Jirimiạ 29:14 - সান্তালী বাইবেল

¹⁴ Ape dope baḍaeyińạ, ar iń do apeakʼ bondi dosa khoniń ruạṛ ạgupea. Okoe jạtrenko ar ṭhạ̃ireń sạṅgiń akatʼpe onḍe khon iń doń samṭao jarwapea. Ar okaṭakʼ ṭhạ̃i khon bondikateń idi ocoletʼpe iń do onḍegeń ạgu ruạṛpea. Iń Probhu Isorge noa katha doń meneda.”

Jirimiạ 29:14 Referans Kwoze

Jirimiạ 30:3

ente nonkan dinko hijukʼkana tinre iń do ińren hoṛ Israel ar Jihudạ reakʼ dosań ạgu ruạṛa ar okaṭakʼ disạm do onkoren hapṛamkoń ematʼko tahẽkan ona disạmre iń do onkoń ruạṛ ạgukoa, ar ona do onkoakʼ dokholre tahena.”

1 Bõsbudạ 28:9

“Ar ińren hopon Solomon, am do am apatren Isor samaṅrem taṛam ar amakʼ mon ar ontorte unim sewawaea, ente Probhu Isor do sanamkoakʼ ontore baḍaekana ar ganḍonjoṅakʼ hõe baḍaegea. Uniyakʼ monsubạ baḍae reakʼem kurumuṭule khanem baḍae daṛeakʼ, menkhan unim bạgiye enḍekhan uni hõ jaejug lạgitʼe nihạ̃tmea.

Romiko lạgitʼ Pạul Apostolakʼ ciṭhi 10:20

Ona tayom Jesaea do arhõ murukteye menakada, “Onko ṭhengeń tahẽkana, menkhan jãhãn goṛo ńam lạgitʼ iń ṭhen do bako hecʼlena. Iń do onko hoṛko nehõrokʼ lạgitʼ ạtiń ematʼko tahẽkana, menkhan iń ṭhen do cetʼge bako arojlakʼa.”

Jirimiạ 30:10

“Onate E ińren golam Jakob, am do alom botorokʼa; E Israel, alom as chuṭạukʼa. Iń do sạṅgiń ṭhạ̃i khon am ar bondi idi ocoakan amren hoponko khạṭigeń bańcaokoa. Jakob do arhõ suluk ar nirạiteye tahena ar okoehõ bako botor ocoyea.

Jesaea 45:19

Iń do oko danaṅre hõ bạń roṛakada, ńut reakʼ disạmre hõ bạń roṛakada. Ar Jakobren bõsko hõ bạń men akawatʼkoa,, ‘ape do ạuṛiyakʼgepe ńam baṛayedińa.’ Iń Probhu Isor do hok reakʼ kathań roṛeda; ar oka sạriạkʼkan onageń lại jạhireda.

Sereńko 126:4

E Probhu Isor, Negeb reakʼ dakʼ nalako leka alehõ lahate leka pheraoleme.

Sereńko 126:1

Probhu Isor do tinre lahate leka Sione pherao ruạṛkeda, unre kukmũ ńelketʼ leka bon bujhạukeda.

Sereńko 46:1

Isorge aboakʼ hirlạ ar daṛe; gạrre uni do gokʼṛoyicʼ kanae.

Sereńko 32:6

Ona iạte tinạkʼ din ạt menakʼ unạkʼ din amko botoramkan hoṛ do am ṭhenko koejoṅ ma; sạrige, muhin do banbạsi dakʼleka tinre hijukʼa unre ona do onko baṅ paṛao akoa.

Dosar Biboron 30:3

unre Probhu Isor do bondi dosa khone chaḍao ruạṛ ạgupea. Uni doe mãyãwapea ar okoe jạtrenko talareye pasnaope onko tala khon arhõe halaṅ samṭao ruạṛpea.

Dosar Biboron 4:7

Nonkan ar okoe maraṅ jạtren menakʼkoa one onkoren Isor do ako ṭhenko tahenkan, cetʼleka aboren Probhu Isor bon hohowaere sorreye ńamokʼkan?

Sephaniạ 3:20

E Jerusalemren hoṛko, ona jokhecʼ iń do apeń ạgu jarwapea. Ar lahate leka tinreń ruạṛkatapea unre dhạrtiren sanam jạtrenko talare ape do manot ar ṭhonokan hoṛiń hoyocopea, ar onape ńela. Iń Probhu Isorge noa katha doń meneda.”

Mikạ 4:12

Menkhan onko do Probhu Isorakʼgoṭawakʼ reakʼ katha do bako baḍaea; onko do bako bujhạu daṛeakʼkana je, uni do binḍạ leka khạrạire en ko lạgitʼe jarwa akatʼkoa mente.

