Jirimiạ 14:13 - সান্তালী বাইবেল

¹³ Onate iń doń menkeda, “Hae, Probhu Isor! Nạbiko doko meneda, ‘ape do lạṛhại bape ńela ar akaltehõ bape kosṭokʼa. Probhu Isor do sạrige niạ ṭhạ̃ire jaejug suluke danapea.’ ”

Jirimiạ 14:13 Referans Kwoze

Jirimiạ 6:14

Onko do ińren hoṛkoakʼ ghạlkoko tolkatako kana okaṭakʼ do cetʼge baṅkan. Onkoko meneda, ‘suluk, suluk,’ menkhan suluk do sạrige bạnukʼanaṅ.

2 Patras 2:1

Menkhan Israelko talare cetʼleka eṛe nạbikoko tahẽkan, onkage apeko talarehõ eṛe cecetʼkoko tahena. Onko do hape hapete nonkan bhul cecetʼakʼko ạguiya one okaṭakʼte manwako nosṭokʼ; ar okoeye kiriń chaḍao akatʼko uni Probhu Isor hõ bako aṅgocea. Nonkate onko do ạḍi usạra apnarte nosṭokʼko ạgujoṅa.

Mikạ 3:11

Onḍenko mukhiyạ do ghus jomkateko bicạra, ar naekeko do ṭakate cecetʼakʼko emokʼa ar nạbiko hõ ṭaka hataokateko nạbiya. Ar Probhu Isorakʼ gokʼṛo reakʼ as dohokateko mena, “Probhu Isor do cetʼ abo talare bạnuiya? Abo cetanre jãhãn muhin do baṅ hijukʼa.”

Jirimiạ 23:17

Okoe ińko nihạ̃t edeńkan onko ṭhen nạbiko do niạ kathako roṛa, ‘Probhu Isore meneda, suluk hoyokʼtapea,’ ar okoe akoakʼ ontor reakʼ keṭecʼakʼteko senokʼkan onko doko mena, ‘jãhãn muskil do baṅ hoyokʼtapea.’

Jirimiạ 4:10

Unreń menkeda, “Hae, hae! E Probhu Isor, noko hoṛko ar Jerusalemrenko do ạḍitetʼgem andha akatʼkoa ar nonkam roṛakada, ‘apeakʼ sulukge hoyokʼtapea,’ menkhan tarwaṛe do aleakʼ jiwi hạbicʼem ader akada.”

Jirimiạ 8:11

Ińren hoṛkoakʼ ghạlko onko do eken cetan cetanteko bogeyetʼtakoa. Onko do ‘suluk, suluk ko,’ meneda menkhan suluk do bạnukʼtakoa.

Jeheskel 13:22

Okoe dhorom hoṛko bạń duk ocoakawatʼko, ape do eṛe kathate onkope as chuṭạu ocoakatʼkoa ar dusṭạmi hoṛ dope cehao akatʼkoa jemon onko do jiwi bańcaotako lạgitʼ bạṛicʼ hor khon aloko ruạṛ hijukʼ.

Jirimiạ 5:31

Nạbiko do eṛeyakʼko nạbiyeda, naekeko do akoakʼ tirege ạidạri dohokateko ḍanṭao kana, ar ińren hoṛko do nonkageko dulạṛkana. Menkhan E ińren hoṛko, ona reakʼ mucạtʼ hecʼlenre cetʼpe cekaea?”

Jirimiạ 5:12

Onko do Probhu Isor reaṅ eṛeakʼgeko roṛeda. Onko doko meneda, “Uni do cetatgeye baṅkana. Aboakʼ jãhãn loksan do baṅ hoyokʼ tabona; abo do tishõ lạṛhại ar akal do babon ńela.

Jirimiạ 1:6

Unre iń doń menkeda, “E Probhu Isor, iń do katha roroṛ bạń baḍaea; ar iń doń huḍińgea.”

Jesaea 56:10

Israelren pahradarko doko kãṛãgea, onko do cetʼge bako baḍaea. Onko do guṅgạ seta lekanako, bako bhokʼ daṛeakʼa. Onko do giticʼkateko kukmũya ar jạpitʼko kusiyakʼa.

Jirimiạ 5:13

Nạbiko do hoe lekako hoyakana; onkore Isorakʼ katha do bạnukʼa. Onate onko okako men ona do onkorege hoyokʼa.

Jeheskel 12:24

Israelren hoṛko talare eṛe dorson ar kusi ocokʼ reakʼ gona-poṛa do ar baṅ tahena.

Jirimiạ 20:6

Ar E Pashur, am ar am gharońjren sanam hoṛ do bondikate Babeltepe idi ocokʼa. Onḍe do amem gujukʼa arko topamea; ar amren okoeko gateko ṭhen nạbi lekate eṛe katham roṛakatʼ onko jotokoakʼ dosa hõ onkage hoyokʼtakoa.”

Jirimiạ 37:19

Okoe ape ṭhen noa kathako nạbiletʼ baṅma, Babel raj do am ar niạ disạm upạrte do bae hijukʼa, onko aperen nạbiko doko okayena?