Jirimiạ 23:5 - সান্তালী বাইবেল

⁵ Probhu Isore meneda, “Ona dinko hijukʼkana tinre iń do Dạudakʼ bõsre mitʼṭecʼ dhorom reakʼ kahleń omon ocoya; uni do raj lekate ạkil salakʼ rajosṭiye calaoa ar disạmre hok ar dhorom reakʼe kạmiya.

Jirimiạ 23:5 Referans Kwoze

Jesaea 4:2

Enhilokʼ Probhu Isorakʼ kahle do husnạkʼ ar ṭhonokanakʼ hoyokʼ ar disạm reakʼ jo do Israelren sarecʼ hoṛkoakʼ mạhima ar saj lạgitʼge hoyokʼa.

Jesaea 52:13

Probhu Isore meneda, “Ńelpe, ińren guti doe jo bahakʼa. Uni doe rakapʼ ocokʼa ar ạḍitetʼe maraṅokʼa.

Jesaea 9:7

Uniyakʼ mạliki reakʼ baḍhaokʼ ar suluk do baṅ cabakʼa. Uni do Dạudakʼ siṅghạson ar uniyakʼ rajosṭi cetanreye rajokʼa; uni do un okte khon jaejug hạbicʼ hok reakʼ bicạr ar dhoromte onae bandhaoa are ṭarhao utạra. Phạdkoren Probhu Isorakʼ ãṭge noae hoeocoya.

Sakariạ 3:8

E Maraṅ naeke Josuạ, am do ańjomme ar am samaṅre duṛupʼakan amren sãoten naeke hõko ańjomma. Iń okaṭakʼ kahle metakʼme ińren gutiń ạguiye unigeye hoyokʼa naekeko reakʼ cinhạ do.

Jesaea 53:2

Uni samaṅre bale cara leka uni doe omon rakapʼena ar rohoṛ ot khon rehetʼ poha lekae harayena. Uniyakʼ do nonkan rup se ṭhonok hõ baṅ tahẽkantaea, one onate uni secʼ bon beṅgetʼke; ar cetʼ ḍhob hõ baṅ tahẽkantaea, onate bon hạ̃ske.

Sakariạ 9:9

“E Sion kuṛi, ma rạskạkʼme. E Jerusalem, hulạsokʼme. Ńelme amren raj do am ṭhene daraekana; uni doe dhoromgea ar uni ṭhen do bańcao menakʼa; uni doe mạ̃hirgea, ar gadha cetanre gadha hopon cetanreye decʼ hijukʼkana.

Johan sodor 19:11

Tayomte iń do serma jhicʼ akan, ar onḍe mitʼṭen ponḍ sadomiń ńelkedea. Ar okoe uni sadomreye decʼakan tahẽkan uniyakʼ ńutum do pạtiạr ar sạriyicʼ. Uni do dhoromteye bicạreda are lạṛhại kana.

Amos 9:11

Probhu Isore meneda, “Enhilokʼ Dạudakʼ lạnduṛ akan oṛakʼ do arhõń beretʼ ruạṛa. Uniyakʼ rạputʼ ṭhạ̃ikoń jut aroya, ar dhaṅdhaserakʼ koń ṭhika ar lahate lekageń beretʼ ruạṛa.

Jirimiạ 30:9

Ona bodolte onko do akoren Probhu Isor ar akoren raj Dạudren mitʼṭen hoponko sapʼsoraea one iń do onkoren rajiń hoeocoye.

Jirimiạ 30:3

ente nonkan dinko hijukʼkana tinre iń do ińren hoṛ Israel ar Jihudạ reakʼ dosań ạgu ruạṛa ar okaṭakʼ disạm do onkoren hapṛamkoń ematʼko tahẽkan ona disạmre iń do onkoń ruạṛ ạgukoa, ar ona do onkoakʼ dokholre tahena.”

Jirimiạ 23:6

Unre Jihudạ do rukhiyại ńama ar Israelko do khạtirjomako girobasokʼa. Ar uni do noa ńutumgeye hoho ocokʼa ‘Probhu Isorge aboakʼ dhorom do.’

Ibriko 8:8

Menkhan Isor do acʼren hoṛkoakʼ dos udukʼako lạgitʼ sonot sostorreye menakada: Probhu Isore meneda, “Okte hijukʼ kana, iń do Israel ar Jihudạren hoṛko lạgitʼ mitʼṭecʼ nãwã bondobosiń dohoya.

