạ̃itạukoa. Iń Probhu Isorge noa katha doń meneda.”

Jeheskel 34:14

Onko do bhage bhage ạtiń ṭạnḍireń gupikoa ar Israel reakʼ usul burukore onkoakʼ ạtiń ṭhạ̃i do hoyokʼa. Onko do bhage ṭhạ̃iregeko tahena ar onḍe Israelakʼ burukore bhage ạtiń ṭạnḍireko ạtiń baṛaea.

Hagae 2:19

Ńitokʼ apeakʼ murạire jãhãn itạge bạnukʼtapea ar unạkʼ din do darkha nạ̃ṛĩ, loa dare, ḍạlim dare ar jạitun darere jo hõ thoṛage sapʼlena, menkhan teheń khon doń bhorapea.’ ”

Jesaea 52:8

Ańjomme, amren pahradarko doko andoṛetʼkana, onko do rạskạte mitʼ domteko sereńeda, ente Probhu Isor do tinre Sionteye ruạṛ hijukʼa unre onko do akoakʼ mẽtʼte onako ńela.

Jeheskel 36:30

Iń do dare reakʼ jo ar khet reakʼ phosolkoń baḍhao ocoytapea jemon akal khạtirte jạtrenko talare alope bemanot ocokʼ.

Sakariạ 8:12

Ńitokʼ do itạ khon dare do mońjtege harakʼa, ar darkha nạ̃ṛĩre jo sabokʼa, khetre phosol janamokʼa ar noko jạtren jiwetʼ tahen hoṛko do iń emakʼ ạidạri lekate jotowakʼko ńama.