Dosar Biboron 7:1 - সান্তালী বাইবেল

¹ “Ape okaṭakʼ disạm ạidạri joṅ lạgitʼpe calakʼkan onḍe do aperen Probhu Isorgeye idipea ar ape samaṅ khon ḍher jạtrenkoe laga ńirkoa. Onko doko hoyokʼkana Hittirenko, Girgasirenko, Amorirenko, Kananrenko, Pherisirenko, Hiwirenko ar Jebusirenko. Noko eae jạtrenko doko saṅgegea ar daṛete hõ ape khonko daṛegea.

Dosar Biboron 7:1 Referans Kwoze

Dosar Biboron 31:3

Aperen Probhu Isor do acʼge gaḍae parom idipea are ạyurpea. Ar ape samaṅ khon onko jạtrenkoe marao cabakoa ar ona disạmpe dokhol joṅa. Probhu Isorakʼ katha lekage Josuạ do gaḍa paromkate ape laha lahateye calakʼa.

Aposkạmi 13:19

Ona tayom Kanan disạmren eae jạtrenkoe maraoketʼkote acʼren hoṛko ona disạm cetanre ạidạriye ematʼko tahẽkana.

Dosar Biboron 4:38

Uni doe onka akada jemon maraṅ ar daṛean jạtrenko ape samaṅ khone laga ńirkote onkoakʼ disạmte apeye idi daṛeape ar sompotti lekate onae em daṛeape; ar teheń do onage hoyakana.

Dosar Biboron 20:1

“Lạṛhại senkate bạiri secʼrenko ape khon ḍher sadomko, lạṛhại gạḍiko ar palṭonko ńelkate alope botorokʼa, ente aperen Probhu Isor okoe do Misor disạm khone oḍok ạgu akatʼpe uni do ape sãoteye tahena.

Dosar Biboron 9:1

“E Israelko, ańjompe, okoe jạtrenko ape khon lekhareko ḍherge ar daṛe hõko daṛege ar onkoakʼ serma ṭuṅgạu usul pạcriko ar maraṅ maraṅ nagrahako ńitokʼ ape do onako dokhol lạgitʼ jordan gaḍape parom lạgidokʼkana.

Dosar Biboron 9:4

“Aperen Probhu Isor do ape samaṅ khon onkoe laga ńirko tayom aperen okoehõ jemon mone monte aloko menma, ‘iń doń bindusạngete Probhu Isor do noa disạm ạidạri lạgitʼ nonḍeye ạguakadińạ.’ Ona do sạriyakʼ do baṅkana; noko jạtren hoṛkoakʼ dusṭạmi iạtege Probhu Isor do ape samaṅ khone laga ńirko lạgidokʼ kana.

Exodus 33:2

Iń do ape laha lahate mitʼṭen serma goḍet iń kolea ar uni do ona disạm khon Kananrenko, Amorirenko, Hittirenko, Pherisirenko, Hiwirenko ar Jebusirenkoe laga ńirkoa.

Sereńko 78:55

Onko samaṅ khon porjạtren koe laga ńirketʼkoa, ar onkoakʼ jaega jumi soṅkate sompotti lekate onkoe hạṭińatʼkoa; onkoakʼ oṛakʼ duạrre Israel bõsrenkoe girobas ocoketʼkoa.

Dosar Biboron 31:20

Onkoren hapṛamko ṭhen gokʼakʼ ona toa ar dumur rasa ạtukʼkan disạmte tinreń idikoa ar tinre lacʼ bikʼko joma arko tirpitokʼa unre onko do eṭakʼ debota secʼko ạcurokʼte, onkoko ḍobokʼakoa ar ińko nihạ̃tińa ar ińakʼ bondobosko rạpuda.

Dosar Biboron 11:29

Dokhol lạgitʼ ape okaṭakʼ disạmtepe bolo lạgidokʼkan ar aperen Probhu Isor tinre onḍeye idipea unre Gerisim buru cetan khon ona bhor reakʼ kathape lại sodora ar sarapakʼ katha do Ebal buru khonpe lạiya.

Dosar Biboron 6:23

Menkhan onḍe khon uni doe oḍok ạguakatʼ bona jemon aboren hapṛamko ṭhen oka disạm emokʼ reakʼe gokʼletʼ ona disạme emabon.

Dosar Biboron 6:10

“Aperen hapṛamko Abraham, Isahak ar Jakob ṭhen aperen Probhu Isor do kiriạkate okaṭakʼ disạm emokʼ lạgitʼe gokʼakawatʼpe onḍe uni doe idipea. Onḍe do maraṅ ar napae napae nagrahako menakʼa okaṭakʼ ape bape benao akatʼ,

Dosar Biboron 6:1

“Aperen Probhu Isor do niạko hukum ar ạn-ạriko cetʼape lạgitʼ ińe hukum akawadińạ, jemon jordan gaḍa paromkate okaṭakʼ disạm ạidạri lạgitʼpe calakʼkan onḍe onape manao idiy.

