Jirimiạ 29:32 - সান্তালী বাইবেল

³² Iń do khạṭige Nehelamren Semaya ar uni bõsrenkoń sạjạikoa. Noko jạtrenko modre uniren do celege bako tahena ar ińren hoṛko okań bhạlạiko ona do bae ńela, ente uni do iń upạrteye hul akada. Iń Probhu Isorge noa katha doń meneda.’ ”

Jirimiạ 29:32 Referans Kwoze

Jirimiạ 28:16

Onate Probhu Isore meneda, ‘am do dhạrti khoniń ocokʼmea. Niạ bochorge am dom gujukʼa, ente am do Probhu Isor upạrte hul reakʼem porcar akada.’ ”

Jirimiạ 17:6

Uni do potit jumire mitʼṭecʼ jhạuạ lekanae; bhage okte hecʼlen khan ona do bae ńela. Uni do hahaṅkarre lolo ṭhạ̃ire, metakʼme okare celege bako girobasokʼ nonkan reḍha ṭhạ̃ireye girobasokʼa.

Jirimiạ 22:30

Probhu Isore meneda, “Am do olme, nui hoṛren cele gidrạge bạnukʼkotaea. Uni do bae jo baha daṛeakʼa ar uniren hoponko hõ bako jo bahakʼa. Onkoren okoehõ Dạudakʼ siṅghạsonre do bako duṛupʼa se Jihudạ disạmre bako rajokʼa.”

2 Rapajko 7:2

Raj do okoe gutiye goṛowade tahẽkan uni guti do Isorren hoṛe metadea, “Ńelme, Probhu Isor do serma reakʼ duạrkoe jhicʼlere hõ onka do ohoge hoylena?” Elisaeye roṛ ruạṛkeda, “Amakʼ mẽtʼtege noa dom ńela, menkhan am do ona reakʼ cetʼge bam jom ńama.”

Amos 7:17

Ar onatege Probhu Isor doe meneda, ‘amren bạhu do nagrahare kusumbiye hoyokʼa, ar amren hopon ar hoponerako do tarwaṛeteko gujukʼa. Amakʼ disạm do jokha baberteko hạṭińjoṅa ar am do mitʼṭecʼ bhonḍ disạmrem gujukʼa. Israelren hoṛ do khạṭige akoakʼ disạm khon eṭakʼ disạmteko bondi idi ocokʼa.’ ”

Jirimiạ 35:19

Ona iạte iń do Israelren phạdkoren Probhu Isoriń meneda, iń sewawạń lạgitʼ Rekabiạren hopon Jonadabakʼ bõsre tishõ hoṛkoakʼ khạnti do baṅ hoyokʼtakoa.”

Jirimiạ 20:6

Ar E Pashur, am ar am gharońjren sanam hoṛ do bondikate Babeltepe idi ocokʼa. Onḍe do amem gujukʼa arko topamea; ar amren okoeko gateko ṭhen nạbi lekate eṛe katham roṛakatʼ onko jotokoakʼ dosa hõ onkage hoyokʼtakoa.”

Jesaea 14:22

Phạdkoren Probhu Isore meneda, “Iń do onko upạrteń teṅgona; Babel reakʼ ńutum ar onare jiwetʼ menakʼko hoṛ ar onko bõsren doń caba utạrkoa.

Jesaea 14:20

Am do eṭakʼ rapajko leka do bam topa ocokʼa, ente amakʼ disạm dom jarkhar akada ar amren hoṛkom khũn akatʼkoa. Bạṛicʼ bõsrenkoakʼ katha do artis hõ baṅ ńumogokʼa.

2 Rapajko 5:27

Onate Namanakʼ murhucʼ jom rog do am ar amren bõsko talare jaejug hạbicʼ tahena.” Unre Gehosi do Elisae samaṅ khone calaoena ar uniyakʼ hoṛmo do murhucʼ jom rogte him leka ponḍentaea.

Exodus 20:5

Onako do alom ḍobokʼakʼa, ar sewa hõ alom sewawakʼa, ente iń Probhuge amren Isor do. Iń do ińakʼ paona bhoktiń khojkana. Okoeko kurudạń onkoakʼ kại reakʼ sạjại do onkoren hoponko ṭhen pe pon piṛhi hạbicʼ iń pańja halawako kana.

Dosar Biboron 13:5

Menkhan uni nạbi se uni kukmũ ńeńelicʼ hoṛ dope gocʼ giḍikaea, ente aperen Probhu Isor, okoe do Misor disạm khone oḍok ạguakatʼpe ar golam oṛakʼ khone chaḍao akatʼpe, uni upạrteye uskạu akatʼpea ar aperen Probhu Isor oka horte calakʼ reakʼe hukumakatʼpe ona hor khon ruạṛpe lạgitʼe kurumuṭukana. Onate ape tala khon uni bạṛicʼicʼ dope marao giḍikaea.

1 Rapajko 13:18

Uni nạbiye roṛ ruạṛkeda, “Iń do am lekan mitʼṭen nạbi kangeạń. Probhu Isorakʼ katha leka mitʼṭen dut do ińe men akawạdińa jemon ińakʼ oṛakʼteń ruạṛ idime jemon am do senkatem jom-ńũ daṛeakʼ.” Menkhan uni do eṛe kathae metadea.

Jirimiạ 29:24

Nehelamren Semaya dom metaea,

Jirimiạ 30:1

Probhu Isor ṭhen khon noa katha do Jirimiạ ṭhen sodorena,

Jirimiạ 36:31

Iń do am ar amren hoponko ar amren kạmiyạkoakʼ behokakʼko iạteń sạjạipea; iń do ape upạrte okako muhin reakʼ kathań roṛakatʼ ona sanamakʼge ape cetanre, Jerusalemre ar Jihudạren hoṛko cetanreń paṛao ocoya, ente ape do ińakʼ katha bape ańjomletʼtińạ.’ ”

Jeheskel 20:38

Ape modre okoe iń upạrteko hul onko doń sạṅgiń giḍikakoa. Ar onko okaṭakʼ disạmreko girobasokʼkan onḍe khoniń oḍok ạgukorehõ onko do Israel disạmre bako bolo daṛeakʼa. Unre apepe baḍae daṛeakʼa, iń kangeạń Probhu Isor do.

Amos 9:10

Ińren sanam kại hoṛko modre okoeko men, ‘muhin do bae tiyokʼlea se ale ṭhen baṅ hijukʼa,’ onko sanamge tarwaṛeteko gujukʼa.”