Jesaea 41:22 - সান্তালী বাইবেল

²² Onako sạbud ạguiytape ar oka hoyokʼ ona lạiyabonpe. Lahateakʼ ghoṭnako reaṅ lạipe, jemon bon baḍae daṛeakʼ onako reaṅ mucạtʼ do cetʼ hoyokʼa mente; se darakanakʼ reakʼko lạiya bonpe cetʼ cetʼko hoyokʼa mente.

Jesaea 41:22 Referans Kwoze

Jesaea 45:21

Dela, mambla samaṅtape, dạkhiltape; ar mitʼsãote sopolhaepe. Niạ ghoṭna hoyokʼ ona do laha khon okoeye men akawatʼpea? Sedaeakʼ ona do lahare okoeye sodor akada? Iń Probhu Isorge cetʼ ona do bạń onka akada? Iń chaḍa ar cele Isorge bạnukʼkoa; iń do dhoromren Isor kạnạń, ar babańcaoicʼ hõ ińge. Iń chaḍa ar cele Isor hõ bạnuiya.

Jesaea 48:14

“Ape sanamko jarwa mitʼkate ańjompe. Goṛhon muṭhạnko reaṅ do lahare okoeye lạiyakada? Babel upạrte Probhu Isorren bachao hoṛko do uniyakʼ sanako purạutaea; Probhu Isorakʼ ti do Babelrenko upạrte rakabokʼa.

Jesaea 46:10

Etohopʼ khonge mucạtʼakʼ koń jạhireda, ar sedae khon oka baṅ hoyakan ona hõń lạiyeda. Ińiń men akada, ińakʼ monsubạ do ṭarhao akaege tahena; ar ińakʼ jotowakʼ monsubạń purạutińạ.

Jesaea 44:7

Iń leka do okoe menakʼkoa? Uni do onae lại jạhirma. Uni doe lại jạhirma are lạiyạńma, sedae reakʼ darakanakʼko do okoeye lại sodorakada; ar cetʼko darakana ona baṛeye lạima.

Johan 16:14

Uni sạriyakʼren Jiuge ińakʼ ṭhonoke sodora, ente jãhãnakʼgeń cekae ariń roṛ onage uni do ape ṭhene sodora. Babawakʼ oka menakʼtae onako sanamakʼge ińakʼ kana.

Johan 13:19

Iń do noa hoyokʼ laharegeń lạiyape kana, jemon hoylenrepe pạtiạukʼ baṅma, iń kangeạń.

Jesaea 42:9

Ńelpe, lahateakʼ ghoṭnako do ghoṭao akana ar iń do nãwã ghoṭna reakʼ iń lại sodoreda; ar onako ạuri ghoṭaokʼrege ape ṭhen onań lạiyeda.”

Jesaea 41:26

Niạ babotre pạhil khon do okoeye lạileda jemon bon baḍae daṛeke? Se okoe pạhilreye baḍae ocoletʼ bona jemon bon roṛ daṛeke, ‘uni do ṭhik kathae meneda mente? Okoe hõ bako lạiyakada, ar okoe hõ bako baḍae ocoakada, ar okoe hõ katha roṛ do bako ańjomakada.

Jesaea 48:3

Probhu Isore meneda, “Oka hoyakan ona do sedaeregeń menleda; ariń baḍae ocoleda ar ińakʼ moca do onae lại jạhirleda. Ona tayom ackageń onkakeda ar ona do hoyena.

Jesaea 45:22

“E dhạrti reakʼ ses simạnarenko, iń secʼ ruạṛokʼpe ar bańcaokʼpe, ente iń kangeạń Isor do, iń chaḍa ar cele hõ Isor doko baṅkana.