Johan 1:45

Philip do Nathanaele sendra ńamkedeteye metadea, “Mose do okoeyakʼ katha ạn-ạrikoreye ol oṭo akatʼ ar nạbiko hõ okoe reaṅko olakatʼ uni do alele ńam akadea. Uni do Nasaret atoren Josephren hopon Jisu kanae.”

Hosea 3:5

Ar ona tayom do akoren Probhu Isor ar onkoren raj Dạud secʼko ruạṛa. Mucạtʼre onko do Probhu Isorakʼ bhor ńam lạgitʼ botor salakʼ uni ṭhenko hijukʼa.

Daniel 9:24

“Amren hoṛko ar amakʼ sonot nagraha lạgitʼ eaegel hapta ṭhik dohoakana. Ar onako oktere bạṛicʼakʼko do cabakʼa, bedhorom hõ baṅ tahena, kại do puruchunokʼa, ar jaejug dhoromge bikạukʼa, dorson ar nạbi katha purạukʼa ar sonot utạrakʼ ṭhạ̃i do ojokʼ bahal ocokʼa.

Jirimiạ 31:27

Probhu Isore meneda, “Okte hijukʼ kana one unre iń do Israelko ar Jihudạren hoṛko ar janwarko itạ lekań erkoa.

Jirimiạ 22:3

Probhu Isore meneda, ‘oka hok reakʼkan ar oka ṭhikakʼ kan ona onkaepe. Okoeye luṭ ocokʼkan uni do acʼren sasantaoicʼ khon rukhiyạyepe. Bidisiạko, ṭũạr amako ar rạnḍi maejiuko jãhãnakʼ alope behoktakoa se alope santaokoa ar niạ ṭhạ̃ire miridoskoakʼ mãyãm alope joro ocoytakoa.

Jesaea 53:10

Probhu Isor do acʼakʼ kusilekage uniye talga tạuạkʼ ocokedea ar duke jom ocokedea. Probhu Isorren golam do tinre acʼakʼ jiwiye samaṅtaea unre uni do acʼren hoponkoe ńel ńamkoa ar uniyakʼ bahaokʼ dine baṛhaotaea; uni hotetege Probhu Isorakʼ sana do purạukʼa.

Johan 1:49

Noate Nathanael do Jisui metadea, “E Guru, am do Isorren Hopon kanam ar amge Israelkoren raj do.”

Mathae 2:2

“Jihudikoren janam akan raj do okare menaea? Ale do uniren ipil purubrele ńelakadea ar uni sewawae lạgitʼle hecʼakana.”

Jeheskel 34:29

Iń do upjạuakʼ ot baṛgekoń emakoa; disạm talare onko do akalre ar bako paṛaokʼa ar eṭakʼ jạtrenko ṭhen hõ bako henosta ocokʼa.

Sereńko 80:15

Okako poha do amakʼ titem rohoe akatʼ, ar okaṭakʼ reakʼ ḍạr do am lạgitʼem daṛe ocoakatʼ;

Sereńko 45:4

Sạriyakʼ, mạ̃hir ar dhorom secʼ amakʼ ṭhonokte jitạuicʼ leka mohnḍakʼme; ar amakʼ jojom ti do botoranakʼkoe kạmima.

Jirimiạ 22:30

Probhu Isore meneda, “Am do olme, nui hoṛren cele gidrạge bạnukʼkotaea. Uni do bae jo baha daṛeakʼa ar uniren hoponko hõ bako jo bahakʼa. Onkoren okoehõ Dạudakʼ siṅghạsonre do bako duṛupʼa se Jihudạ disạmre bako rajokʼa.”

Jirimiạ 22:15

Aema Aema debdạru dareko tahẽlen khan ona do cetʼ raje benao daṛeama? Amren ạpum do bhage bhageye jom-ńũiyetʼ tahẽkanre hõ okaṭakʼ ṭhikakʼ ar hok reakʼakʼ kan onageye onkayetʼ tahẽkante un jokhecʼ jotowakʼ do bhagege tahẽkana.

