Jesaea 9:19 - সান্তালী বাইবেল

¹⁹ Phạdkoren Probhu Isorakʼ edrete disạm do jarkharokʼa, ar hoṛko do seṅgel lạgitʼ sahan lekako hoyokʼa. Celege acʼren boeha hõ bae dayawaea.

Jesaea 9:19 Referans Kwoze

Mikạ 7:2

Disạm khon Isor botorae kan hoṛ doko meṭao ocoakana; dhoromicʼ do mitʼ hoṛ hõ bạnugicʼan. Sanamkoge mãyãm joroy lạgitʼko tãṛãkʼ akana; onko jotoge akoakʼ pạsire jhạlikoko khojkana.

Mikạ 7:6

ente hopon do apate nihạ̃tea, hoponera do eṅgattetʼ upạrteye teṅgona ar bạhu kuṛi do hanhartetʼ upạrte. Manwa do acʼakʼ gharońjren hoṛge bạiriye hoyokʼtaea.

2 Patras 2:4

Serma goḍetkoko kạiletʼre Isor do onko bae aṛakʼ giḍiletʼkoa, bickom norok reakʼ ńut ghaḍlakʼreye giḍiletʼkote bicạrko lạgitʼe dohoakatʼkoa.

Aposkạmi 2:20

Probhu Isorakʼ ona maraṅ ar ṭhonokte perecʼ dinko hijukʼ lahare, siń cando doe ńutokʼa; ar ńindạ cando do mãyãm lekae hoyokʼa.

Mathae 27:45

Enhilokʼ tikin gelbar baja khon pe baja hạbicʼ goṭa disạm do ńutge tahẽyena.

Amos 5:18

Hae ape do! Ape do ahkaokʼ salakʼ Probhu Isorakʼ din ńeljoṅpe khojkana! Ar cedakʼ ona din lạgitʼ dope gorojokʼkana? Ape ṭhen ona din do marsal reakʼ do baṅ hoyokʼa menkhan ńut reakʼge hoyokʼa.

Joel 2:2

Ona do ńut ar kaṛaṅ kucạṅ ńutakʼ dinge, hende rimil ar kaṛaṅ ńutakʼ dinge. Buru ar ḍuṅgriko cetanre cetʼleka aṅga hijukʼ reakʼ marsal pasnao idikʼ onkage maraṅ ar daṛean pohokoren phạdko hijukʼkana. Nonkan lạṛhại phạd do lahateakʼ jugre tishõ bako tahẽkana, ar oka jugko hijukʼkan unrehõ bako tahena.

Jeheskel 9:5

Ona tayomiń ańjomkeda uni do onko turui hoṛe metakokana, “Ape do nagraha talate uni pańja idiyepe ar jãhãn daya mãyã baṅkate hoṛpe gocʼkoa, ar okoege alope aṛakʼkoa.

Jirimiạ 13:16

Ape do aperen Probhu Isor sarhaoepe, ar baṅkhan uni do ńute ạguapea ar ape do ńut hijukʼkan buru cetanrepe tohodokʼa. Marsal reakʼpe aslenre hõ uni do ńute hoeocoya, ar ona do kaṛaṅ kucạṅ ńutge hoyokʼa.

Jesaea 60:2

Ńelme, dhạrti do ńutte dapal akana ar boṅgan hoṛ jạtrenko cetanre do kaṛaṅ ńutge, menkhan Probhu Isor do am cetanre marsale emokʼa ar uniyakʼ mạhima do am cetanre sodorokʼa.

Jesaea 24:6

Ona iạte mitʼṭecʼ sarap do dhạrtiye utʼ cabaea; ar uniren hoṛko do dusikoko hoyokʼa. Ona iạte dhạrtire okoeko girobasokʼ kan onko doko atar giḍi ocokʼa ar thoṛa hoṛge jiwetʼko tahena.

Jesaea 13:18

Onko do akʼte juạnkoko gocʼkoa; ar bale gidrạko cetanre bako mãyãkʼa ar gidrạko cetanre hõ bako dayakʼa.

Jesaea 13:13

Ona iạte iń do sermań daldalao ocoya; ar phạdkoren Probhu Isorakʼ kurkurạukʼte uniyakʼ jaljalaokʼkan edre dinre pirthimi do ḍikạ ḍakekʼa.

Jesaea 13:9

Ńelpe, Probhu Isorakʼ din do hijukʼ kana. Ona do kurmutạha, kurkurạukʼ ar jaljalaokʼkan edreante hijukʼ kana; pirthimi ar onaren kại hoṛko cabako lạgitʼge hijukʼ kana.

Jesaea 8:22

Ona tayom onko do ot secʼ beṅgetʼkate eken duk kosṭo ar ńutko ńela. Ar botoranakʼ ńutre onko doko sạṅgiń ocokʼa.

Jesaea 5:30

Enhilokʼ onko do doreão reakʼ hud hud saḍe leka Probhu Isorren hoṛko cetanreko gondraokʼa. Jãhãege unre disạm secʼe beṅged enḍekhan uni do ńut ar kosṭogeye ńela; ar marsal hõ rimilte danaṅokʼte ńutokʼa.