Jirimiạ 51:10

Probhu Isorren hoṛkan bon ona do uniye udukʼ akada; aboren Probhu Isor okae ceka akatʼ dela, ona do Sionre bon lại jạhirma.

Jesaea 55:6

Probhu Isor do sorreye tahenrege uni secʼ ruạṛokʼpe; ar sorreye tahenrege uni ńam baṛayepe.

Amos 9:14

Bondi dosare menakʼko ińren hoṛ Israelkoń ruạṛ ạgukoa; onko do dhaṅdhaser akan nagraha arhõko benao aroea ar onakoreko tahena. Onko do darkha bagwanko benaojoṅa arko ńũiya; onko do bagwanko benaoa ar ona reakʼ joko joma.

Dosar Biboron 30:1

“Apeko samaṅre oka bhor ar sarapiń sodorketʼ ona sanamakʼge ape cetanre hijukʼa. Ona tayom Probhu Isor okoe jạtrenko talare tinreye chirchạturpea ar onko talarepe girobasokʼa unre ape do noako kathape moneyakʼa.

Dosar Biboron 30:5

Uni do aperen hapṛamkoakʼ disạmteye ruạṛ ạgupea ar ape do arhõ onape hat ruạṛa. Uni do ạḍiye bhạlạiypea ar aperen hapṛamko khon hõ ḍhere saṅge ocopea.

Jesaea 43:5

Alom botorokʼa, ente iń do am sãotege minạńa. Purub disạm khon amren bõskoń ạgukoa ar pạchim disạm khon do amiń jarwamea.

Jesaea 43:6

Ar utạr reakʼ disạm doń metaea, ‘onko aṛakʼkako me,’ Ar dạkhin disạm doń metaea, ‘alom aṭkaokoa. Iń do unkiniń metakinạ, ‘aben do sạṅgiń disạm khon ińren hoponko ạguko ben, ar pirthimi reakʼ ses simạna khon ińren hoponerako ạguko ben.

Jirimiạ 3:14

‘Iń Probhu Isor do arhoń meneda, ‘E bạṛicʼ horte sen akan hoṛko, dela ruạṛ hijukʼpe, ente iń kangeạń aperen jãwãe do. Iń do ape tala reakʼ mimitʼ nagraha khon mitʼ hoṛ ar mimitʼ bõsrenko khon babar hoṛ bachaokate Sionteń ạgupea.

Jirimiạ 8:3

Okareń sạṅgiń giḍikako onḍe onko dusṭạmi jạtren sarecʼ jiwetʼ tahen hoṛ do jion khon morongeko kusiyakʼa. Noa katha do phạdkoren Probhu Isorgeye roṛeda.”

Jirimiạ 12:15

Menkhan onkoń totʼ giḍikako tayom do arhõń dayawakoa onkoakʼ apan ạpin ạidạrite ar mitʼke mitʼ hoṛkoakʼ disạmteń ruạṛ ạgukoa.

Jesaea 14:1

Probhu Isor do Jakobe mãyãwaea; uni do arhõ Israele bachaoea ar onkoakʼ disạmreye duṛubea. Bidisiạ hoṛko do onko sãoteko seledokʼa ar onko do Jakobakʼ bõsrenko tulucʼko midokʼa.

Jirimiạ 30:18

Probhu Isore meneda, “Jakobakʼ bõsren hoṛkoakʼ dosa doń ruạṛtakoa ar onko cetanre dayań uduga. Nagraha do ona dhaṅdhaser cetanre arhõ benao ruạṛokʼa ar raj oṛakʼ do lahateakʼ ṭhạ̃ire teṅgo akae tahena.

Jirimiạ 31:16

Thirokʼme alom raga ar mẽtʼ dakʼ jodtam, ente amakʼ kạmi reakʼ kuṛại dom ńamgea. Onko do bạirikoakʼ disom khonko ruạṛ hijukʼa.

Jirimiạ 31:17

Onate tayom daram din lạgitʼ as do menakʼgetama. Amren hoponko do akoakʼ disạmteko ruạṛ hijukʼa. Iń Probhu Isorge niạ katha doń meneda.

Jirimiạ 31:23

Israelren Isor phạdkoren Probhui meneda, “Bondi dosa khon tinre hoṛkoń ruạṛ ạgukoa unre Jihudạ disạm ar ona nagraharen hoṛ do arhõko mena, ‘E dhoromte perecʼ tahen ṭhạ̃i, E sonot buru, Probhu Isor do ame bhoramma.’

Jeheskel 39:25

Probhu Isor do arhõe menkeda, “Jakob do ńitokʼ bondi dosa khoniń ruạṛ ạguyea ar Israelren sanam hoṛkoń mãyãwakoa ar ińakʼ ńutum reakʼ sonottetʼ lạgitʼ iń ãṭokʼa.