1 Korinthiko 1:30

Jisu Mạsi tulucʼpe mitʼakan ona do Isor khonge hoyakana. Jisu Mạsige abo lạgitʼ Isor ṭhen khone emakan akel do; unige aboren dhoromicʼ, sonoticʼ ar chakʼḍaoicʼ.

Jesaea 42:6

“Iń Probhu Isorge dhoromreń hohoakatʼmea; iń do amakʼ tiyiń sabtama. Ińgeń rukhiyạmea ar ińren hoṛko lạgitʼ mitʼṭecʼ bondobos menkateń dohomea ar eṭakʼ jạtrenko lạgitʼ do marsal lekań hoe ocomea.

Jirimiạ 29:11

Ape lạgitʼ ińakʼ goṭawakʼ do ińiń baḍaea; ona do apeakʼ bhạlại lạgitʼge, bạṛicʼ lạgitʼ do baṅa. Ar ona goṭawakʼ hotetege apeakʼ tayom daram reakʼ as do purạukʼtapea.

Jeheskel 21:27

Dhaṅdhaser, dhaṅdhaser! Iń do noa jotogeń dhaṅdhasera! Ar sạriyakʼ reakʼ ạidạri okoeyakʼ menakʼtae uni ạuriye ruạṛ hijukʼ hạbicʼ noako do ar baṅ tahena. Iń do unige noakoń emaea.

Jeheskel 45:8

Niạ ṭhạ̃ire Israel disạmren disạm cakʼlaoko do ińren hoṛko ar bako santaokoa, bickom Israel jạtrenko do akoakʼ gusṭirenko lekate jumiko hạṭińakoa.

Hosea 1:11

Jihudạ ar Israelren hoṛko do arhõko midokʼa ar ako cetanre mitʼṭen mukhiyạko dohoyea. Ona laha oka disạmre bondi akanko tahẽkan onḍe khon onko doko calaojoṅa, ente Jisreyelakʼ ona din do maraṅge hoyokʼa.

2 Samuel 23:3

Israelren Isore meneda, Israelren asray-buru do ińe mitạń kana, ‘Okoe hoṛ dhoromteye ḍanṭaoko ar Isore botorae,

Sereńko 99:4

Okoe raj do dhorom bicạre kusiyakʼ uniyakʼ daṛe do amgem ṭarhao akatʼtaea, jemon uni do dhoromteye bicạr daṛeakʼ. Amge Jakob bõsrenko talare hok bicạr ar dhoromem dohoakada,

Jesaea 9:5

Lạṛhại lạgitʼko hạjukʼkan mitʼke mitʼ lạṛhại birkoakʼ panahe, ar mãyãmte lohotʼ akan mitʼke mitʼ kicricʼ do seṅgelre atar ocokʼa.

Jesaea 9:6

Noa jotowakʼ do hoyokʼa, ente abo lạgitʼ mitʼṭen koṛa gidrại janamokʼa, mitʼṭen hopon do abo lạgitʼe emocokʼa. Mạliki do uniyakʼ tarenrege tahena, ar uni ńutum do hoyokʼa hahaṛa sosolhayicʼ, daṛeanicʼ Isor, jaejugren apat, ar sulukren raj.

Jesaea 33:5

Probhu Isor doe dayawạnicʼ kana! Uni do sermareye tahenkana; Sion do hok reakʼ bicạr ar dhoromteye perecʼ akada.

Jesaea 45:24

Onko do iń reaṅko roṛa, ‘eken Probhu Isorrege dhorom ar daṛe do menakʼa.’ Hoṛko do iń ṭhenko hijukʼa ar okoe ińko edreạń onko doko lajao ocokʼa.

Jeheskel 34:16

Ar okoeko atʼakan onkoń sendra ạgukoa ar okoe do eṭakʼ hor secʼko ghańjeṛ akan onko doń ruạṛ ạgukoa. Ar hạn akanko do ghaokoń bedhaokatakoa ar nijorko do jorankoń hoyocokoa, menkhan lodgopʼ ar daṛeanko doń marao giḍikoa, ente iń do dhorom reakʼ bicạr talate ińren palrenkoń ńel jutkoa.

Mikạ 5:3

Ona iạte uni do unhạbicʼe alae giḍikoa one tin hạbicʼ jakʼnamicʼ do bae janame. Ar unre acʼren boehakoren sarecʼko doko ruạṛa, Israel hoponko ṭhenge.