Jesaea 1:31

Daṛean hoṛko do rohoṛ busupʼ lekan kope hoyokʼa, ona reakʼ kạmi do seṅgel reakʼ alaṅ leka. Ona do mitʼ dhaogeye lokʼa; ar okoehõ ona seṅgel do bako ĩṛĩcʼ daṛeakʼa.” bańcaoicʼ

Jesaea 3:5

Manwa do manwa, aḍepaseren hoṛko do aḍepaseren hoṛko santaokoa; kạṭicʼko do haṛamko upạrte ar nicạṛ hoṛ do manotan hoṛ upạrteko teṅgona.

Jesaea 4:4

Probhu Isor do acʼren Jiu hotete seṅgelte dhorom reakʼe bicạrkote Sionren maejiukoakʼ mạilạkoe ạrupʼ saphaetakoa ar Jerusalem khon mãyãm reakʼ dage sạṅgiń giḍikakʼa.

Jesaea 5:24

Onatege seṅgel reakʼ alaṅ do cetʼleka busupʼe loyetʼ ar seṅgel reakʼ lepʼre rohoṛ ghãsko jarkharokʼkan, onkage onkoakʼ benaoakʼ do seakʼtakoa ar dhuṛi lekage onkoakʼ baha do oṭaṅokʼtakoa; ente onko do phạdkoren Probhu Isorakʼ hukumko bebatao akada ar Israelren uni sonoticʼakʼ kathako lebetʼ gańjao akada.

Jesaea 10:6

Uni do Isor baṅ botorae kan mitʼ jạtrenko upạrteń kolekana ar okoe ińko khĩs ocoakadiń onko upạrteń kolekana jemon uni do luṭ are recʼko ar hor reakʼ losotʼ lekae lebetʼ gańjao daṛeako.

Jesaea 26:11

E Probhu Isor, amakʼ ti do coṭte tul akan tahen kana, menkhan onko do ona bako ńeleda. Amren hoṛko lạgitʼ amakʼ ãṭ baṛeko ńelma arko lajaokʼma; ar seṅgel do amren bạirikoe jom cabakoma.

Jesaea 33:14

Sionren kạkạiko do ạḍiko botor akana; Isor baṅ botorae hoṛ doko dhak dhakaokʼ kana. Onkoko meneda, “Abo modren okoeṭakʼ hoṛ do jojomkan seṅgel ṭhene tahẽdaṛekokʼa? Ar okoe do jaejug jolokʼkan seṅgel sãoteye tahẽdaṛeakʼa?”

Jesaea 42:25

Onate uni do acʼakʼ jolokʼkan edre ar lạṛhại reakʼ botor do Israel cetanreye dulkeda. Onate seṅgel do beṛhaete jol rakapʼena, enhõ uni do bae bujhạuleda; seṅgel do uniyakʼ hoṛmore lagaoena, enhõ uni do bae moneyada.

Jeheskel 20:47

Ar dạkhin reakʼ bir do ińakʼ katha ańjom lạgitʼ metaeme. Unim metaea, Probhu Isore meneda, ‘iń do amre seṅgeliń salgaoa ar ona do amakʼ sanam berel ar rohoṛ dare nạ̃ṛĩkoe joma. Ona jolokʼkan seṅgel do bạṅ ĩṛĩjokʼa ar dạkhin khon utạr hạbicʼ sanam hoṛ do ona reakʼ lepʼteko khạurạkʼa.

Joel 2:3

Onko laha lahate do seṅgele jojomkana ar onko tayomte do seṅgel lepʼe roṅgokana. Onko samaṅre disạm do Eden bagwan leka, ar onko tayomre do ujạṛakʼ hahaṅkar; ona khon rukhiyạ do cetʼge bae ńameda.

Obodiạ 1:18

Jakobakʼ bõsren doko hoyokʼa seṅgel ar Josephakʼ bõsrenko do seṅgel reakʼ lepʼge; Esao bõsrenko do lanḍha lekako hoyokʼa ar ona seṅgel do onakoe lo torocʼkoa. Esao bõsren do celege jiwetʼ bako tahena. Iń Probhu Isorge noa katha doń meneda.”

Sakariạ 11:6

Disạmren hoṛko cetanre iń do ar bạń dayakʼa; iń do mimitʼko ako aḍepaseren hoṛko ṭhen ar rajawakʼ tireń jimạkoa. Onko do disạmko jarkhara ar onkoakʼ ti khon okoege bạń bańcaokoa.”

Malaki 4:1

Phạdkoren Probhu Isore meneda, “Ńelme, ona din hijukʼkana, ona do culhạ reakʼ seṅgel leka jolokʼa. Enhilokʼ sanam bạḍại hoṛko ar sasantaoko do lanḍha busupʼ lekako hoyokʼa arko lo torojokʼa. Mitʼṭecʼ rehetʼ se mitʼṭecʼ ḍạr hõ sarecʼ do baṅ tahena.

Levitikus 26:26

Iń do apere akaliń kola. Unre gel goṭen maejiu do mitʼṭecʼ culhạre piṭhạko rapakʼapea, ar jojom jokhecʼ piṭhạ do soṅkatepe emokʼa. Ar lacʼ bikʼ do bape jom ńama.

Sakariạ 11:9

Ińiń menkeda, “Aperen gukʼpiko do bạń hoyokʼa. Okoeyakʼ gujukʼ reakʼ katha menakʼ uni doe gujukʼma ar okoeyakʼ pharakokʼ reakʼ katha menakʼ uni doe sạṅgińokʼma. Ar sarecʼko do ako akoakʼ jelko jomma.”