Jirimiạ 14:10 - সান্তালী বাইবেল

¹⁰ Probhu Isor do noko hoṛko reaṅgeye meneda, “Onko do ạcur baṛaeko kusiyakʼ kana; onko do jaṅga bako jirạuetʼtakoa. Onate iń do bạń ataṅetʼkoa; ar ńitokʼ do onkoakʼ dusṭạmi reaṅ iń disạ ruạṛa ar kại reakʼ sạjạiyiń emakoa.”

Jirimiạ 14:10 Referans Kwoze

Hosea 9:9

Gibea reakʼ dinkore okaleka tahẽkan onkage Israelko do bedhoromreko unum akana. Isor do onkoakʼ dusṭạmi reakʼ kathae disạitakoa ar onkoakʼ kại iạteye sạjạikoa.

Hosea 8:13

Iń ńutumte janwar samaṅkate onko do ona reakʼ jelko jojomkana menkhan iń Probhu Isor do onkore kusi bạnuńa. Ńitokʼ iń do onkoakʼ dusṭạmi reakʼ kathań disạite kại reakʼ sạjạiyiń emakoa; ar onko do Misorteko ruạṛ calakʼa.

Sereńko 119:101

Joto lekan kại reakʼ hor khon ińakʼ jaṅga doń ocokʼakada, jemon amakʼ katha lekań sen daṛeakʼ.

Amos 5:22

Ape do iń ńutumte jeredokʼ samaṅokʼakʼ ar jomakʼ samaṅokʼakʼpe samaṅrele hõ iń do ona bạń ataṅtapea. Ape do lodgopʼ janwarkote sulukren samaṅokʼakʼpe samaṅạńre hõ samaṅạńre hõ ona secʼ do bạń beṅgeda.

Jirimiạ 6:20

E ińren hoṛko, Seba disạm khon oka kunduru hijukʼkan se sạṅgiń disạm khon oka soros boc hijukʼkan onate ińakʼ do cetʼ jạruṛ? Apeakʼ jeredokʼ samaṅokʼakʼko bạsutokʼakʼko do baṅkana; ar apeakʼ janwar dãṛẽteakʼko hõ bae kusi ocoyediń kana.”

Ibriko 8:12

Onate iń do onkoakʼ kạiyiń ikạitakoa, ar tishõ onkoakʼ kại do baṅgeń disạ dohoya.”

Jirimiạ 31:34

Apnar aḍepaserenko ar apnar boeha hõ noa mente okoege tishõ bae cetʼakoa, ‘Probhu Isor baḍaeyepe,’ ente jotoge ińko oromińạ. Ona iạte iń do onkoakʼ bedhoromiń ikạitakoa, onkoakʼ kại do ar tishõ bạń disạitakoa. Iń Probhu Isorge noa katha doń meneda.”

Hosea 11:9

Ińakʼ botoranakʼ edre do bạń sodora, Ephrayim do ar bạń marao utạrea, ente iń doń Isor kana, manwa do baṅa; iń do amreń tahenkan uni sonoticʼ kangeạń. Edre do bạń ạguiya.

Hosea 11:7

Ińren hoṛko do iń ṭhen khon ruạṛ calakʼko niṭ akada. Ona iạte onko do maraṅ Isor, metakʼme ińko hohowạńre hõ bạń goṛowakoa.

Jirimiạ 8:5

Menkhan Jerusalemren hoṛ do bạṛicʼ horte senkate cedakʼ bako ruạṛ hijukʼkana? Onko do eṛeyakʼko sapʼ kajak akawana; ar ruạṛ hijukʼ do bako rebenkana.

Jirimiạ 2:36

Amakʼ hor pheraotam lạgitʼ do cedakʼem ạcur baṛae kana? Ạsur babotre cetʼlekam lajao ocolen onkage Misor iạte hõm lajao ocokʼa.

1 Rapajko 17:18

Maejiu do unre Eliại metadea, “E Isorren hoṛ, iń do cetʼ iń khuti akatʼtama? Am do cetʼ ińakʼ kại reakʼ katham disạ ocoyińte ińren hopon goje lạgitʼem hecʼakana?”

1 Samuel 15:2

Sanam daṛean Probhu Isore meneda, ‘Israelko tinre Misor khonko oḍokʼ hijukʼkan tahẽkana unre Amalekiko do onko upạrteko teṅgolente onko doń sạjạikoa.

Jirimiạ 3:13

Am do eken amakʼ ghạṭko aṅgocʼme, amren Probhu Isor upạrtem hul akada mente, ar hạṛiạṛ dare buṭạkore debotako do amakʼ dulạṛem em akawatʼkoa ar ińakʼ aṛaṅ hõ bam ańjom akada.’

Jeheskel 29:16

Israelko do tishõ Misor cetanre ar bako ṭehãḍokʼa. Onko do Misor reakʼ dosa ńelteko bujhạu daṛeakʼa je, goṛo ńam lạgitʼ Misor secʼko ruạṛlenteko kạileda. Ar onateko baḍae daṛeakʼa, Probhu Isor doń ińkangea.’ ”

Hosea 7:2

menkhan onko do bako bujhạueda je, onkoakʼ sanamakʼ kạmi reakʼ iń disạ dohoyeda mente. Onkoakʼ kại do purạtegeye gherao esetʼ akatʼkoa; onako do jao oktege iń samaṅre menakʼa.

Hosea 7:13

Hae onko do, ente onko do iń ṭhen khon bạṛicʼ horteko calao akana. Onko do sorbonas hoyokʼtako ma, ente iń upạrteko hul akada. Onko chaḍaokoń khojkangea menkhan onko do iń upạrte eṛe kathako roṛeda.

Amos 3:2

“Dhạrtiren sanam jạtrenko tala khon iń do eken apegeń bachao akatʼpea; ar onate apeakʼ sanam kại iạte apegeń sạjạipea.”

Exodus 32:34

Ańjomme, iń okaṭakʼ jaega reakʼ kathań roṛakatʼ ńitokʼ am do senkate hoṛko onḍe idikom. Ińren goḍet do hore udukʼ idiapea. Ar tinre sạjại reakʼ okte hijukʼa unre onkoń sạjạikoa.”

Sereńko 95:10

Pongel bochor hạbicʼ ona piṛhirenkote iń do ạḍiń ạṛis cabalena; ińiń menleda, ‘noko hoṛakʼ ontor do eṭakʼ secʼ ghańjeṛ akantakoa; ińakʼ hor do bako baḍaelakʼa.’