Numeri 14:31

Aperen okoeko hopon ar hoponerako recʼ ocokʼ reakʼ kathape menletʼ onkoge iń do ona disạmteń idikoa. Onkoge onepe nindạu akatʼ disạmko ạidạri joṅa.

Exodus 15:7

Okoe am upạrteko teṅgoyen amakʼ maraṅ ṭhonokte onko do latartem giḍikatʼkoa; ar amakʼ jal jalaokʼkan edre do busupʼ leka onkoe lo maraoketʼkoa.

Exodus 6:8

Okaṭakʼ disạm do Abraham, Isahak ar Jakob ṭhen emokʼ lạgitʼ iń gokʼletʼ ona disạmtegeń idipea ar ona disạm reakʼ ạidạriń emapea. Ar ińkangeạń Probhu Isor do.’ ”

Exodus 23:28

Hibirenko, Kananrenko ar Hittirenko ape samaṅ khon laga ńirko lạgitʼ iń do ape laha lahate bhimrulkoń kolkoa.

Exodus 23:33

Apeakʼ disạmre alope girobas ocoakaoa. Arpe tahẽ ocoako khan onko do iń upạrte kại secʼko or idipea, ar onkoren deb-debikope sewawako khan khạṭige jhãmparepe paṛaokʼa.”

Levitikus 14:34

“Okaṭakʼ disạm do ạidạri menteń emape lạgidokʼkan ona disạmte bolokate onḍe jãhãn mitʼṭecʼ oṛakʼre murhucʼjom rog iń paṛao ocoy,

Dosar Biboron 20:16

Menkhan aperen Probhu Isor do okoe jạtrenkoakʼ ato ar nagrahako somppoti lekateye emape lạgidokʼkan onḍe okoe hõ jiwetʼ do alope dohokoa.

Josuạ 3:10

Aperen jiwetʼ Probhu Isor do ape sãore menae ar uni do Kananrenko, Hittirenko, Hiwiko, Pherisiko, Gergasiko, Amorirenko ar Jebusiko khạṭige ape samaṅ khone laga ńirkoa ar ona do nonkatepe bujhạu daṛeakʼa.

Josuạ 11:3

Uni do purub ar pạchim secʼren Kananiko ṭhen ar buru elakaren Amoriko, Hittiko, Pherisiko ar Jebusiko ṭhen ar Hermon buru latar reakʼ Mispa ṭoṭharen Hiwiko ṭhen hõ sombate kolkeda.

Josuạ 24:11

“ ‘Ona tayom ape do Jordan gaḍa paromkate Jerikho nagrahatepe hecʼena. Jerikho nagraharen hoṛko ar Amoriko, Pherisiko, Kananiko, Hittiko, Gergasiko, Hiwiko ar Jebusiko do ape upạrteko lạṛhạiyena, menkhan iń do onko sanamko apeakʼ tireń jimạketʼkoa.

1 Rapajko 16:31

Nabatren hopon Jerobiam okakoe kạiletʼ onako do thoṛawakʼgeye metakʼkan tahẽkana. Eken ona do baṅa, uni do Sidonkoren raj Et-bakʼalren hoponera Esebele baplakedea ar Bakʼ-al debota sewawaye ehopʼena.

Nehemiạ 13:23

Ona jokhecʼ iń do niạ hõń ńelkeda je, Jihudạren adom hoṛko do Asdod, Amoni ar Moabi kuṛikoko bapla akatʼkoa.

Exodus 23:32

Onko sãote se onkoren debotako sãote cetʼge alope rikita.

Numeri 13:29

Ar Amalekiko do disạm reakʼ dạkhin nakhareko tahenkana; Hittirenko, Jebusirenko ar Amorirenko do buru ṭoṭhakore ar Kananrenko do jalapuri aṛe ar Jordan gaḍa aṛeteko girobasokʼ kana.”

Dosar Biboron 9:3

Menkhan ape do niạ katha baḍae dohokakʼpe, aperen Probhu Isor do ḍahao maraoakʼ seṅgel leka ape lahate jordan gaḍae parom maṛaṅokʼ kana. Unige onkoe kạbukoa are marao utạrkoa; unige ape ṭhene bhagao ocokoa; Ar Probhu Isor ape ṭhen oka as reakʼ kathae emakan onkage uni doe laga ńirkoa ar thoṛa ghạṛicʼtegeye marao utạrkoa.

2 Bõsbudạ 8:7

Ar okoe do Israelko baṅkan, metakʼme Amoriko, Hittiko, Peresiko, Jebusikoren bõsko do unhõ jiwetʼko tahẽkana,

Esra 9:1

Niạko kạmi sạten khan mukhiyạko do iń ṭhen hecʼkateko menkeda, “Israelko ar onkoren naekeko ar Liwiko do onkoakʼ disạmre girobasokʼ kan judạ judạ jạtrenko khon apnartetʼ do bako begar dohoakan tahẽkana. Onko do Kananiko, Hittiko, Perisiko, Jebusiko, Amoniko, Moabiko, Misriko ar Amoriko leka hirkhạwakʼko kạmikana.